ފ.ފީއަލީ ޞިއްޙީ މަރުކަޒުގެ ލެބޯޓްރީގެ ޚިދުމަތް ހުއްޓި، އެ ރަށު ލޭ އަޅާ ކުދިންނަށް ލޭ ނޭޅުމުގެ ކަންބޮޑުވުން ބޮޑުވެއްޖެ އެވެ.

ފީއަލީ ޞިއްޙީ މަރުކަޒުގެ ލެބޯޓްރީގެ ޚިދުމަތް ހުއްޓުނީ، އެ މަރުކަޒުގައި މަސައްކަތް ކުރަމުން އައި ބިދޭސީ ލެބް ޓެކްނީޝަން ވަޒީފާ އިން ވަކިވުމުންނެވެ.

"ރާއްޖެ އެމްވީ" އަށް އެނގިފައިވާ ގޮތުގައި އެ މަރުކަޒުގައި މަސައްކަތް ކުރަމުން އައި ލެބް ޓެކްނީޝަން ވަޒީފާ އިން ވަކިވެފައި ވަނީ ހުސްވި މާރޗު މަހުގެ 31 ވަނަ ދުވަހު އެވެ. އެއީ ވަޒީފާގެ އެއްބަސްވުން އައު ކުރަން އޭނާ ބޭނުން ނުވެ، ވަޒީފާ އިން ވަކިވުމަށް ތިން މަަސް ދުވަހުގެ ނޮޓިސް ދިނުމަށް ފަހު އެވެ.

ނަމަވެސް، އެ މުއްދަތުގައި ވެސް އޭނާގެ ބަދަލަށް އެހެން މީހަކު ހަމަޖައްސައިދީފައި ނުވާކަން ވަނީ އެނގިފަ އެވެ. މީހަކު ހަމަޖައްސައި ދިނުމަށް އެދި ފީއަލީ ޞިއްޙީ މަރުކަޒުން ހެލްތު މިނިސްޓްރީ ގައި ވެސް ވަނީ އެތައް ފަހަރެއްގެ މަތިން އެދިފަ އެވެ. ނަމަވެސް. މީހަކު ލިބެން ނެތް ކަމަށް ބުނެ މިނިސްޓްރީން މިހާތަނަށް މީހަކު ހަމަޖައްސައިދީފައި ނުވެ އެވެ.

ފީއަލީ ޞިއްޙީ މަރުކަޒުގެ އިސް ބޭފުޅަކު ވިދާޅުވި ގޮތުގައި، ލެބް ޓެކްނީޝަނެއް ހޯދުމަށް ކުރި މަސައްކަތުގައި، އެ އަތޮޅުގައި ހުންނަ ފ.އަތޮޅު ހޮސްޕިޓަލް އިން ވެސް މީހަކު ލިބޭ ގޮތެއް ނުވި އެވެ. އަދި މީހަކު ހަމައްޖައްސައި ދެވެން ނެތް ކަމަށް އަތޮޅު ހޮސްޕިޓަލް އިން އަންގާފައިވާ ކަމަށް ވެސް ވިދާޅުވި އެވެ.

އެހެންކަމުން، މިވަގުތު ފީއަލީގައި ތިބި ލޭ އަޅާ ކުދިންނަށް އެ ރަށުން ލޭ އެޅުމުގެ ޚިދުމަތް ވަނީ ހުއްޓިފަ އެވެ. ލޭ އަޅަން ބޭނުންވާ ނަމަ، ދެން ޖެހޭނީ ލޭ އަޅާ ކުއްޖާ އަދި އެ ކުއްޖާގެ ޑޯނަރު އެހެން ރަށަކަށް ގޮސްގެން ލޭ އަޅަން ކަމަށް ވެސް މައުލޫމާތު ދެއްވި ބޭފުޅާ ވިދާޅުވި އެވެ.

މިކަމާ ގުޅިގެން ފީއަލީ ލޭ އަޅާ ކުއްޖެއްގެ ބެލެނިވެރިޔަކު "ރާއްޖެ އެމްވީ" އަށް ބުނީ، އޭނާގެ ދެ ކުދިން ލޭ އަޅަން ޖެހޭ ދުވަހަކީ ހޮނިހިރު ދުވަަސް ކަމަށެވެ. ނަމަވެސް، މިވަަގުތު ރަށުން އެ ޚިދުމަތް ލިބެން ނެތުމުން، އޭނާ ވަނީ ކަންބޮޑުވުން ފާޅު ކޮށްފަ އެވެ.

އެކަމަ ގުޅިގެން ފީއަލީ ޞިއްޙީ މަރުކަޒުގެ ސީނިއާ އެޑްމިނިސްޓްރޭޓަރ، ހެލްތު ސާވިސްގެ މަގާމުގައި ހުންނެވި ބޭފުޅާއާއި އެތައް ފަހަރެއްގެ މަތިން ވާހަކަ ދެއްކި ކަމަށް ވެސް އެ ބެލެނިވެރިޔާ ބުންޏެވެ. ނަމަވެސް އެ ބޭފުޅާގެ ޖަވާބަކީ، "ތިޔަކަމާ ދެން އުޅޭނީ މިނިސްޓްރީން" ކަމަށް އެ ބެލެނިވެރިޔާ ބުންޏެެވެ.

ފީއަލީގައި ތިބި ލޭ އަޅާ ކުދިންނަށް ލޭ އަޅާނެ ގޮތެެއް މިވަގުތު ނެތްއިރު، އެ ރަށަކީ ރާއްޖޭގައި އެންމެ ގިނަ ލޭ އަޅާ ކުދިން ތިބި އެއް ރަށެވެ. އެ ރަށުގައި ލޭ އެޅުމުގެ ޚިދުމަތް ދޭން ފެށި ފަހުން، މިއީ އެ ޚިދުމަތް ހުއްޓުނު ފުރަތަމަ ފަހަރެވެ.