ހަނގުރާމަ ހުއްޓާލުމުގެ އެއްބަސްވުމުގެ ދަށުން ޣައްޒާގައި ދޫކޮށްލި އިސްރާއީލުގެ ޖަލުތަކުގައި ބަންދުކޮށްފައި ތިބި ފަލަސްތީނުގެ އެތައް ސަތޭކަ ބައެއްގެ ފަރާތުން ބަނޑުހައި ހޫނުކަމާއި އަނިޔާގެ ނިޝާންތައް ފެންނަން ހުރިކަމަށް އަލްޖަޒީރާގައި ބުނެފިއެވެ.

ފަލަސްތީނުގެ 600 އަށް ވުރެ ގިނަ މީހުން މިދިޔަ ބުރާސްފަތި ދުވަހު ދޫކޮށްލާފައިވާއިރު، ހަމާސް އިން ވަނީ ހައްޔަރުކުރި ހަތަރު މީހެއްގެ ހަށިގަނޑު ހުރި ސަންދޯއްތައް ހަމާސްއާ ހަވާލުކުރި ކަމަށް ބުނެފަ އެވެ. ނަމަވެސް އިސްރާއީލުން ވަނީ ފަލަސްތީނުގެ ދެ އަންހެނަކާއި 44 ކުޑަކުދިން ދޫކޮށްލުން ފަސްކޮށްފައެވެ.

މިއީ ހަމާސް އާއި އިސްރާއީލާ ދެމެދު ހަދާފައިވާ ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ ފިޔަވަހީގެ ދަށުން އެންމެ ފަހުން ޝެޑިއުލްކުރި ރަހީނުން ބަދަލުކުރުމުގެ މަރުހަލާއެވެ.

ފަލަސްތީނުގެ އެތައް ބަޔަކު އެމްބިއުލާންސްގައި ޣައްޒާގެ ދެކުނުގައި ހުންނަ ޚާން ޔުނިސްގައި ހުންނަ ޔޫރަޕިއަން ހޮސްޕިޓަލަށް ގެންގޮސްފައިވަނީ އެ މީހުންނަށް ލިބިފައިވާ ޒަހަމްތަކުގެ ސީރިއަސްކަމުންނެވެ. ފަލަސްތީނުގެ ގިނަ ބަޔަކު މިސްރާއި ހިފާފައިވާ ހުޅަނގު އައްސޭރިއަށް ވެސް ފޮނުވި އެވެ.

ޣައްޒާ ސިޓީއަށް ދޫކޮށްލި ފަލަސްތީނުގެ ރައްޔިތެއް ކަމަށްވާ އަލާ އަލް ބަޔާރީ އަލްޖަޒީރާއަށް މައުލޫމާތު ދެމުން ބުނީ އިޒްރޭލުގެ ޖަލުގައި ހުއްޓާ އޭނާއަށް ފެނުނީ "އަނިޔާއާއި މާރާމާރީ އާއި ނިކަމެތިކަން" ކަމަށެވެ. އޭނާ ކިޔައިދިން ގޮތުގައި ޖަލުގައި އެމީހުން ތިބެނީ ބަރަހަނާކޮށް ބައިތިއްބާފައެވެ. އަދި ގަޔަށް ފެންޖެހުމަށްފަހު ކަރަންޓު ޖައްސާ އަނިޔާކުރާ ކަމަށް ވެސް އޭނާ ކިޔައިދިނެވެ.

ރާމަﷲ އަށް ދޫކޮށްލި ފަލަސްތީނުގެ ގައިދީއެއް ކަމަށްވާ ޔަހްޔާ ޝްރީދާ ވަނީ އިސްރާއީލުގެ ޖަލުތަކަކީ ގަބުރުސްތާނުތަކެއްގެ ގޮތުގައި ސިފަކޮށްފަ އެވެ. އޭނާ ބުނީ ތަހައްމައްލުކުރަން ޖެހުނު ހާލަތުން ސަލާމަތްވެއްޖެއެވެ. އިޒްރޭލުގެ ޖަލުތަކުން ސަލާމަތްވުން އޭނާ ސިފަކުރީ ވަޅުލާފައި އޮއްވާ ސަލާމަތްވުން ފަދަގޮތަކަށެވެ. އޭނާ ބުނީ މި ހާލަތަކީ ބަޔާންކުރެވޭ ފަދަ ހާލަތެއް ނޫން ކަމަށާއި، ދިމާވި ކަންތައްތައް ކިޔައިދިނުމަކީ އުނދަގޫ ކަމެއް ކަމަށެވެ.

ޣައްޒާއިން ރިޕޯޓްކުރާ އަލްޖަޒީރާގެ ތާރިގު އަބޫ އަޒްޒޫމް ބުނީ އިޒްރޭލުގެ ޖަލުތަކުން ދޫކޮށްލި ފަލަސްތީނުގެ ބައެއް މީހުން އެނބުރި އައި އިރު އަތްތައް ކަނޑާލާފައިވާ ކަމަށާއި އަނެއް ބަޔަކަށް ބޮޑެތި އަނިޔާތައް ދީފައިވާ ކަމުގެ ނިޝާންތައް ފެންނަން ހުރި ކަމަށެވެ. އަދި ދޫކޮށްލި މީހުންގެ ކިޔައިދިން ގޮތުގައި އިޒްރޭލުގެ ސިފައިންގެ ފަރާތުން ލާއިންސާނީ އަނިޔާތައް ލިބުނު ކަމަށެވެ.

ޤުދުސް ނިއުސް ނެޓްވޯކުން އޮންލައިންކޮށް ހިއްސާކޮށްފައިވާ ފުޓޭޖްތަކުން ފެންނަގޮތުގައި މިނިވަންވި ފަލަސްތީނުގެ ރައްޔިތުންގެ ފަރާތުން ފެނިގެން ދިޔައީ މިނިވަންކަން އިހުސާސުކުރެވި ރޮވުނުތަން ކަމަށެވެ. އެއް ކްލިޕުން ފެންނަގޮތުގައި އާއިލާގެ މެންބަރަކު އޭނާގެ ދޫކޮށްލާފައިވާ ތިމާގެ މީހާގެ ހާލު ފެނި އައިސްފައިވާ ބަދަލު ފެނި ހިތާމަކުރަމުންދިޔަ ތަނެވެ.

އިޒްރާލުގެ އިސްތިއުމާރީ ސިފައިންގެ އަތްދަށުން މިނިވަންވެ ހުޅަނގު އައްސޭރީގެ ޖެނިން ސިޓީއަށް ފޮނުވާލެވުނު ލޫއޭ ސާބްނެހް އެތައް އަހަރެއް ވަންދެން ޖަލުގައި ބެހެއްޓުމަށްފަހު 7 އަހަރުގެ ތެރޭގައި ފުރަތަމަ ފަހަރަށް އޭނާގެ ދަރިފުޅު ޖަބަލްއާ ބައްދަލުކުރި މަންޒަރު ފެނެ އެވެ.

އަސީރުން ބަދަލުކުރުމުގެ އެއްބަސްވުމުގެ ދަށުން މީގެ ކުރިން ހަމާސް އިން ރެޑްކްރޮސް މެދުވެރިކޮށް އިސްރާއީލާ ހަވާލުކުރި ހަތަރު މީހެއްގެ ހަށިގަނޑު މިހާރު ވަނީ ދެނެގަނެވިފައެވެ. މިކަމައި ގުޅޭގޮތުން އިޒްރޭލުގެ ރައީސް އައިޒަކް ހަރްޒޮގް ވިދާޅުވީ އެ މީހުންގެ ހަށިގަނޑުތަކަކީ އޮހާދު ޔަހަލޯމީ، ޓްސާޗީ އިދާން، އިޓްޒިކް އެލްގަރާޓް އަދި ޝްލޯމޯ މަންޓްޒޫރު ކަމަށެވެ.

ފަލަސްތީނުގެ ގްރޫޕުން ނެރުނު ބަޔާނެއްގައި ބުނެފައިވަނީ ހަނގުރާމަ ހުއްޓާލުމުގެ އެއްބަސްވުމަށް ފުރިހަމައަށް އެއްބާރުލުން ދޭނެ ކަމަށާއި ދެވަނަ ފިޔަވަހީގެ މަޝްވަރާތަކަށް ވަނުމަށް ތައްޔާރަށް އޮތް ކަމަށެވެ.

އަދި ގައިދީން މިނިވަންކުރުމަށް ހުރަސް އެޅުމަށް އިޒްރޭލުގެ ކަމާބެހޭ ފަރާތްތަކުން ކުރަމުންދާ މަސައްކަތް "ނާކާމިޔާބު" ވެފައިވާ ކަމަށާއި އޭގެ މާނައަކީ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ ފިޔަވަހީގެ މަޝްވަރާތައް ފެށުން ނޫން ގޮތެއް ނޯންނާނެ ކަމަށެވެ.

މި ގްރޫޕުން ވަނީ ގައުމުތަކުގެ ދެފުއްދެގޮތް ހުއްޓާލާ ފަލަސްތީނުގެ ރައްޔިތުންގެ ހާލުގެ ވާހަކަ ނުދައްކާ އިޒްރޭލުގެ ރަހީނުންނަށް ލިބިފައިވާ އަނިޔާތަކުގެ ވާހަކަތައް އެކަނި ނުދެއްކުމަށް ގޮވާލާފައެވެ.