ސްޕެނިޝް ލަލީގާ: ފަހުވަގުތު މެސީ ކާމިޔާބުކުރި ލަނޑުން ބާސާ އިން ރެއާލް ބަލިކޮށްފި

ސްޕެނިޝް ލަލީގާގައި ފަހުވަގުތު ލިއޮނެލް މެސީ ކާމިޔާބުކުރި ލަނޑުން ބާސެލޯނާ އިން ރެއާލް މެޑްރިޑް ބަލިކޮށްފި އެވެ.

އާދީއްތަ ދުވަހުގެ ރޭ ކުޅުނު މެޗުން ރެއާލްއާ ވާދަކޮށް ބާސާ އިން މެޗު ކާމިޔާބުކުރީ 2-3 ގެ ނަތީޖާއަކުންނެވެ.

ރެއާލް ދަނޑުގައި ކުޅުނު މި މެޗު ފެށިގެން އެޓީމުން ރަނގަޅަށް ކުޅެ، ހަމަލާ އުފައްދަން މަސައްކަތްކުރި އެވެ. އެހެންނަމަވެސް ބާސާ އިން ވަނީ މެޗުގެ ކޮންޓްރޯލް ހޯދާ ރެއާލްގެ ހާފަށް ބާރުބޮޑުކޮށް އެޓީމުގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ރެއާލް އިންނެވެ. މި ލަނޑު 28 ވަނަ މިނެޓުގައި އެޓީމަށް ކާމިޔާބުކޮށްދިނީ ކަސެމީރޯ އެވެ. މި ލަނޑު އޭނާ ކާމިޔާބުކުރީ ސާޖިއޯ ރާމޮސް ފޮނުވާލި ބޯޅަ ދަނޑީގައި ޖެހިފައި ބޭރުވާން ދަނިކޮށް އެއްފަހަރުން ގޯލުތެރެއަށް ފޮނުވާލައިގެންނެވެ.

މި ލަނޑާއެކު ބާސާ އިން އެޓީމުގެ ކުޅުން އިތުރަށް ރަނގަޅުކުރިއިރު، 33 ވަނަ މިނެޓުގައި ބާސާ އިން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މެސީ އެވެ. އިވާން ރަކިޓިޗްގެ އެހީތެރިކަމާއެކު މެސީ މި ލަނޑު ކާމިޔާބުކުރީ ރެއާލްގެ ޕެނަލްޓީ އޭރިޔާ ތެރެއިން ބޯޅަ ހޯދައިގެން ރެއާލްގެ ކުޅުންތެރިން ކައިރިން ނައްޓާލުމަށްފަހު ޕެނަލްޓީ އޭރިޔާ ތެރެއަށް ވަދެއެވެ.

ފުރަތަމަ ހާފް 1-1 ގެ ނަތީޖާއިން ދެޓީމު އެއްވަރުވެގެން ނިމިފައިވާއިރު، ބާސާއިން ވަނީ މި ހާފްގައި މޮޅު ކުޅުމެއް ދައްކާފައެވެ.

ދެވަނަ ހާފް ފެށިގެންވެސް ބާސާގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، ލަނޑު ޖެހުމަށް އެޓީމުން ވަނީ ހުސް ގިނަ ފުރުސަތުތައް ބޭކާރުކޮށްލާފައެވެ. އެގޮތުން ލުއިސް ސުއަރޭޒް އަށް ލިބުނު ފުރުސަތުތައް ހިމެނެއެވެ.

ދެވަނަ ހާފްގައި ރެއާލްގެ ކްރިސްޓިއާނޯ ރޮނާލްޑޯ އަށްވެސް ވަނީ ލީޑު އަނބުރާ ހޯދަން ފުރުސަތުތަކެއް ލިބި ބޭކާރުވެފައެވެ. މެޗުގައި ބާސާ އިން ފުރަތަމަ ފަހަރަށް ލީޑު ނެގީ 73 ވަނަ މިނެޓުގައި ޕެނަލްޓީ އޭރިޔާ ބޭރުން ކުރިޔަށް ފޮނުވާލި ބާރު ހަމަލާ ގޯލާ އަމާޒުކޮށްގެން އިވާން ރަކިޓިޗް ކާމިޔާބުކުރި ލަނޑުންނެވެ.

މި ލަނޑާއެކު ރެއާލް އަށް ހުރަސްތަކާ ކުރިމަތިވިއިރު، އެޓީމަށް އިތުރު ހުރަސްތަކާ ކުރިމަތިވީ އެޓީމުގެ ކެޕްޓަން ސާޖިއޯ ރާމޮސް އަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. ރާމޮސް އަށް ރަތް ކާޑު ދެއްކީ މެސީ އަށް ކުރި ނުރައްކާތެރި ފައުލަކާ ގުޅިގެންނެވެ.

އެހެންނަމަވެސް މި ހުރަސްތަކާއެކުވެސް ރެއާލް އިން ނަތީޖާ ހަމަހަމަކުރުމަށް ބުރަ މަސައްކަތްކުރި އެވެ. އޭގެ ނަތީޖާއަކަށްވެގެންދިޔައީ ބަދަލު ކުޅުންތެރިޔެއްގެ ގޮތުގައި ކުޅެން އެރި ހަމޭސް ރޮޑްރިގޭޒް ކާމިޔާބުކުރި ލަނޑުންނެވެ. މާސެލޯ ނަގައިދިން ހުރަސް އެއްފަހަރުން ގޯލަށް ފޮނުވާލައިގެން ހަމޭސް ނަތީޖާ ހަމަހަމަކުރީ 86 ވަނަ މިނެޓުގައެވެ.

އެހެންނަމަވެސް ރެއާލްގެ ހިތް ފުނޑުފުނޑުކޮށްލީ މެޗުގެ އިތުރުވަގުތުގެ ތެރޭގައި ޖޯޑީ އަލްބާގެ އެހީތެރިކަމާއެކު މެސީ ކާމިޔާބުކުރި ލަނޑުންނެވެ. މި ލަނޑަކީ މުޅި ކެރިޔަރު ބާސާގައި ހޭދަކުރަމުން އަންނަ މެސީ އެޓީމަށް ކާމިޔާބުކޮށްދިން 500 ވަނަ ލަނޑެވެ.

މި ނަތީޖާއާއެކު ބާސާ އަދި ރެއާލް 75 ޕޮއިންޓް 75 ޕޮއިންޓުން ޕޮއިންޓް ތާވަލުގައި ހަމަހަމަވެފައިވާއިރު، ލަނޑުގެ ތަފާތުން އެއްވަނަ ލިބެނީ ބާސާއަށެވެ. ބާސާ ލީގުގައި 33 މެޗު ކުޅެފައިވާއިރު، ރެއާލް ވަނީ 32 މެޗު ކުޅެފައެވެ. އެގޮތުން ރެއާލް އަށް އަދި ބާކީ އެއް މެޗު އެބައޮތެވެ.