އީރަނަށް ޖާސޫސުކޮށްދިނުމުގެ ކުށުގައި އިސްރާއީލުގެ ކުރީގެ ވަޒީރަކު 11 އަހަރަށް ޖަލަށް ލުމަށް އިސްރާއީލުގެ ކޯޓަކުން ޙުކުމް ކޮށްފިއެވެ.

އިސްރާއީލުގެ މިނިސްޓަރ އޮފް އެނަރޖީ އެންޑް އިންފްރާސްޓްރަކްޗަރގެ މަޤާމު 1995 ން 1996 ށް އަދާކުރެއްވި ގޯނެން ސެގޭވްގެ މައްޗަށް ކުރި ތުހުމަތުތައް ޖަނަވަރީ މަހު ސާބިތުވެފައިވާއިރު، އޭނާގެ މައްޗަށް ޙުކުމް ކޮށްފައިވަނީ މި މަހުގެ 26 ވަނަ ދުވަހު އެވެ. 

މި މައްސަލަ އާއި ގުޅިގެން އިސްރާއީލުގެ ޖަސްޓިސް މިނިސްޓްރީން ނެރުނު ބަޔާނެއްގައި ބުނެފައިވަނީ ގޯނެންގެ މައްޗަށް ކުރި 11 އަހަރުގެ ޙުކުމަކީ އޭނާ ކުށަށް އިއުތިރާފް ވުމުން، އަދަބު ލުއިކޮށްދިނުމަށް ފަހު ކޮށްފައިވާ ޙުކުމެއް ކަމަށެވެ. އެ ބަޔާނުގައި އިސްރާއީލަށް ގެއްލުން ދިނުމުގެ ނިޔަތުގައި ހަތުރުވެރި ޤައުމަކަށް އޭނާ ޖާސޫސުކޮށްދީ، މައުލޫމާތު ފޯރުކޮށްދިން ކަމަށެވެ.

މި މައްސަލައިގައި ގޯނެންގެ މައްޗަށް ދައުވާ ކޮށްފައިވަނީ ނިމިގެންދިޔަ އަހަރުގެ ޖޫން މަހުއެވެ. އިސްރާއީލުން ތުހުމަތު ކުރާ ގޮތުގައި އީރާނުން ގޯނެން ރެކްރޫޓް ކޮށްފައިވަނީ އޭނާ ނައިޖީރިއާގައި ދިރިއުޅެމުން ދިޔައިރުއެވެ. އެގޮތުން 2012 ވަނަ އަހަރު ނައިޖީރިއާގައި ހުންނަ އީރާނުގެ އެމްބަސީއަށް އެކި ފަހަރުމަތިން ގޮސްފައިވާ ކަމަށާއި، ދެ ފަހަރެއްގެ މަތިން އޭނާ އީރާނަށްވެސް ގޮސްފައިވާކަމަށް އިސްރާއީލުން ބުނެއެވެ.

އިސްރާއީލުން ތުހުމަތު ކުރާގޮތުގައި ގޯނެން ވަނީ އިސްރާއީލުގެ ހަކަތައިގެ ބާޒާރާއި، އެ ޤައުމުގެ ސަލާމަތީ އެކިއެކި ސައިޓްތަކާއި ގުޅޭގޮތުން އީރާނަށް މައުލޫމާތު ފޯރުކޮށްދީފައެވެ.

މި މައްސަލައާއި ގުޅޭ އިތުރު ތަފްޞީލު ހާމަކުރުން އިސްރާއީލުގެ ސަރުކާރުން ވަނީ ސަރުކާރުގެ ކަމާއިބެހޭ އިދާރާތަކުގެ ތަރުޖަމާނުންނަށް މަނާކޮށްފައެވެ.