ޔުކްރެެއިން ހަނގުރާމައާ ގުޅޭ މަޝްވަރާ ސައުދީގައި ފަށައިފި

ޔުކްރެއިން އާއި ރަޝިޔާއާ ދެމެދު ހިނގަމުންދާ ހަނގުރާމައިގައި ވަގުތީ ހުއްޓުމެއް ގެނައުމަށްޓަކައި އެމެރިކާގެ އިސް ބައިވެރިވުމާ އެކު، ސައުދީ އަރަބިއްޔާގައި ބާއްވާ މަޝްވަރާތައް ފެށިއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕް، އަވަސް މުއްދަތެއްގެ ތެރޭގައި މި ހަނގުރާމަ ނިންމުމަށް މަސައްކަތް ކުރަމުންދާ އިރު، ސައުދީގެ ރިޔާދުގައި ބާއްވާ މި މަޝްވަރާ ތަކުގައި އެމެރިކާގެ އޮފިޝަލުން ޔުކްރެއިން އާއި ރަޝިޔާއާ ވަކި ވަކިން ބައްދަލު ކުރުމަށް ވަނީ ހަމަޖެހިފައި އެވެ.

މަޝްވަރާތައް ފެށުނީ އާދިއްތަ ދުވަހުގެ ރޭ ޔުކްރެއިންގެ ދިފާއީ ވަޒީރު ރުސްތަމް އުމެރޯވްގެ އިސް ނެންގެވުމުގެ ދަށުން، އެމެރިކާގެ ޓީމާއެކު އެވެ.

އުމެރޯވް ވިދާޅުވި ގޮތުގައި މަޝްވަރާ ތަކުގައި ހަކަތައިގެ ވަސީލަތްތަކާއި، މުހިންމު އިންފްރާސްޓްރަކްޗަރ ހިމާޔަތްކުރުމުގެ ކަންކަމާ ގުޅޭ ގޮތުން މަޝްވަރާ ކުރުން ހިމެނެ އެވެ.

ރަޝިޔާއާ އެކު މަޝްވަރާތައް ބޭއްވުމަށް ހަމަޖެހިފައި ވަނީ ހޯމަ ދުވަހު އެވެ. ނަމަވެސް، ރަޝިޔާ އިން ބުނެފައި ވަނީ މަޝްވަރާ ތަކުން އަވަސް ހައްލެއް ލިބޭނެ ކަމަށް އުންމީދު ނުކުރާ ކަމަށެވެ.

ރަޝިޔާގެ ތަރުޖަމާނު ދިމިޓްރީ ޕެސްކޯވް ވިދާޅުވީ، މިއީ ދަތުރުގެ ފެށުން އެކަނި ކަމަށާއި، ކުރިއަށް އޮތީ އުނދަގޫ މަޝްވަރާތަކެއް ކަމަށެވެ.

 ދެފަރާތުން އެކި ހުށަހެޅުންތައް ހުށަހަޅަމުން ދިޔަ ނަމަވެސް، ހަމަލާތައް ދަނީ ހުއްޓުމެއް ނެތި ކުރިއަށެވެ. އާދިއްތަ ދުވަހު ޔުކްރެއިންގެ ވެރި ރަށަށް ދިން ހަމަލާއެއްގައި ތިން ރައްޔިތުން މަރުވެފައިވާ އިރު، ޔުކްރެއިންގެ ޑްރޯން ހަމަލާއަކުން ރަޝިޔާގެ ދެ މީހަކު މަރުވި އެވެ.