އީރާނަށް ބޮޑު ކަންތައް ގަނޑެއް ކުރިމަތިވާނެކަމަށް ވިދާޅުވެ ޓްރަމްޕް އިންޒާރުދެއްވައިފި

ނިއުކްލިއަރ ޕްރޮގްރާމް ހުއްޓާލުމަށް 2015 ވަނަ އަހަރު އީރާނުން ވި ބައިނަލްއަގްވާމީ އެެއްބަސްވުމާއި ޚިލާފުވެ އެ ގައުމުން ނިއުކްލިއަރ ޕްރޮގްރާމް އަލުން ފަށައިފިނަމަ އެކަން "ބޮޑު މައްސަލައަކަށް" ވާނެކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ކުރައްވައިފިއެވެ.

ވައިޓް ހައުސްގައި ފަރަންސޭސި ރައީސް އެމަނުއެލް މެކްރޮންއާއި ވާހަކަދައްކަވަމުން ރައީސް ޓްރަމްޕް ވިދާޅުވީ އީރާނާއިއެކު ވެފައި އޮތް އެއްބަސްވުމަކީ މޮޔަ ކަމެއް ކަމަށެވެ.

އީރާނާއިއެކު ވެފައިވާ އެއްބަސްވުން ދެމެހެއްޓުމަށް ބާރުއަޅުއްވަމުންގެންދަވާ މެކްރޮން ވިދާޅުވީ އީރާނާއިއެކު އިތުރު އެއްބަސްވުމަކަށް ދިއުމަށް ފުރުސަތު އެބައޮތްކަމަށެވެ.

އެމެރިކާގެ ރައީސް ޓްރަމްޕް ގެންދަވަނީ ރައީސް ބަރަކް އޮބާމާގެ ދައުރުގައި އިރާނާއިއެކު ވެފައިވާ ނިއުކްލިއަރ އެއްބަސްވުން މެއި މަހުގެ 12 ވަނަ ދުހަށްފަހު އުވާލައްވަފާނެކަމުގެ އިންޒާރު ދެއްވަމުންނެވެ.

އިރާނާއި އެކު ހަދާފައިވާ އެއްބަސްވުމުން އެމެރިކާ ބޭރުނުވުމަށް ރައީސްޓްރަމްޕްއަށް ދަންނަވައި މަޝްވަރާ ކުރެއްވުމަށް ޖަރުމަނުގެ ޗާންސެލަރ އެންގެލާ މާކެލްވެސް ހުކުރު ދުވަހު އެމެރިކާގެ ވެރިރަށަށް ވަޑައިގަންނަވާނެއެވެ.

"އެކަމަކީ އެމީހުންނަށް އެހާ ފަސޭހައިން ފަށައިގަނެވޭނެ ކަމެއްނޫން" އެއްބަސްވުން އުވާލައިފިނަމަ އީރާނުން އަލުން ނިއުކްލިއަރ ޕްރޮގްރާމް ފަށާފާނެ ނޫންތޯ ނޫސްވެރިއަކު ސުވާލުކުރުމުން އޯވަލް އޮފީހުގައި އަންގާރަ ދުވަހު ޓްރަމްޕް ވިދާޅުވިއެވެ.

އިރާންގެ ޚަރިޖީ ވަޒީރު، ޖަވާދް ޒާރިފް އެސޯސިއޭޓެޑް ޕްރެސްގައި ފަހުން ވިދާޅުވެފައިވަނީ އެމެރިކާއިން އެއްބަސްވުމުން ބޭރުވެެއްޖެނަމަ އެންމެ ގާތީ އީރާނުން އެއްބަސްވުން ދޫކޮށްލުން ކަމަށެވެ.

އޭނާ ވިދާޅުވެފައިވަނީ ވޮޮޝިންގޓަނުން އެ ކުރާ ކަމަކީ އެމެރިކާއަކީ ވައުދާ ޚިލާފުވާ ބައެއްކަން ސާބިތުކޮށްދީ އުތުރު ކޮރެއާއާއިއެކު އެމެރިކާއިިން ބާއްވަން ހަމަޖެހިފައިވާ ވާހަކަތަކަށް ބުރޫއެރުވުން ކަމަށެވެ.

އަންގާރަ ދުވަހު ރައީސް ޓްރަމްޕްވަނީ "އީރާނުން އަހަރެމެންނަށް އެއްވެސްގޮތަކުން އިންޒާރު ދީފިނަަމަ މަދު ގައުމަކުން މީގެ ކުރިން ދައްކަން ޖެހުނުފަދަ އަގެއް އެގައުމުން ދައްކަންޖެހޭނެ" ކަމަށް ވިދާޅުވެފައެވެ.

އެމެރިކާއާއި، ރަޝިއާ، ޗައިނާ، ފްރާންސް، އިނގިރޭސިވިލާތް، އަދި ޖަރުމަނުވިިލާތުން އީރާނާއިއެކުވީ ނިއުކްލިއަރ އެއްބަސްވުން ގާއިމް ކުރީ 2015 ވަނަ އަހަރުއެވެ.