އުއްމީދަކީ މެސީ ބާސާގައި މަޑުކުރުން: ގާޑިއޯލާ
26 އޯގަސްޓު 2017 | ހޮނިހިރު 04:40ބާސާގައި މެސީ ރިޓަޔާ ކުރާނެ ކަމަށް އުއްމީދު ކުރަން: ގާޑިއޯލާ
މެސީއާއި ގާޑިއޯލާ
ސްޕެއިންގެ ބާސެލޯނާއަށް ކުޅެމުން އަންނަ އާޖެންޓީނާގެ ފޯވާޑު ލިއޮނެލް މެސީ އެ ޓީމުގައި މަޑުކުރުމަކީ އޭނާގެ އުއްމީދު ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.
ބާސާއާ އެކު މެސީ ހަދާފައިވާ އެއްބަސްވުމުގައި ބާކީ އެއް އަހަރު އޮތް އިރު ސިޓީން އޭނާ ހޯދުމަށް މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެއެވެ. އެހެން ނަމަވެސް ގާޑިއޯލާ ވަނީ މި ރިޕޯޓުތައް ދޮގު ކޮށްފައެވެ.
ނޫސްވެރިންގެ ބައްދަލުވުމެއްގައި ވާހަކަ ދައްކަމުން ގާޑިއޯލާ ބުނެފައި ވަނީ ސިޓީން މެސީ ގެންނަން އުޅޭ ކަމުގެ އަޑުތައް ފެތުރިފައިވާ ކަމަށާއި އެހެން ނަމަވެސް އޭނާގެ އުއްމީދަކީ ބާސާގައި މެސީ ރިޓަޔާކުރުން ކަމަށެވެ. އެހެން ކަމުން ސިޓީގެ ކޯޗެއްގެ ގޮތުގައި ގާޑިއޯލާ ހުރެ މެސީ އެ ޓީމަށް ގެނައުމަށް އޭނާ މަސައްކަތް ނުކުރާނެ ކަމަށް ގާޑިއޯލާ ބުނެފައި ވެއެވެ.
ގާޑިއޯލާ ވަނީ ސިޓީއަށް އިތުރު ކުޅުންތެރިން ގެނައުމަށް ބޭނުން ނުވާ ކަމަށް ބުނެފައެވެ. އެގޮތުން އޭނާގެ ސްކޮޑުގައި މިވަގުތު ތިބި ކުޅުންތެރިންނާ މެދު ހިތްހަމަ ޖެހޭ ކަމަށާއި ޓްރާންސްފާ މާކެޓުގައި ބާކީ އޮތް ދުވަސްތަކުގައި އިތުރު ކުޅުންތެރިޔެއް ގެނައުމަށް މަސައްކަތް ނުކުރާނެ ކަމަށް ގާޑިއޯލާ ވަނީ ހާމަ ކޮށްފައެވެ.
މެސީ ވަނީ މީގެ ކުރިންވެސް ގާޑިއޯލާއާ އެކު މަސައްކަތް ކޮށްފައެވެ. އެގޮތުން ބާސެލޯނާގެ ރަންޒަމާން ކަމަށްވާ 2008 ފެށިގެން 2012 ވަނަ އަހަރާ ހަމަޔަށް ގާޑިއޯލާ ވަނީ މެސީއަށް ކޯޗުކަން ކޮށްދީފައެވެ.
މެސީއަކީ ގިނަ ބަޔަކު ގަބޫލްކުރާ ގޮތުގައި މިހާތަނަށް ފުޓުބޯޅައިގެ ދުނިޔެއަށް އައި އެންމެ މޮޅު ކުޅުންތެރިޔާއެވެ. އޭނާ ވަނީ ފީފާއިން ހޮވާ ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައެވެ.
