ރައީސް މުއިއްޒާ ގުޅުންހުރި ކަންކަން ވަރަށް ބާރަށް ކުރިއަށްދޭ: ވަހީދު
ރިޔާސީ ކެންޕޭންގެ ތެރޭގައި ރައީސް މުއިއްޒު ދެއްކެވި ވާހަކަފުޅުތަކާއި، މިހާރު ދައްކަވާ ވާހަކަފުޅުތައް ވެސް ދިމާނުވޭ
ޓީވީޓޯކް ޕްރޮގްރާމްގައި އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު
ދިވެހިރާއްޖޭގެ ތަރައްގީއާއި ރައްޔިތުންނާ ގުޅުންހުރި އެއްވެސް ކަމެއް ކުރިއަށް ނުގެންދިޔަ ނަމަވެސް ރައީސުލްޖުމްހޫރިއްޔާ ޑރ.މުހައްމަދު މުއިއްޒާ ގުޅުންހުރި ކަންކަން ވަރަށް ބާރަށް ކުރިއަށް ގެންދާ ކަމަށް އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ވަހީދު ވިދާޅުވީ ރިޔާސީ ކެންޕޭންގެ ތެރޭގައި ރައީސް މުއިއްޒު ދެއްކެވި ވާހަކަފުޅުތަކާއި، މިހާރު ދައްކަވާ ވާހަކަފުޅުތައް ވެސް ދިމާނުވާ ކަމަށެވެ. އަދި އެމަނިކުފާނުގެ ވާހަކަފުޅުތަކާ ގުޅޭގޮތުން މިހާރު ވަކި އެއްޗެއް ދަންނަވަން ވެސް ދަތި ކަމަށް ވަހީދު ވިދާޅުވި އެވެ.
ރާއްޖޭގެ ތަރައްގީއަށް އިޝާރާތް ކުރައްވައި ވަހީދު ވިދާޅުވީ މި ސަރުކާރަށް އަހަރަކަށްވުރެ ގިނަ ދުވަސްވެފައިވާއިރު, ރައްޔިތުންނާ ގުޅުންހުރި އެއްވެސް ކުރިއަށް ނުދާ ކަމަށެވެ. ނަމަވެސް ރައީސް މުއިއްޒާ ސީދާ ގުޅުންހުރި ކަންކަން ބާރު ސްޕީޑްގައި ކުރިއަށްދާ ކަމަށް އޭނާ ވިދާޅުވި އެވެ.
އެގޮތުން މުލިއާގެއަށް ބޮޑެތި ހަރަދުތައްކޮށް ތަރައްގީ ކޮށްފައިވާ ކަމަށާއި، އާރަށް ވެސް ތަރައްގީ ކުރަމުންދާ ކަމަށް ވަހީދު ވިދާޅުވި އެވެ. އަދި ރަސްމީ ފާލަން ތަރައްގީކޮށް ނިންމާފައިވާކަން ފާހަގަކުރައްވައި ވަހީދު ވިދާޅުވީ ޖެހިގެން ހުރި ސަރަހައްދުގައި އާއްމު ރައްޔިތުން މާލެއަށް އަރައިފައިބައި، ދަތުރަށް ފުރަމުންދަނީ ވަރަށް ހާލުގައި ކަމަށް އޭނާ ވިދާޅުވި އެވެ.
އަވައްޓެރި އިންޑިޔާއާ ބެހޭގޮތުން އެބޭފުޅުން އެ ފަތުރި ފާޑުފާޑުގެ ޕްރޮޕެގެންޑާއާއި، ފާޑުފާޑުގެ ބިރުވެރިކަމާއި، ނަފްރަތު އުފެއްދުމަށްޓަކައި ދެއްކެވިހާ ވާހަކަތަކާ މޭ ފުރާ އިންޑިއާ އައުޓް ޖަހައިގެން ނުކުމެ ހިންގެވި ކަންކަމާއި، މިހާރު ކަންކަން ކުރައްވާ ގޮތާއި، ދެން މިހާރު މިސަރުކާރުން ހަމައެކަނި މިދެންނެވީ ދެ އަހަރު ވާން ދާއިރުގައި 22 މިނިސްޓްރީ ހައްދަވައިގެން ތިބިއިރުގައި އަމިއްލައަށް ފެށި އެއްވެސް ކަމެއް ނެތްއިރުގައި އަޅުގަނޑުމެންނަށް ފެންނަނީ މިސާލަކަށް ރައީސުލްޖުމްހޫރިއްޔާއާ ގުޅޭ ކަންކަން މުލިއާގޭގައި ވަރަށް ބޮޑު ހަރަދުކޮށްގެން މަރާމާތުކޮށްފި. އާރަށުގައި ބޮޑު ސިންގާ ގަޑުވަރެއް ހަދަމުން އެބަދޭ. ރަސްމީ ފާލަން ހަދައިފި. ކައިރި ރައްޔިތުންނަށްޓަކައޭ ތިމަންނަ ވެރިކަން ކުރަނީއޭ ބުނާއިރު، ކައިރީގައި ހަމަ އެއްނަންބަރު ފާލަމާ ޖެހިގެން ފެންނާނެ ތޮއްޖެހިފައި އާއްމުން އޮތް މިންވަރު ހަނިހަނި ތޮއްޓެއްގެ މަތީގައި. އާއްމު ރައްޔިތުން ތިބި ގޮތަށް ތިއްބާ އަނެއްކާ މިބޭފުޅާ ހެއްދެވި ފާލަން އަނެއްކާ އަލުން ބޮޑު ކުރައްވައި މަރާމާތު ކުރައްވައިފި.އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ)
ސިފައިން ޚިދުމަތުގެ ފެންވަރު ރަނގަޅު ކުރާ ކަމަށް ބުނެ ރައީސް މުއިއްޒު ދައްކަވަމުން ގެންދަވާ ވާހަކަފުޅުތަކަށް ވެސް ވަހީދު ވަނީ ފާޑު ވިދާޅުވެފަ އެވެ.
ވަހީދު ވިދާޅުވީ ހަނަފަސް ސަހަރާތަކުގައި ދުއްވާ ބޮޑެތި ފުރޮޅުލީ ޓޭންކަރުތަކުން އެކަނި ސިފައިންގެ ތަރައްގީ ނުކުރެވޭ ކަމަށެވެ. ސިފައިންގެއަށް ގާބިލު ތައުލީމީ މީހުން ބޭނުންވާ ކަމަށް އޭނާ ވިދާޅުވި އެވެ. ނަމަވެސް މިސަރުކާރުން ދައްކަމުންދަނީ ކިޔެވުމަށް ދަށް ނުކިޔަވާ މީހުން ސިފައިންގެއަށް ވައްދާ ތަމްރީން ދޭ ވާހަކަ ކަމަށް ވަހީދު ވިދާޅުވި އެވެ.
