މަޑުއްވަރީގައި ދެބެއިންގެ ދެމެދުގައި ހިނގި މާރާމާރީ އާއި ގުޅިގެން މީހަކު ހައްޔަރުކޮށްފި

ރ. މަޑުއްވަރީގައި ދެބެއިންގެ ދެމެދުގައި ހިނގި މާރާމާރީ އާއި ގުޅިގެން މީހަކު ހައްޔަރުކޮށްފައިވާ ކަމަށް ފުލުހުން ހާމަކޮށްފިއެވެ.

މަޑުއްވަރީގައި އެއްބަނޑު އެއްބަފާ ދެބެއިން މާރާމާރީ އެއް ހިންގި މައްސަލަ ފެންމަތިވީ 31 މާރޗް ވީ ހޯމަ ދުވަހުއެވެ. ފުލުހުން މީޑީއާތަކަށް އާއްމުކޮށްފައިވާ މެސެޖެއްގައި ބުނެފައި ވަނީ މަޑުއްވަރީގައި ދެމީހެއްގެ ދެމެދުގައި މާރާމާރީ ހިންގި މައްސަލަ އެއް އެ އިދާރާ އަށް ހުށަހަޅާފައިވާ ކަމަށެވެ. އަދި އެ މައްސަލަ ހުށަހަޅާފައި ވަނީ ހޯމަ ދުވަހުގެ ރޭ 11:28 ހާއިރު ކަމަށް ފުލުހުން ވަނީ ހާމަކޮށްފައެވެ.

Advertisement

އެ މައްސަލައިގައި ހައްޔަރުކޮށްފައި ވަނީ 35 އަހަރުގެ ދިވެހި ފިރިހެނެއް ކަމަށް ވެސް ފުލުހުން ވަނީ ހާމަކޮށްފައެވެ.

މަޑުއްވަރިން ރާއްޖެއެމްވީ އަށް މައުލޫމާތު ދިން މީހަކު ކިޔާދިން ގޮތުގައި މި މާރާމާރީ އާއި ގުޅިގެން އެކަކަށް އަނިޔާވެ، އޭނާ އަށް އެ ރަށު ސިއްހީ މަރުކަޒުގައި ވަނީ ފަރުވާދީފައެވެ. އެނގިފައިވާ ގޮތުން މި މައްސަލައިގައި ހައްޔަރުކޮށްފައިވާ މީހަކީ ރ.މަޑުއްވަރީ ބީޗްހައުސް އަށް ނިސްބަތްވާ އިސްމާއިލް އާސިފްއެވެ. އޭނާ ހަމަލާ ދީފައި ވަނީ އޭނާގެ އެއްބަނޑު އެއް ބަފާ ބޭބެ އަށް ކަަމަށް މި ނޫހަށް މައުލޫމާތު ދިން މީހާ ވަނީ ކިޔާދީފައެވެ.

އެ ރަށު އިތުރު މީހަކު ކިޔާ ދިން ގޮތުގައި މި ދެ މީހުންގެ މެދުގައި މާރާމާރީ ހިނގަން މެދުވެރިވީ އަމިއްލަ ސަބަބުތަކާއި ހުރެއެވެ. އެގޮތުން ބޭބެ ފައިސާ އަށް ކިޔާތީ ރުޅި އައިސްގެން ހަމަލާ ދިން ކަމަށް ރަށު ތެރޭގައި ވާހަކަދެކެވެމުންދާ ކަމަށް އޭނާ ވަނީ ބުނެފައެވެ. ރާއްޖެ އެމްވީ އާއި ވާހަކަދެއްކި މީހާ ވަނީ އާސިފްގެ ނަފްސާނީ މައްސަލަ އެއް ހުންނަ ކަމަށް ބެލެވޭ ކަމަށް ފާހަގަކޮށްފައެވެ. އެހެންނަމަވެސް އެކަމާއި ގުޅޭ ގޮތުން ރަސްމީ އިދާރާއަކުން ވަކި އެއްޗެއް ހާމަކޮށްފަ އެއް ނުވެއެވެ.

މި މައްސަލައިގައި ހައްޔަރުކޮށްފައިވާ މީހާ އަކީ މި ފަދަ މައްސަލައިގެ ކުށުގެ ރެކޯޑް އޮތް މީހެކެވެ. އެގޮތުން 2019 ވަނަ އަހަރު ރ.މަޑުއްވަރީގައި މީހަކަށް ވަޅިން ހަމަލާ ދިން މައްސަލައިގައި އޭނާ ޖަލަށް ލުމަށް 2022 ވަނަ އަހަރު ހުކުމް ކުރިއެވެ. އޭނާ ޖަލުން މިނިވަންވެފައި ވަނީ ދާދި ފަހުންނެވެ.

ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.