ސީރިޔާގެ ރައްގާގައި ކުރެވެމުންދާ ހަނގުރާމައަށް މަޑުޖެހުމެއް ގެނައުމަށް އދ އިން ގޮވާލައިފި

އިސްލާމިކް ސްޓޭޓް (އައިއެސް) ގެ ކޮންޓްރޯލްގެ ދަށުގައިވާ ސީރިޔާ ރައްގާ ސިޓީގައި ކުރެވެމުންދާ ހަނގުރާމައަށް ކުޑަ މަޑުޖެހުމެއް ގެނައުމަށް އދ އިން ގޮވާލައިފިއެވެ.

އދ އިން ބުނީ ރައްގާ ގައި ކުރިއަށްދާ ހަނގުރާމައަށް މަޑުޖެހުމެއް ގެނައުމަށް ގޮވާލީ ހަނގުރާމައިގެ ސަބަބުން ތާށިވެފައި ތިބި އާންމުން ރައްކާތެރި ހިސާބުތަކަށް ދިއުމަށް ފުރުސަތު ދިނުމަށް ކަމަށެވެ.

އައިއެސްއާ ދެކޮޅަށް "ދަ ސީިރިއަން ޑިމޮކްރެޓިކް ފޯސަސް (އެސްޑީއެފް)"، ކުރުދީ ހަނގުރާމަވެރިން އަދި އަރަބި ހަނގުރާމަވެރިން ދަނީ ރައްގާގައި ހަނގުރާމަ ކުރަމުންނެވެ. ގުޅިފައިވާ ކޯލިޝަނުން ބުނާގޮތުން ރައްގާގެ 60 އިން ސައްތަ ކޮންޓްރޯލް އެ ކޯލިޝަނުން ވަނީ ހޯދާފައެވެ.

އދ އިން އަންދާޒާ ކުރާގޮތުން ރައްގާގެ އައިސިސް ކޮންޓްރޯލް އޮންނަ ސަރަހައްދުތަކުގައި 20،000 އާންމުން ވަނީ ތާށިވެފައެވެ.

2014ވަނަ އަހަރުންފެށިގެން ރައްގާ އޮންނަނީ އިސްލާމިކް ސްޓޭޓް ގެ އަތްދަށުގައެވެ.