ކާށިދޫ އާއި ކެލާ ފަޅުގައި ރިސޯޓު ހަދަން ބީލަމަށް ހުޅުވާލައިފި
1 އެޕްރީލު 2025 | އަންގާރަ 08:49ކާށިދޫ ފަޅުގައި ރިސޯޓެއް ތަރައްގީކުރުމަށްޓަކާ ނިމިދިޔަ އެމްޑިޕީ ވެރިކަމުގައި ވެސް އެ ތަނުގައި ރިސޯޓެއް ތަރައްގީކުރަން ބީލަމަށް ހުޅުވާލާފައިވޭ
ކާށިދޫ މަތިން ނަގާފައިވާ އޭރިއަލް މަންޒަރެއް
ކ. ކާށިދޫ އާއި ހއ. ކެލާ ފަޅު ތެރޭގައި ރިސޯޓު ތަރައްޤީ ކުރުމަށް ބީލަމަށް ހުޅުވާލައިފިއެވެ.
އޭގެ ތެރެއިން ކާށިދޫގައި، ރަށުގެ ފަޅުގައި ރިސޯޓް ތަރައްޤީކުރުމަށް ހުޅުވާލާފައި ވަނީ 31 މާރޗް 2025ގައެވެ. އަދި ކެލާ ފަޅުގައި ދެ ރިސޯޓު ތަރައްގީކުރަން ބީލަމަށް ހުޅުވާލާފައި ވަނީ 1 އެޕްރިލް 2025ގައެވެ.
މި ބިޑުތައް ހުށަހަޅާ ފަރާތުން ބިޑް ސެކިއުރިޓީގެ ގޮތުގައި 25،000 ޑޮލަރު ދައްކަން ޖެހޭ ގޮތަށް ވަނީ ހަމަޖައްސާފައެވެ.
ކާށިދޫ ފަޅުގައި ރިސޯޓު ތަރައްގީކުރުމަށް ބީލަން ހުށަހެޅުމަށް ދިން މުއްދަތު ޖޫން 5، ވާ ބުރާސްފަތި ދުވަހުގެ ހެނދުނު 10:00 ގެ ނިޔަލަށް ހަމަވާނެއެވެ. އަދި ކެލާ ފަޅުން ދެ ރިސޯޓު ތަރައްގީކުރަން ބީލަން ހުށަހެޅުމަށް ދިން މުއްދަތު ހަމަވާނީ ޖޫން 5 ވަނަ ދުވަހު 13:00 އަށެވެ.
މި ދެ ރަށުގައި ރިސޯޓު ތަރައްގީކުރުމަކީ ރައީސް ޑރ. މުހައްމަދު މުއިއްޒުގެ ވައުދެއް ކަމަށް ވާއިރު އެ މަސައްކަތް ކުރާނެ ގޮތުގެ ތަފްސީލް ހާމަ ނުކުރާތީ އާއްމުން އައީ އެކަމާއި މެދު ސުވާލުކުރަމުންނެވެ. މި މަސައްކަތް ފެށުމަށް ރިސޯޓް ތަރައްޤީކުރާނެ ބަޔަކު ހޯދަން އިއުލާންކޮށްފައި މި ވަނީ މި މަޝްރޫޢު ނުފެށި ލަސްވާތީ ސަރުކާރަށް ފާޑުކިޔުން އިތުރުވެފައި ވަނިކޮށެވެ.
ޓުއަރިޒަމް މިނިސްޓްރީން ހާމަކޮށްފައިވާ ގޮތުގައި ކެލާ ފަޅުން 12.19 ހެކްޓަރުގެ ދެ ރަށް ހިއްކައިގެން ރިސޯޓު ތަރައްގީކުރުމަށް ވަނީ ހަމަޖެހިފައެވެ. އޭގެ ތެރެއިން އެއް ރަށަކީ 156.2 ހެކްޓަރުގެ ރަށެކެވެ. އަދި ދެވަނަ ރަށަކީ 169.3 ހެކްޓަރުގެ ރަށެކެވެ.
މި ދެ ރިސޯޓް ތަރައްޤީކުރަން ޖެހެނީ 200 އެނދުގެ ޖާގަ އާއި އެކުގައެވެ. އަދި އެ ރަށް ކުއްޔަށް ނަގަން ޖެހެނީ 50 އަހަރަށްކަން ފާހަގަކޮށްލެވެއެވެ.
މި ދެ ރަށުގެ ތެރެއިން 156.2 ހެކްޓަރުގެ ރަށުގެ ބިޑު ކާމިޔާބުވާ ފަރާތަކުން ދެ މަސް ދުވަސް ތެރޭގައި މަދުވެގެން 1.99 މިލިއަން ޑޮލަރު ސަރުކާރަށް ދައްކަން ޖެހޭނެކަން ފާހަގަކޮށްލެވެއެވެ. ހަމައެހެންމެ މީގެ ތެރެއިން 169.3 ހެކްޓަރުގެ ރަށުގެ ބިޑު ކާމިޔާބުވާ ފަރާތުން، ދެ މަސް ދުވަސް ތެރޭގައި ސަރުކާރަށް 2.03 މިލިއަން ޑޮލަރު ދައްކަން ޖެހޭނެކަން ފާހަގަކޮށްލެވެއެވެ.
ސަރުކާރުން އިއުލާންކޮށްފައި ވަނީ ކާށިދޫ ފަޅުން 10 ހެކްޓަރުގެ ރަށެއް ހިއްކައިގެން ރިސޯޓެއް ތަރައްގީކުރުމަށެވެ. އެގޮތުން އެ ރަށު ފަޅުން ވިއްކަނީ 115.21 ހެކްޓަރުގެ ރަށެއް ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ.
އެ ވުޒާރާއިން ހާމަކޮށްފައިވާ ގޮތުން އެ ރަށުގައި ތަރައްގީކުރުމަށް ނިންމާފައި ވަނީ 100 އެނދުގެ ރިސޯޓެކެވެ. އަދި އެ ރަށް ވެސް 50 އަހަރަށް ކުއްޔަށް ދޫކުރުމަށް ވަނީ ހަމަޖެހިފައެވެ. މީގެ އިތުރުން ބިޑު ކާމިޔާބުވާ ފަރާތުން، ބިޑު ކާމިޔާބު ކުރާތާ ދެ މަސް ދުވަސް ތެރޭގައި ސަރުކާރަށް 2.25 މިލިއަން ޑޮލަރު ދައްކަން ޖެހެއެވެ.
ކާށިދޫ ފަޅުގައި ރިސޯޓެއް ތަރައްގީކުރުމަށްޓަކާ ނިމިދިޔަ އެމްޑީޕީ ވެރިކަމުގައި ވެސް އެ ތަނުގައި ރިސޯޓެއް ތަރައްގީކުރަން ބީލަމަށް ހުޅުވާލާފައިވެއެވެ.
