އަޅުކަންކުރާ ތަންތަން ކެމްޕޭނުގައި ބޭނުންކުރާނަމަ ފިޔަވަޅު އަޅާނަން: އިލެކްޝަންސް ކޮމިޝަން

އަވަށްޓެރި ސްރީ ލަންކާގައި ބާއްވާ ލޯކަލް ކައުންސިލް އިންތިޚާބުގެ ކެމްޕޭންގައި އެއްވެސް ދީނެއްގެ އަޅުކަންކުރާ ތަންތަން ބޭނުންކުރާ ނަމަ، އެ ފަރާތްތަކާމެދު ފިޔަވަޅު އަޅާނެކަމުގެ އިންޒާރު އެޤައުމުގެ އިލެކްޝަންސް ކޮމިޝަނުން ދީފިއެވެ.

ލަންކާގެ އިލެކްޝަންސް ކޮމިޝަނަރު މަހިންދަ ދެޝަޕްރިޔާ ވިދާޅުވީ އަޅުކަންކުރާ ތަންތަނުގައި ކެމްޕޭންކުރާ ކެންޑިޑޭޓުންގެ ކެންޑިޑެސީ ބާތިލްކުރުމުގެ އިތުރުން، އަޅުކަންކުރާ ތަންތަން ބެލެހެއްޓުމާ ހަވާލުވެތިބި މީހުންގެ މައްޗަށް ފިޔަވަޅު ކަމަށެވެ. ލަންކާގެ އިންތިޚާބުތަކާބެހޭ ޤާނޫންތައް ބުނާ ގޮތުން އަޅުކަންކުރާ ތަންތަނުގައި ކެމްޕޭންކުރުމުގެ ހުއްދަ ދޭނަމަ، އެފަދަ ތަންތަނާއި ޙަވާލުވެގެން ތިބޭ ބައެއްގެ މައްޗަށް ދައުވާކުރެވޭނެއެވެ. އެފަދަ ކުށެއް ސާބިތުވެއްޖެ މީހެއްގެ އަދަބަކީ 7 އަހަރަށް ޖަލަށް ލުމެވެ.

ދެޝަޕްރިޔާ ވިދާޅުވީ ކެންޑިޑޭޓުންގެ ކެމްޕޭން ޕޯސްޓަރުތައް ފެބްރުއަރީ 7 ވަނަ ދުވަހުގެ މެންދަމު 12:00ގެ ކުރިން އާއްމު ތަންތަނުން ނަގަން ޖެހޭނެކަމަށެވެ.

އިންތިޚާބަށް ވަމުންދާ ތައްޔާރީތަކާބެހޭ ގޮތުން މީޑިއާއަށް މައުލޫމާތު ދެއްވަމުން ދެޝަޕްރިޔާ ވިދާޅުވީ އިންތިޚާބުގައި ވާދަކުރައްވާ ކެންޑިޑޭޓުންގެ ކެންޑިޑެސީ ފައިނަލްކުރުމުގެ މަސައްކަތް ކުރިއަށްދާކަމަށާއި، ޝަރުތު ހަމަނުވާ ތިން ކެންޑިޑޭޓެއްގެ ކެންޑިޑެސީ މިހާރުވެސް ބާޠިލްކޮށްފައިވާކަމަށެވެ.

އެއް ކެންޑިޑޭޓެއްގެ ނަން ބާޠިލްކުރީ ދެ ދާއިރާއަކަށް ކުރިމަތިލައިގެންނެވެ. ކައުންސިލްގެ ވަޒީފާއެއް އަދާކުރަމުންދާތީ އެހެން ކެންޑިޑޭޓެއްގެ ކެންޑިޑެސީ ބާޠިލްކުރިއިރު، 18 އަހަރު ނުފުރޭތީވެސް ކެންޑިޑޭޓެއްގެ ކެންޑިޑެސީ ބާޠިލްކޮށްފައިވެއެވެ.

ޖެނުއަރީ 8، 9 އަދި 10ގައި އިލެކްޝަންސް ކޮމިޝަނުން އިންތިޚާބުގައި ވާދަކުރާ ކެންޑިޑޭޓުންގެ ޕާޓީތަކާއި ބައްދަލުކުރުމަށް ހަމަޖެހިފައި ވާއިރު، މި ބައްދަލުވުންތަކުގައި ނަންތައް ބާޠިލްކުރި ކެންޑިޑޭޓުންގެ ލިސްޓް ފައިނަލްވާނެއެވެ.

ލަންކާގެ ލޯކަލް ކައުންސިލް އިންތިޚާބު އޮންނާނީ އަންނަ ފެބްރުއަރީ މަހުގެ 10ވަނަ ދުވަހުއެވެ.