ރާއްޖޭގެ ދެކުނުން އޮންނަ ފޯޅަވަހި، އީރާނަށް ހަމަލާދޭން އެމެރިކާއިން ބޭނުންކުރާނަމަ އެތަނަން ހަމަލާދޭނެކަމަށް އިންޒާރު އީރާނުން ދީފި އެވެ.

އީރާނުގެ އިސް އޮފިޝަލަކާ ހަވާލާދީ ބައިނަލްއަގުވާމީ މީޑިއާތަކުގައި ބުނެފައި ވަނީ ފޯޅަވަހީގައި ހުންނަ އިނގިރޭސިވިލާތާއި އެމެރިކާ ގުޅިފައިވާ ބޭސްއަށް އަމާޒުކުރުމަށް އަސްކަރީ ކޮމާންޑަރުންނަށް އަންގާފައިވާ ކަމަށެވެ.

ފޯޅަވަހީގެ އަސްކަރީ މަރުކަޒަށް އިރާނަށް ހަމަލާ ދިނުމުގެ ކުރިން އީރާނުން ވަނީ ފޯޅަވައްސަށް އަމާޒުކޮށް ދޭނެ ކަމަށް ބުނެފަ އެވެ ފޯޅަވައްސަކީ އަކީ އިނގިރޭސިވިލާތުގެ ހިއްސާ އޮންނަ އިންޑިއާ ކަނޑުގެ ސަރަހައްދު ކަމަށްވާ ޗާގޯސް އާކިޕެލަގޯގެ މައި ރަށެވެ.

އީރާނުގެ އިސް އޮފިޝަލަކާ ހަވާލާދީ އެ ރިޕޯޓުގައި ބުނެފައި ވަނީ ފޯޅަވަހީގައި ހުންނަ އިނގިރޭސިވިލާތާއި އެމެރިކާ ގުޅިގެން ހިންގާ އަސްކަރީ ބޭސްއަށް އަމާޒުކުރުމަށް އަސްކަރީ ކޮމާންޑަރުންނަށް އަންގާފައި ވަނީ އީރާނުގެ އަމާޒަކީ ޑޮނަލްޑް ޓްރަމްޕް އެ ގައުމަށް ހަމަލާ ދިނުން ހުއްޓުވުން ކަމަށެވެ.

އީރާންގެ އޮފިޝަލް "ދަ ޓެލެގްރާފް" އަށް ވިދާޅުވީ ޓްރަމްޕްގެ އިންޒާރުތައް އިތުރަށް ސީރިއަސްވެއްޖެ ނަމަ ފޯޅަވައްސާއި އެތަނުގައި އިންނަ އަސްކަރީ މަރުކަޒަށް ވަރުގަދަ ހަމަލާތަކެއް ދިނުމަށް އިސް ކޮމާންޑަރުންނަށް އިލްތިމާސް ކުރަމުން އަންނަ ކަމަށެވެ.

އޮފިޝަލް ވިދާޅުވީ ފޯޅަވައްސަން ބޮން އަޅާނެކަމަށް ބުނި ފަހުން އެ ރަށާ ބެހޭ ގޮތުން ދެކެވޭ ވާހަކަތައް ވަނީ ވަރަށް ބޮޑަށް ހޫނުވެފައި ކަމަށެވެ. އަދި ސެޓެލައިޓް ފޮޓޯތަކުން ދައްކާ ގޮތުގައި މިދިޔަ ހަފުތާގައި ސްޓްރެޓެޖިކް ޔޫއެސް-ޔޫކޭ އައުޓްޕޯސްޓަށް ބީ-2 ސްޕިރިޓް ގެ ތިން ޖެޓް އައިސްފައިވާ ކަމަށެވެ.

އީރާނުގެ ސަރުކާރުގެ ސަޕޯޓަރަކު "ދަ ޓެލެގްރާފް" އަށް ބުނި ގޮތުގައި 1990 ގެ އަހަރުތަކުން ފެށިގެން އެ ގައުމުގެ ދިފާއީ އެންމެ އިސް ކޮމާންޑަރުން ޗާގޯސް އަށް ބެލެސްޓިކް ނުވަތަ ކްރޫސް މިސައިލް ހަމަލާއެއް ދޭން ވިސްނާފައި ނެތުމަކީ ވަރަށް ނާދިރު ކަމެކެވެ.

މި ބޭސްއަކީ ބީ-1 ލެންސަރ، ބީ-2 ސްޕިރިޓް އަދި ބީ-52 ސްޓްރެޓޯފޯޓްރެސް ބޮން އަޅާ އުޅަނދުތައް ބާއްވާފައިވާ ބޭސްއެކެވެ. އަދި 4،000 އެއްހާ ސިފައިންނާއި ކޮންޓްރެކްޓަރުން ވެސް އެތަނުގައި ތިބެއެވެ.

އީރާނުގެ އޮފިޝަލް ވިދާޅުވި ގޮތުގައި ބައެއް ފަރާތްތަކުން ލަފާ ދެނީ އެ ރަށާ ދިމާލަށް މިސައިލް ފޮނުވާލަން ކަމަށާއި، ރަށަށް އަމާޒު ނުކޮށް ފޮނުވާލާ މިސައިލް ކަނޑަށް ވައްޓާލާ އީރާނުން މި މައްސަލަ ސީރިއަސް މައްސަލައެއްގެ ގޮތުގައި ދެކޭކަމުގެ ސާފު މެސެޖެއް ދިނުމަށް ކަމަށެވެ.

މިފަދަ ވާހަކަތަކެއް އީރާނުން ބުނެފައިވަނި އީރާނަށް "މެކްސިމަމް ޕްރެޝަރު" ކެމްޕޭން ޑޮނަލްޑް ޓްރަމްޕް އާކުރައްވާފައި ވަނިކޮށެވެ. އަދި އެމެރިކާގެ މަގުސަދަކީ އީރާނުން ނިއުކުލިއަރ ހަތިޔާރުގެ ބާރުވެރިކަން ހޯދުން ހުއްޓުވުމެވެ.

އީރާނުގެ އޮފިޝަލް ވިދާޅުވި ގޮތުގައި ޓްރަމްޕްގެ އިންޒާރުތަކަށް ރައްދު ދޭން ޖެހޭނީ ބަހުން ނޫން ކަމަށާއި އަމަލުން ކަމަށެވެ. އޮފިޝަލް ވިދާޅުވެފައިވަނީ މި މިސައިލްތައް ހުރީ ފޯޅަވަހޮ ނުވަތަ ބަހްރެއިން އިން ވިޔަސް އީރާނަށް ނުރައްކާ ވެދާނެ ކޮންމެ ސަރަހައްދަކަށް އަމާޒުކުރަން ތައްޔާރަށެވެ.

މީގެ އިތުރުން ހުރިހާ މިސައިލް ލޯންޗަރުތައް ތައްޔާރުކޮށް، ނިއުކްލިއާ ސައިޓްތައް ރަނގަޅަށް ހިމާޔަތް ކުރެވިފައި ހުރިތޯ ބެލުމަށް ކޮމާންޑަރުންނަށް އަންގާފައިވާނެ ކަމަށް ރިޕޯޓުގައި ވެއެވެ. އެމެރިކާއިން ހަމަލާއެއް ދީފި ނަމަ އީރާނުން އޮތީ ހަނގުރާމައިގެ ކޮންމެ ހާލަތަކަށް ވެސް ތައްޔާރުވެގެން ކަމަށް ރިޕޯޓްތައް ބުނެއެވެ.