ސަރުކާރަށް މަޖިލިސް މެޖޯރިޓީދީގެން އެއްވެސްތަނެއް މިނިވަނެއް ނުކުރެވޭނެ: އަލީ ހުސެއިން
މަޖިލީހުގެ މެމްބަރުކަމުގައި ރައީސުލްޖުމްހޫރިއްޔާއާ ސުވާލެއް ކޮށްލާނެ ފުރުސަތެއް ނުލިބޭ
ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން
އިންތިޚާބު ކުރެވޭ ސަރުކާރަކަށް ޖެހިގެން އަންނަ އިންތިޚާބުގައި ރައްޔިތުންގެ މަޖިލިސް މެޖޯރިޓީދީގެން ދައުލަތުގެ އެއްވެސް މުޢައްސަސާއެއް މިނިވަން ނުކުރެވޭނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސެއިން ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުންނެވެ.
އަލީ ވިދާޅުވީ ރިޔާސީ އިންތިޚާބަށް ފަހު ޖެހިގެން އަންނަނީ ރައްޔިތުންގެ މަޖިލީހުގެ އިންތިޚާބު ކަމަށެވެ. ރިޔާސީ އިންތިޚާބު ކާމިޔާބުކުރާ ބަޔަކަށް މަޖިލިސް މެޖޯރިޓީ ކޮންމެހެން ބޭނުންކަމަށް އިންތިޚާބުކުރެވޭ ރައީސުލްޖުމްހޫރިއްޔާ ވެސް ރައްޔިތުން ކައިރީ ވިދާޅުވާ މަންޒަރު ފެންނަކަމަށް އަލީ ވިދާޅުވިއެވެ. މިހާރު މިފެންނަ މައްސަލަތައް މިފެންމަތިވަނީ ޖެހިޖެހިގެން މިދެއިންތިޚާބު ބޭއްވުމުންތޯ ދިރާސާކުރަންޖެހޭ ކަމަށް ވިދާޅުވިއެވެ. އަދި މިނޫން ހައްލަކީ ކޮބައިތޯ ބަލަންޖެހޭ ކަމަށް އޭނާ ވިދާޅުވިއެވެ.
އަލީ ވިދާޅުވީ މިހާރު ވެސް ޤާނޫނީ އިމުގެ ތެރެއިން ރައީސުލްޖުމްހޫރިއްޔާ މަޖިލީހަށް ހާޒިރުކުރެވި ސުވާލުކުރުމަށް ހުރަހެއް ނެތް ކަމަށެވެ. އެކަން އެގޮތަށް ނުކޮށް ސަރުކާރު ވެސް ރައީސުލްޖުމްހޫރިއްޔާ ވެސް ޒިންމާދާރު ކުރެވޭނެ ފުރުސަތު ނެތް ކަމަށް ވިދާޅުވިއެވެ. 5 އަހަރު ދުވަހަށް ރައީސުލްޖުމްހޫރިއްޔާއެއް އިންތިޚާބުކުރުމުން އެމުއްދަތުގައި ބޭނުންފުޅު ކޮންމެ ގޮތަކަށް ކަންކަން ކުރައްވާއިރު 5 އަހަރު ފަހުން އަނެއްކާވެސް އިންތިޚާބެއްގައި ވޯޓު ލެވެންދެން ރައްޔިތުން ބަލަހައްޓައިގެން ތިބެންޖެހޭނެ ކަމަށް ޤަބޫލު ނުކުރައްވާ ކަމަށް އޭނާ ވިދާޅުވިއެވެ.
ރައްޔިތުންގެ މަޖިލިސް މިނިވަންތަނެއްގެ ގޮތުގައި އޮވެގެން މެނުވީ ޖުޑިޝަރީވެސް މިނިވަން ނުކުރެވޭނެ ކަމަށް އަލީ ވިދާޅުވިއެވެ. ރައީސުލްޖުމްހޫރިއްޔާއަށް ހިލޭ ތަބަކަކަށްލައިފައި މަޖިލިސް ދިނުމުން އެމަނިކުފާނު ހައްދަވާނެ އެއްޗެއް ހައްދަވަން ޤައުމު ދެވުނީ ކަމަށް އަލީ ވިދާޅުވިއެވެ. އަދި މިހާރު ހިތި ތަޖުރިބާތަކެއް ދިވެހިން ކޮށްފިކަމަށާ މިކަމަކީ ދިވެހިން ވިސްނަންޖެހޭ ކަމެއް ގޮތުގައި އަލީ ފާހަގަ ކުރެއްވިއެވެ.
