ސްޕެއިން އިން ފަހު ވަގުތު ސްވިޒަލެންޑު ބަލިކޮށްފި

ޔުއެފާ ނޭޝަންސް ލީގު އޭގެ ގުރޫޕު ހަތަރެއްގައި ސްވިޒަލެންޑާ ދެކޮޅަށް ކުޅުނު މެޗުން ފަހު ވަގުތު ސްޕެއިން މޮޅުވެއްޖެ އެވެ.

ހޯމަ ދުވަހުގެ ރޭ ސްވިޒަލެންޑާ ދެކޮޅަށް ކުޅުނު މެޗު ސްޕެއިން އިން ކާމިޔާބު ކުރީ 3-2ންނެވެ. މެޗުގައި ދެ ފަހަރެއްގެ މަތިން ސްޕެއިން އިން ލީޑު ނެގި ނަމަވެސް، ސްވިޒަލެންޑުން ނަތީޖާ ހަމަހަމަ ކުރި އެވެ. ނަމަވެސް މެޗުގެ އެންމެ ފަހު ވަގުތުގައި ލަނޑު ޖަހައިގެން ސްޕެއިން ވަނީ މޮޅުވެފަ އެެވެ.

މެޗު ފަށައިގެން 32 ވަނަ މިނެޓުގައި ސްޕެއިން އަށް ލީޑު ނަގައިދިނީ ޔެރެމީ ޕީނޯ އެވެ. އެއީ އެ ޓީމަށް ލިބުނު ޕެނަލްޓީއެއްގައި ޕެޑްރީ ފޮނުވާލި ބޯޅަ ރީބައުންސް އަށް އައި ވަގުތު، ބޯޅަ ގޯލަށް ވައްދާލައިގެން ޕީނޯ ޖެހި ލަނޑެކެވެ. ނަމަވެސް މެޗުގެ ދެ ވަނަ ހާފުގައި ސްވިޒަލެންޑުން ލަނޑު ޖަހައި ނަތީޖާ ހަމަހަމަ ކުރި އެވެ. މެޗުގެ 63 ވަނަ މިނެޓުގައި ސްވިޒަލެންޑަށް ނަތީޖާ ހަމަހަމަ ކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ޖޮއެލް މޮންޓިއޭރޯ އެވެ.

ސްވިޒަލެންޑުން ނަތީޖާ ހަމަހަމަ ކުރިތާ ފަސް މިނެޓުގެ ތެރޭގައި، ސްޕެއިން އިން ވަނީ ދެ ވަނަ ލަނޑެއް ޖަހައި އަނެއްކާ ވެސް ލީޑު ނަގައިފަ އެވެ. އެ ލަނޑު ސްޕެއިން އަށް ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ބްރާޔަން ހިލް އެވެ. ނަމަވެސް މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، ސްވިޒަލެންޑަށް ލިބުނު ޕެނަލްޓީ ކާމިޔާބުކޮށް ދެ ވަނަ ފަހަރަށް އެ ޓީމަށް ނަތީޖާ ހަމަހަމަ ކޮށްދިނީ އެންޑީ ޒެކީރީ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ސްޕެއިން އަށް ލިބުނު ޕެނަލްޓީ ކާމިޔާބުކޮށް، މެޗުން އެ ޓީމު މޮޅުކޮށްދިނީ ބްރަޔާން ޒަރަގޯޒާ އެވެ.

ސްވިޒަލެންޑު މެޗާ ކުރިމަތިލީއިރު ވެސް، އެންމެ ފަހުގެ ޗެމްޕިއަން ސްޕެއިން އިން ވަނީ މުބާރާތުގެ ކުއާޓާ ފައިނަލްގެ ފުރުސަތު ހޯދައިފަ އެވެ. މި ގުރޫޕުގައި ކުޅުނު ހަ މެޗުން ސްޕެއިން އަށް ލިބެނީ 16 ޕޮއިންޓެވެ. ފަސް މެޗުން އެ ޓީމު މޮޅުވެފައިވާއިރު، އެއް މެޗުން ވަނީ އެއްވަރުވެފަ އެވެ. ސްޕެއިން އަތުން ވީ ބައްޔާ އެކު ސްވިޒަލެންޑު އޮތީ ހަ މެޗުން ދެ ޕޮއިންޓާ އެކު މި ގުރޫޕުގެ އެންމެ ފުލުގަ އެވެ.