ހުކުރުދުވަހު ހުކުރު ގަޑީގައި ބިދޭސީންތަކެއް ލައްވައި މަސައްކަތް ކުރުވާފައި ނުވާނެ ކަމަށް އެމްޑަބްލިއުއެސްސީއިން ބުނެފި
މީސްމީޑިއާގައި ދައުރުވަމުން އަންނަ މި ވީޑިއޯއަށް ގިނަ ބަޔަކު ފާޑުކިޔުން ވަނީ އަމާޒުވެފަ
އެމްޑަބްލިއުއެސްސީ
ހުކުރުދުވަހު ހުކުރގަޑީގައި ބިދޭސީންތަކެއްލައްވައި މަސައްކަތް ކުރުވާފައި ނުވާނެ ކަމަށް އެމްޑަބްލިއުއެސްސީ އިން ބުނެފިއެވެ.
އެމްޑަބްލިއުއެސްސީން އެފަދައިން ބުނެފައި ވަނީ ސަރުކާރުގެ ފެން ކުންފުނި އެމްޑަބްލިއުއެސްސީން ބިދޭސީ މަސައްކަތްތެރިން ލައްވައި ހުކުރު ދުވަހު ހުކުރު ގަޑީގައި މަސައްކަތް ކުރުވާ މަންޒަރުދައްކުވައިދޭ ކަމަށް ބުނެ، ބިދޭސީން ތަކެއް ހުކުރު ގަޑީގައި އުމްރާނީ މަސައްކަތްތަކެއް ކުރާ ވީޑިއޯއެއް މީސްމީޑިއާގައި ދައުރުވާން ފަށާފައި ވަނިކޮށެވެ.
މީސްމީޑިއާގައި ދައުރުވަމުން އަންނަ 10 ވަރަކަށް ސިކުންތުގެ ދިގުމިން ހުންނަ މި ވީޑިއޯއިން ފެންނަ ގޮތުގައި ހުކުރު ވަގުތު ތިން ބިދޭސީ މަސައްކަތްތެރިން ހަރަކާތްތެރިވާތަން ފެނެއެވެ. މީސްމީޑިއާގައި ދައުރުވި ވީޑިއޯގައި ބުނެފައި ވަނީ އެއީ އެކްޑަބްލިއުއެސްސީ އިމާރާތެއްގެ މަސައްކަތުގައި އުޅުނު ބިދޭސީން ކަމަސެވެ. މި ވީޑިއޯއިން ހުކުރުދުވަހު މިސްކިތްތަކުން ހުކުރު ޚުތުބާދޭ އަޑުވެސް އިވެއެވެ. އެހެންނަމަވެސް ހޮނިހިރު ދުވަހު އެމްޑަބްލިއުއެސްސީން ވަނީ މިި ވީޑިއޯއަކީ އެމްޑަބްލިއުއެސްސީގެ މުވައްޒަފުން މަސައްކަތުގައި އުޅުނު ބިދޭސީންތަކެއްގެ ވީޑިއޯ އެއް ނޫން ކަމަށް ބުނެފައެވެ. އަދި ހުކުރު ވަގުތު މަައްކަތް ކުރި ކަމަށް ބުނާ ވާހަކަ ވެސް އެ އިދާރާ އިން ވަނީ ދޮގުކޮށްފައެވެ.
މި ވީޑިއޯއިން ފެންނަ އެ އިމާރާތަކީ މާފަންނު ރަސްފަންނުކައިރީގައި ހުންނަ އެމްޑަބްލިއުއެސްސީގެ އިމާރާތެް ކަމަށް މީސްމީޑިއާގައި އެ މައުލޫމާތު ހިއްސާކުރި ފަރާތްތަކުން ވަނީ ބުނެފައެވެ. އެ ވީޑިއޯއިން ފެންނަގޮތުގައި ހުކުރު ގަޑީގައި އެ ތިން ބިދޭސީން މަސައްކަތް ކުރަމުން ގެންދިއައީ އިމާރާތުގެ ފުރާޅުން ބައެއް ހިޔާކުރުމުގެ މަސައްކަތެކެވެ.
މީސްމީޑިއާގައި ދައުރުވަމުން އަންނަ މި ވީޑިއޯއަށް ގިނަ ބަޔަކު ފާޑުކިޔުން ވަނީ އަމާޒުވެފައެވެ.
