74 މެންބަރަކު ވީއައިޕީ ހިދުމަތް ބޭނުންކުރެއްވި، 7 ލައްކައަށްވުރެ ގިނަ ރުފިޔާ މިދިޔަ އަހަރު ހަރަދުވި
74 މެންބަރުން މިދިޔަ އަހަރު އެއަރޕޯޓުން ވީއައިޕީ ލައުންޖުން ހިދުމަތް ހޯއްދެވި އިރު ވަކިވަކި މެންބަރުންގެ ތަފްސީލެއް ނެތް
20 ވަނަ މަޖިލީހުގައި 74 މެންބަރަކު ވީއައިޕީގެ ހިދުމަތް އަދި 88 މެންބަރަކު ޑިޕްލޮމެޓިކް ޕާސްޕޯޓް ނަންގަވާފައިވޭ
ރައްޔިތުންގެ މަޖިލީހުގެ މެންބަރުންގެ ތެރެއިން މިދިޔަ އަހަރު 74 މެންބަރަކު އެއަރޕޯޓުގެ ވީއައިޕީގެ ހިދުމަތް ބޭނުންކުރެއްވި ކަމަށާއި، އެކަމަށް 7 ލައްކައަށްވުރެ ގިނަ ރުފިޔާ ހަރަދުކޮށްފައިވާ ކަމަށް ރައްޔިތުންގެ މަޖިލީހުން ބުނެފިއެވެ.
މަޖިލީހުން މިފަދައިން ބުނެފައިވަނީ މައުލުމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އާންމު މީހަކު ހޯދަން އެދުނު މައްސަލައިގެ ތަފްސީލު ހާމަކުރަމުންނެވެ.
އެގޮތުން 28 މެއި 2024 ން 15 ޑިސެމްބަރު 2024 ވަނަ ދުވަހާ ހަމައަށް 20 ވަނަ ރައްޔިތުންގެ މަޖިލީހުގެ ފުރަތަމަ ދައުރު ނިމުނު އިރު، ވީއައިޕީ ލައުންޖުން 74 މެންބަރަކު ވަނީ ހިދުމަތް ހޯއްދަވާފައިވާ ކަމުގައި އެވެ. މަޖިލީހުގައި ތިއްބަވަނީ 93 މެންބަރުންނެވެ.
މަޖިލީހުން ދީފައިވާ މައުލޫމާތު ދައްކާ ގޮތުން އެއަރޕޯޓުގެ ވީއައިޕީ ހިދުމަތަށް ހަރަދުވެފައި ވަނީ ޖުމްލަ 729،219.15 ރުފިޔާއެވެ. ނަމަވެސް ވަކިވަކި މެންބަރުން ވީއައިޕީ ލައުންޖް ބޭނުންކުރެއްވީ ކިތައް ފަހަރުކަމެއް މަޖިލިހުގެ އިދާރާއިން ދީފައިވާ މައުލޫމާތުގައި ނުހިމެނެއެވެ.
މީގެ އިތުރުން 20 ވަނަ ރައްޔިތުންގެ މަޖިލީހުގެ ފުރަތަމަ ދައުރު ނިމުނު އިރު ޑިޕްލޮމެޓިކް ޕާސްޕޯޓް 88 މެންބަރަކު ވަނީ ނަންގަވާފައެވެ.
ރައްޔިތުންގެ މަޖިލީހުގެ މެންބަރުންގެ މުސާރަ ބޮޑު މައްސަލައާއި ދައުލަތުން އެތަކެއް އިނާޔަތް ތަކާއި ހަރަދުތައް މެންބަރުންނަށް ކުރަމުންދާތި އާންމުންގެ ފާޑުކިއުން ވަނި އަމާޒުވެފައެވެ.
ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކޮށް އިނާޔަތްތައް ކުޑަކުރަން ގޮވާލާ ޕެޓިޝަނެއްގައި ސޮއިކުރުމުގެ މަސައްކަތް ވެސް ވަނީ ފަށާފައެވެ. އެ ޕެޓިޝަންގައި ބުނެފައި ވަނީ ރާއްޖޭގެ އިޤްތިޞާދަށް މާލީ ބުރަ ބޮޑު ވެފައި ވާއިރު، ރާއްޖޭގެ ކަންކަމާއި މެދު ކަންބޮޑުވާ ރައްޔިތުންގެ ހައިސިއްޔަތުން، ރައްޔިތުންގެ މަޖިލީހުގެ މެންބަރުންނަށް ލިބޭ ބޮޑު މުސާރަ އާއި، ކޮމިޓީ އެލަވަންސް އާއި، ޕްރީމިއަމް ހެލްތު އިންޝުއަރެންސްގެ އިނާޔަތްތަކާއި މެދު ކަންބޮޑުވާ ކަމަށެވެ.
މަޖިލީހުގެ މެންބަރަކަށް މުސާރައާއި ކޮމިޓީ އެލަވަންސާއެކު 80،000 ރުފިޔާ ލިބޭ އިރު، އިތުރު އިނާޔާތްތަކާއި ވަކި އިންޝިއުރަންސެއް ވެސް ހަމަޖައްސާފައި އޮވެއެވެ.
