"ޝުކުރިއްޔާ ވިސާކާ މިސް". "ޝުކުރިއްޔާ ރަމީޒް ސަރ". "ކިޑީދައްތައަށް ވަރަށް ބޮޑަށް ޝުކުރިއްޔާ" އަޅުގަނޑަށް ލަވަ ދަސްކޮށްދެއްވި ހުރިހާ ބޭފުޅުންނަށް ވަރަށް ބޮޑަށް ޝުކުރިއްޔާ" މިއީ މީގެ އަހަރުތަކެއް ކުރިން ޓީވީއެމް ސްކޫލް ކުދިންގެ ލަވަމުބާރާތުގެ ނަތީޖާ ފާޅުކުރާ ދުވަހުގެރޭ ސްޓޭޖް މަތިން އެންމެ ގިނައިން އިވޭ އަޑެވެ. ވަނަވަނައަށް ދިޔަ ކުދިން އެކުދިންގެ ޝުއޫރުތައް ފާޅުކޮށްލުމުގެގޮތުން ބުނެ އުޅޭ ގޮތެވެ. އެފަޚުރުވެރި، އެ އުފާވެރި ކާމިޔާބީ ހޯދައިދިނުމުގައި އެހީތެރިވި ފަރާތްތަކުގެ މަތިން ހަނދާންކޮށް ވަކިވަކިން ނަންތައް ކިޔައި ޝުކުރުއަދާކޮށް އުޅޭއުޅުމެވެ.

އޭގެ އަހަރުތަކެއް ފަހުން ހަމަ އެފަދަ ކަމެއް މިފެނުނީ މިދިޔަ އީދުގައެވެ. ފިތުރު އީދުގައެވެ. ސީދާ އެންމެ މަތީންނެވެ. ރައީސުލްޖުމްހޫރިއްޔާއާއި ސަރުކާރުންނެވެ.

އީދަށް މިސަރުކާރުން ތައްޔާރުވަމުން އައީކީ ތިޔަހެނެއް ނޫނެވެ. ހެޔޮވަރުގެ 28 މިލިއަން ރުފިޔާ ހަމައެކަނި ބޮތްކަށް ހުސްކޮށްލިއެވެ. ސަލްޓަންޕާކްތެރެ ކުޅިވަރަށް ޚާއްޞަ ކުރިއެވެ. ޖުމްހޫރީ މައިދާނުގައި ބޮޑު ހަވީރެކެވެ. އިސްލާމީ މަރުކަޒުގެ ބޭރުގައިވެސް މިއުޒިކާއެކު ތަފާތު ހަރަކާތްތަކެވެ.

ދެނެކާ ދެނެއް ނެތެވެ. އީދު ފެށުނީއެވެ. އީދު ދުވަސްކަން އިއުލާންވެސް ކުރުމުގެ ކުރިން ރައީސް މީހާގެ ނަމުގައި އެންމެނަށް ފޮނުވަންފެށި އީދު ތަހުނިޔާގެ މެސެޖަކުންނެވެ. އީދު ސަލާން ކޮށް ވަޒީރުންނާއި ދައުލަތުގެ ބޮޑުން ރައީސާއެކު އަރިއަރިއަށް ފޮޓޯ ނަގައި ސޯޝަލް މީޑިޔާ ފުރާލިއެވެ. އީދުދުވަހުގެ ހަވީރުގެ ކުޅިވަރުތައް ފެށުނީއެވެ. ސީދާ ކުޅިވަރުތައް ކުޅޭ ތަނަށް ރައީސްގެ އާއިލާވެސް ވަޑައިގެންނެވީއެވެ. ހަމަ އެއްކަލަ ބޮޑުންނާއެކު އިތުރު ފޮޓޯތައް ނެގުން ކުރިއަށްވެސް ގެންދިޔައީއެވެ.

ދެދުވަހެއްގެ މަތީން ސަރުކާރުގެ ބޮޑުންނާއި ޚުދު ރައީސުލްޖުމްހޫރިއްޔާ އުޅުއްވީ އެކަމެއްގައެވެ. 17 ދުވަހަށް ބަންދުކޮށްފައި އޮތް އޮތުމާއެކު މާލޭގެ ގިނަބަޔަކު ފުރަފުރައިގެން ގޮސްފައި އޮއްވައެވެ.

ދެންފެނުނީ މާ ހެއްވާ ކަމެކެވެ. ކުރިން ބުނިހެން ޓީވީއެމްގެ ލަވަމުބާރާތް ނިންމާ ރޭ އެފެންނަ ފަދަ މަންޒަރެވެ. ރައީސުލް ޖުމްހޫރިއްޔާވެސް ވިދާޅުވާ ކަހަލައެވެ. "އަޅުގަނޑަށް ނަށަން ދަސްކޮށްދިން ޚަލީލް ސަރ އަށް ޝުކުރިއްޔާ"އެވެ.

ނޫނެކެވެ. އެމަނިކުފާނު ވިދާޅުވީ އެހެނެއް ނޫނެވެ. އެމަނިކުފާނާއި ސަރުކާރު އެކީއެކަށް އަދި ސަރުކާރު ޕްރޮމޯޓް ކުރާން ފައިސާ ދީގެން ގެންގުޅޭ ކުދިންކޮޅު ބިޒީވީ އެހެން އެއްޗެކޭ ކިޔުމަށެވެ. މިހާތަނަށް އެވަރުގެ ކަމެއް ނުކުރާކަން ހާމަ ކުރުމަށެވެ. މިވަރުގެ އީދެއް ފާހަގަ ނުކުރާކަން ދެއްކުމަށެވެ. ކުޑަކުދިންނަށް މިފަދަ ކުޅިވަރު ހަވީރެއް ބޭއްވުނީ އަދި ކިރިޔާކަމަށް ވިސްނައިދިނުމަށެވެ. އެކަމަށްޓަކައި ހަދަހަދައިގެން ބޮޑެތި ޚަބަރުތައް ދެއްކިއެވެ. ރިޕޯޓްތައް ގެނައެވެ. އެހަރަކާތްތައް އިންތިޒާމް ކުރި ފަރާތްތަކަށް ޝުކުރު އަދާކުރާން ފެށީވެސް ތިޔަހެނެއް ނޫނެވެ. އެތަނަށް ތަކެތި އުފުލި މީހުންނަށާއި އެތަން ތައްޔާރުކުރި މީހުންނަށެވެ. ކެރެކްޓަރ ތަކުގެ ކޮސްޓިއުމްތައް ލައިގެންތިބި މީހުންނަށާއި އެމީހުންނަށް އަތްގާތްކޮށްދީ ހަދަން އުޅުނު މީހުންނަށެވެ. ދުރުގައި އަތްޖަހަންތިބި މީހުންނަށެވެ. ކުޅިބަލަން އެއްވި މީހުންނަށާއި އެތަނަށް ނާދެވި ގޭގައި ތިބި މީހުންނަށެވެ. ހަމަ އެއްކަލަ މޭރުމުންނެވެ. ޝުކުރިއްޔާ ރަމީޒް ސަރ އެވެ. ތޭރައަށް ވަކިން ބޮޑަށް ޝުކުރިއްޔާއެވެ. ހެދުން ފަހައިދިން މަންމައަށް ވަރަށް ވަރަށް ބޮޑަށް ޝުކުރިއްޔާއެވެ.

ކޮންމެއަކަސް މިސަރުކާރަކީ ދެއްކުމުގެ ސަރުކާރެކެވެ. ކިތައްމެ ކުޑަކަމެއް ކުރިއަސް އާ ކަމެއް ކަމުގައި ހަދައިގެން ވަރަށް ބޮޑަށް މަންޒަރު ދައްކާ ސަރުކާރެކެވެ. ނާފަހެ އަލަކަށް ކަމެއް ނުހިނގައެވެ. އާކަމެއް ނުވެސް ކުރެއެވެ. ރާއްޖެއަށް އީދެއް އައިސްގެން އެކަން ފާހަގަކުރި މީކީ ފުރަތަމަ ފަހަރެއްވެސް ނުމެ ނޫންމެއެވެ. ތިޔަކަހަލަ ލައްކަ ކުޅިވަރު ކުޅުނެވެ. ލައްކަ ކަންކަން މީގެ ކުރީގެ ސަރުކާރުތަކުންވެސް ކުރިއެވެ. ފްލޯޓްތައްވެސް ނެރުނެވެ. މާލިތައްވެސް ތައްޔާރުކުރިއެވެ. ތިޔަވަރު ވެގެނެއް ބަޔަކު ނޫޅެއެވެ. ތިޔަހާ ބޮޑުކަމެއް ކުރެވިގެން ފުމެފުމެއެއްވެސް ނަހަދައެވެ. އިތުރަކަށް މަށެއްވެސް މިވާހަކައެއް ނަގަނަގައިގެން ދައްކާކަށް ނޫޅެމެވެ. އެކަމަކު ނިންމާލަމުން ބުނެލާނަމެވެ. ތިކުރެވުނީ އަދި މާބޮޑު ކަމެއް ނޫނެވެ. އާކަމެއްވެސް ކުރެވުނީއެއް ނޫނެވެ. ތިޔަށް ކިޔަނީ އާ ކުކުޅަކަށް ގާބިހެއް އެޅުމެވެ.