ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕްގައި ވާދަކުރި ރާއްޖޭގެ ޒުވާން ޓޭބަލް ޓެނިސް ޓީމުން ތިން ލޯ މެޑަލް ހޯދައިފިއެވެ.

ސާކް ސަރަހައްދުން 6 ގައުމެއް ވާދަކުރި މި މުބާރާތުގައި ރާއްޖޭގެ އަންހެން ކެޑޭޓް ޓީމް ވަނީ ޕާކިސްތާން 3-0 އިން ބަލިކޮށް ލޯ މެޑަލް ހޯދާފައެވެ. އަދި ޓީމް އިވެންޓްގައިވެސް ރާއްޖޭގެ އަންހެން ޓީމް ވަނީ ޕާކިސްތާން 3-0 އިން ބަލިކޮށް ލޯ މެޑަލް ހޯދާފައެވެ.

ނަމަވެސް ފިރިހެން ކެޑޭޓް ޓީމް ވަނީ ޓީމް އިވެންޓް މެޗުތަކުން ބަލިވެފައެވެ. މީގެ އިތުރުން ޖޫނިއާ އަންހެން ޑަބަލްސް އިވެންޓްގައި ވާދަކޮށް އައިޝަތު ރަފާ ނާޒިމާއި ލައިޝާ ފަތުހުﷲ އިސްމާއީލް ވަނީ ލޯ މެޑަލް ހޯދާފައެވެ.

ޖޫނިއާ އަންހެން ބައިގަ ވާދަކޮށް ރާއްޖޭގެ އައިޝަތު ރަފާ ނާޒިމް ސްރީލަންކާ އަދި އިންޑިޔާ ކުޅުންތެރިޔާ އަތުން ބަލިވި ނަމަވެސް ޕާކިސްތާން ކުޅުންތެރިޔާ ބަލިކޮށް، އޭނާ ވަނީ ކުއާޓާ ފައިނަލަށް ދަތުރުކޮށްފައެވެ. މަލީޝާވެސް ވަނީ ޕާކިސްތާން ކުޅުންތެރިޔާ ބަލިކޮށް ކުއާޓާ ފައިނަލަށް ދަތުރުކޮށްފައެވެ.

މިއަހަރުގެ މުބާރާތުގެ ޖޫނިއާ ކެޓަގަރީގައި ވާދަކޮށްފައި ވަނީ 18 އަހަރުން ދަށުގެ ކުޅުންތެރިން ނެވެ. އަދި ކެޑޭޓް ކެޓަގަރީގައި ވާދަކުރީ 15 އަހަރުން ދަށުގެ ކުޅުންތެރިން ނެވެ.

މި މުބާރާތުގައި ރާއްޖޭގެ ފަރާތުން ދެ ކެޓަގަރީގައިވެސް ވާދަކުރި އެވެ. އެގޮތުން ރާއްޖޭގެ އަންހެން ޓީމުގައި ހިމެނެނީ އައިޝަތު ރަފާ ނާޒިމާއި، ލައިޝާ ފަތުޙުﷲ އިސްމާއީލާއި، އާމިނަތު މަލީޝާ މުއާޒާއި، ފާތުމަތު މަލޫޝާ މުއާޒު އަދި ފާތުމަތު ޝަދާ މަމްދޫހު އެވެ.

އަދި ފިރިހެން ޓީމުގައި ހިމެނެނީ މުޙައްމަދު ޝައްފާން އިސްމާޢީލާއި، ކުމާލް ޝަނޫނާއި، މުޙައްމަދު ތާބިން ސުޖާއު އާއި، އިބްރާހިމް އައުޒަމް އަޒީމް އެވެ.