ޔުއެފާ ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި އިންޓަރ މިލާނާ ދެކޮޅަށް ނިކުންނައިރު، ބާރސެލޯނާގެ ކުޅުންތެރިންނަށް އޮތީ ފުރިހަމަ އިތުބާރު ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ.
ބާރސެލޯނާގެ އަމިއްލަ ދަނޑުގައި މިދިޔަ ހަފުތާގައި ކުޅުނު ސެމީ ފައިނަލްގެ ފުރަތަމަ ލެގު ނިމުނީ 3-3 އިން އެއްވަރު ވެގެންނެވެ. އެހެންކަމުން، މުބާރާތުގެ ފައިނަލްގެ ޖާގަ ލިބޭނީ ދެ ވަނަ ލެގުން މޮޅުވާ ޓީމަކަށެވެ.
އިންޓަރ މިލާންގެ އަމިއްލަ ދަނޑުގައި ކުޅޭ ދެ ވަނަ ލެގުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، ބާރސެލޯނާގެ ޒުވާން ކުޅުންތެރިންނަށް ޕްރެޝަރެއް އޮންނާނެ ކަމަށް އޭނާ ޤަބޫލު ނުކުރާ ކަމަށެވެ.
ޚާއްސަކޮށް ބާރސެލޯނާ އިން މި ސީޒަން ފެށިއިރު، އެ ޓީމަށް ކާމިޔާބު ކުރެވޭނެ ކަންކަން ނޭނގޭ ކަމަށް ފްލިކް ބުންޏެވެ. މިހާތަނަށް އައި އިރު ބާރސެލޯނާ އަށް ދެ ތަށި ކާމިޔާބު ކުރެވިފައިވާ ކަމަށާއި، ދެން ކުރިއަށް އޮތީ މުހިންމު ހަފުތާ ތަކެއް ކަމަށް އޭނާ ވަނީ ބުނެފަ އެވެ.
އިންޓަރ މިލާނާ ދެކޮޅަށް ކުޅޭ ދެ ވަނަ ލެގުގައި ބާރސެލޯނާގެ ކުޅުންތެރިންގެ ފަރާތުން އޭނާ ބޭނުން ވަނީ، މިހާރު ދައްކަމުން އަންނަ ކުޅުން އެގޮތުގައި ދެއްކުން ކަމަށް ވެސް ފްލިކް ވަނީ ބުނެފަ އެވެ. ޚާއްސަކޮށް ޓީމުގެ ސަޕޯޓަރުންނަށް އުފާވެރިކަން ލިބޭނެ ފަދަ ކުޅުމެއް ދައްކައި، ޓީމު ކުރިއަށް ގެންދިޔުމަށް އެދޭ ކަމަށް ވެސް ފްލިކް ބުންޏެވެ.
އިތުރަށް ވާހަކަ ދައްކަމުން ފްލިކް ބުނީ އަނިޔާ އިން އެނބުރި އައިސް، އިންޓަރ މިލާނާ ދެކޮޅަށް ކުޅޭ މެޗުގެ ބެންޗުގައި ރޮބާޓް ލެވަންޑޯސްކީ ހިމެނޭ ކަމަށެވެ. މެޗުގެ ކުރިން ބާސެލޯނާ އިން ކުރިއަށް ގެންދިޔަ ފަރިތަކުރުމާ މެދު ވެސް ހިތްހަމަ ޖެހޭ ކަމަށާއި، ޓީމު އޮތް ޙާލަތާއި ކަންކަމަށް ބަލާއިރު، ބާސެލޯނާ އަށް ނަތީޖާ ނެރެވޭނެ ކަމުގެ ޔަގީންކަން އޮތް ކަމަށް ވެސް ފްލިކް ވަނީ ބުނެފަ އެވެ.
އިންޓަރ މިލާންގެ ދަނޑުގައި ބާސެލޯނާ އިން އެ ޓީމާ ދެކޮޅަށް ނިކުންނާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.