"ބޮޒެން ސްޕްރިން - އިންޓަނޭޝަނަލް ސްޕްރިން ޓޯނަމަންޓް އޮފް ބޮލްޒާނޯ 2025" ގައި ވާދަކޮށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) ދެ މެޑަލް ހޯދައިފި އެވެ.

އިޓަލީގެ ބޮލްޒާނޯ ގައި މި މުބާރާތް ކުރިއަށް ގެންގޮސްފައި ވަނީ މި މަހުގެ 25 ވަނަ ދުވަހުން ފެށިގެން، 27 ވަނަ ދުވަހުގެ ނިޔަލަށެވެ. ބެޑްމިންޓަން ޔޫރަޕު ކަލަންޑަރުގައި ހިމެނޭ މި މުބާރާތުގައި ވަނީ 20 ޤައުމަކުން 330 ކުޅުންތެރިން ވާދަކޮށްފަ އެވެ.

މުބާރާތުގައި ވާދަކޮށް ލައިބާ މެޑަލް ހޯދާފައި ވަނީ ޑަބަލްސް އަދި މިކްސް ޑަބަލްސް ކެޓަގަރީންނެވެ. ދެ އިވެންޓުގައި ވެސް ލައިބާ ވަނީ ލޯ މެޑަލް ހޯދައިފަ އެވެ.

ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ ޖަރުމަނުގެ މޭރީ އެވެ. މި އިވެންޓުގެ ކުއާޓާ ފައިނަލް ކާމިޔާބުކޮށް ލައިބާ އަދި މޭރީގެ ޕެއާ އިން ސެމީ ފައިނަލްގެ ފުރުސަތު ހޯދި އެވެ. ނަމަވެސް، ވާދަވެރި ކުޅުމަކަށްފަހު ސެމީ ފައިނަލްގައި ވަނީ ނާކާމިޔާބުވެފަ އެވެ.

މިކްސް ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ ސްލޮވޭނިއާގެ މަޓިޗް އެވެ. މި އިވެންޓުގައި ލައިބާ އަދި މަޓިޗްގެ ޕެއާ އިން ވަނީ ސެމީ ފައިނަލްގައި ވާދަކޮށް ނާކާމިޔާބުވެފަ އެވެ.

މި ދެ އިވެންޓުގެ އިތުރުން، ލައިބާ ވަނީ މުބާރާތުގެ ސިންގަލްސް އިވެންޓުގައި ވެސް ވާދަކޮށްފަ އެވެ. ސިންގަލްސް އިވެންޓުގެ ކުއާޓާ ފައިނަލްގައި ލައިބާ ވަނީ ވާދަކޮށްފަ އެވެ.

ޒުވާން ބެޑްމިންޓަން ކުޅުންތެރިޔާ އަންނަނީ ބައިނަލްއަޤުވާމީ އެކި އެކި މުބާރާތްތަކުގައި ވާދަކޮށް، ގިނަ ކާމިޔާބީތަކެއް ހޯދަމުންނެވެ.