ޔުމްނު ވެއްޓުނު މައްސަލައަށް ނުފޫޒެއް ނުފޯރުވަން، މާންދޫގެ ދެކުނުގޭގެ ނަން ސިއްރުކޮށްފައިވަނީ ފުލުހުން: މިނިސްޓަރު އަމީން
މި ހާދިސާ ހިނގާފައިވަނީ މއ.މާންދޫގެދެކުނުގޭގައެއް ނޫން
ބުރާސްފަތި ދުވަހު ރައްޔިތުން މަޖިލީހުގައި ޓްރާންސްޕޯޓު މިނިސްޓަރު މުހައްމަދު އަމީން ވާހަކަދައްކަވަނީ
އޭޕްރީލް މަހުގެ 18 ވަނަ ދުވަހުގެ ރޭ ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ފުރާޅެއްގެ މައްޗަށް ވެއްޓިފައި އޮއްވާ ފެނުނު އުމުުރުން 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާގެ ތަހުގީގުގައި މައުލޫމާތު ހާމަކުރުމުގައި މއ.މާންދޫގެދެކުނުގޭގެ ނަން ސިއްރުކޮށްފައިވަނީ ފުލުހުން ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.
ބުރާސްފަތި ދުވަހު ރައްޔިތުން މަޖިލީހުގައި މިނިސްޓަރު އަމީންގެ އިތުބާރު ނެތްކަމުގެ މައްސަލައަށް ޖަވާބުދާރީވުމަށް ދިން ފުރުސަތުގައި، މިނިސްޓަރު އަމީން ވިދާޅުވީ ޔުމްނުގެ މައްސަލައަށް އެއްވެސް ގޮތަކަށް ނުފޫޒެއް ފޯރުވާފައިނުވާ ކަމަށާއި، މިހާދިސާ ހިނގިއިރު ހުންނެވީ ވެސް ރާއްޖެއިން ބޭރުގައި ކަމަށެވެ.
ހެންވޭރު ގެެއެއްގެ ފުރާޅު މައްޗަށް އަންހެން ކުއްޖަކު ވެއްޓުނު ހާދިސާ ހިނގާފައިވަނީ މއ.މާންދޫގެދެކުނުގޭގެ ނޫންކަން ފާހަގަކުރައްވައި މިނިސްޓަރު އަމީން ވިދާޅުވީ އެދަނޑިވަޅުގައި އެ ހާދިސާ ހިނގުމުގައި ޝާމިލުނުވާތަނެއްގެ ނަން އެހިނދުގައި ހާމަކުރުމާއި، ނުކުރުން އެއީ މޯލްޑިވްސް ޕޮލިސް ސަރވިސްއިން ނިންމާފައިވާ ނިންމުމެއް ކަމަށެވެ.
ބުނެވިދިޔަ ހާދިސާއާ ގުޅިގެން ތަހުގީގީ އިދާރާތަކުން ހާމަކުރާނެ މައުލޫމާތާއި ހާމަނުކުރާނެ މައުލޫމާތުތައް ނުވަތަ އެހިނދަކަށް ހާމަ ކުރަން މުހިންމު މައުލޫމާތެއްކަން ނިންމާނީ އެތަހުގީގީ އިދާރާއަކުން. އަދި މޯލްޑިވްސް ޕޮލިސް ސާވިސްއަކީ އަޅުގަނޑުގެ ބެލުމުގެ ދަށުމުގައި ހިންގާ އިދާރާއެއް ވެސް ނޫން، މިނިސްޓަރެއްގެ ހައިސިއްޔަތުން އަޅުގަނޑަށް ޖަވާބުދާރީވާ އިދާރާއެއް ވެސް ނޫން، އެގޮތުން މޯލްޑިވްސް ޕޮލިސް ސާވިސްގެ އެއްވެސް ކަމަކަށް އަޅުގަނޑު ނުފޫޒެއް ފޯރުވައިފައެއް ނުވާނެ. އަދި މޯލްޑިވްސް ޕޮލިސް ސާވިސްއަކީ އަޅުގަނޑުގެ ބެލުމުގެ ދަށުމުގައި ހިންގާ އިދާރާއެއް ވެސް ނޫން، މިނިސްޓަރެއްގެ ހައިސިއްޔަތުން އަޅުގަނޑަށް ޖަވާބުދާރީވާ އިދާރާއެއް ވެސް ނޫން، އެގޮތުން މޯލްޑިވްސް ޕޮލިސް ސާވިސްގެ އެއްވެސް ކަމަކަށް އަޅުގަނޑު ނުފޫޒެއް ފޯރުވައިފައެއް ނުވާނެޓްރާންސްޕޯޓު މިނިސްޓަރު މުހައްމަދު އަމީން
މި މައްސަލައަށް ނުފޫޒު ނުފޯރުވާ ކަމަށް މިނިސްޓަރު އަމީން ވިދާޅުވި ނަމަވެސް އެބޭފުޅާއަށް ބޮޑެތި ތުހުމަތުތަކެއް ވަނީ އަމާޒުވެފައެވެ. އަދި މިމައްސަލާގެ އަސްލު ފޮރުވައި، ވަރަށް ބޮޑަށް ޔުމްނު ކުށްވެރިވާ ގޮތަށް މުޅި ކޭސް ބަދަލު ކުރުމަށް މަސައްކަތް ކޮށްފައިވާ ކަމަށް ގިނަ ބަޔަކު ބުނެއެވެ.
މީގެ އިތުރުން ޔުމްނުއަށް އިންސާފު ހޯދައިދިނުމަށް ގޮވާލާ ކުރިއަށް ގެންދާ ޒުވާނުންގެ މުޒާހަރާގައި ވެސް މިނިސްޓަރު އަމީންގެ އިސްތިއުފާއަށް ދަނީ ތަކުރާރުކޮށް ގޮވާލަމުންނެވެ. ނަމަވެސް މިނިސްޓަރު އަމީން ވިދާޅުވީ އިސްތިއުފާ ދިނުމަށް ނުވިސްނާ ކަމަށެވެ.
