ގައުމީ ޖާޒީގައި ރާއްޖޭން ބޭރުގެ މުބާރާތްތަކުގައި ވާދަކުރާއިރު ރާއްޖެއަށް ރީތި ނަމެއް ހޯދައިދިނުމަށް ގައުމީ ޒުވާން ނެޓްބޯޅަ ޓީމުގެ ކުޅުންތެރިންގެ ކިބައިން ކުޅިވަރާބެހޭ ވަޒީރު އިރުތިޝާމް އާދަމް އެދިވަޑައިގަންނަވައިފިއެވެ.
އަންނަ މަހުގެ 6 ވަނަ ދުވަހު ފެށުމަށް ހަމަޖެހިފައިވާ އޭޝިއަން ޔޫތު ނެޓްބޯޅަ ޗެމްޕިއަންޝިޕުގައި ވާދަކުރާ ދިވެހިރާއްޖޭގެ 21 އަހަރުން ދަށުގެ ނެޓްބޯޅަ ޓީމުގެ ކުޅުންތެރިންނާއި އޮފިޝަލުންނަށް ޖާޒީ ހަވާލުކުރުމަށް ޔޫތު މިނިސްޓްރީގައި އާދިއްތަ ދުވަހު ބޭއްވި ކުރު ހަފްލާއެއްގައި ވާހަކަ ދައްކަވަމުން މިނިސްޓަރު އިރުތިޝާމް ވިދާޅުވީ ޒުވާން ނެޓްބޯޅަ ޓީމެއް އެކުލަވާލެވި ބޭރުގެ މުބާރާތެއްގައި ވާދަކުރުމަކީ ނެޓްބޯޅަ ކުރިއަށްޖެހިފައިވާ މިންވަރު އެނގިގެންދާ ކަމެއް ކަމަށެވެ.
މިނިސްޓަރު ވިދާޅުވީ މީގެ ކުރިން ރާއްޖެއިން އެކި މުބާރާތްތަކުގައި ވާދަކުރަނީ ތަޖުރިބާ ހޯދުމަށް ކަމަށާއި އެހެން ނަމަވެސް މިހާރު ރާއްޖެއަކީ ތަޖުރިބާ ހޯދުމަށް މުބާރާތްތަކުގައި ވާދަކުރާ ގައުމެއް ނޫން ކަމަށެވެ. އެގޮތުން ރާއްޖޭގެ ކުޅުންތެރިން ވާންޖެހޭނީ މުބާރާތުން ކާމިޔާބީ ހާސިލްކުރާ ބަޔަކަށް ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ މާލޭގެ އިތުރުން އަތޮޅު ތެރޭގައި ވެސް ޒުވާން ނެޓްބޯޅަ ޓީމުތައް އުފެދި ޔޫތު ޑިވޮލޮޕްމެންޓް ޕްރޮގްރާމް (ވައިޑީޕީ) އަށް ވެސް އިސްކަމެއް ދިނުމަކީ މުހިންމު ކަމެއް ކަމަށެވެ. އެގޮތުން އަތޮލޫ ތެރޭގައި ވައިޑީޕީ ހަރަކާތްތައް ފުޅާ ދާއިރާއެއްގައި ހިންގުމަށް ނެޓްބޯލް އެސޯސިއޭޝަންގެ އިސްވެރިންނަށް މިނިސްޓަރު ވަނީ ގޮވާލައްވާފައެވެ.
މި މުބާރާތުގައި ވާދަކުރާ ޓީމުގެ އިތުރުން ރާއްޖެއިން މިފަހަރު ދެ އަމްޕަޔަރަކުވެސް ކޮރެއާއަށް ދިއުމަށް ވަނީ ހަމަޖެހިފައެވެ. އެގޮތުން މި މުބާރާތުގައި ރާއްޖެއިން ބައިވެރިވާ ދެ އަމްޕަޔަރުންގެ ނަން ފާހަގަކޮށް މިނިސްޓަރު އިރުތިޝާމް ވަނީ އެފަރާތްތަކަށް ލިބުނު ފުރުސަތާއެކު ރާއްޖޭގެ ނެޓްބޯޅައަށް ކުރިއެރުން އަންނަކަން ފާހަގަކޮށްފައެވެ.
