ޕާކިސްތާނާއި އަފްޣާނިސްތާން ގުޅޭ ބޯޑަރު ހޯމަ ދުވަހު ޕާކިސްތާނުން ހުޅުވައިިފިއެެވެ.

ދެގައުމު ގުޅޭ ސަރަހައްދީ ރޮނގު ހޯމަ ދުވަހު ހުޅުވިއިރު، އެކަން ކުރަން ޕާކިސްތާނުގެ ބޮޑުވަޒީރު ނިންމީ "ގުޑްވިލް ގެސްޗާ" ނުވަަތަ އެހީތެރިވުމުގެ އަތެއް ދިއްކުރުމުގެ ގޮތުން ކަމަށްވާ އިރު ޕާކިސްތާނާއި އަފްޣާނިސްތާން ގުޅޭ ބޯޑަރު ޕާކިސްތާނުން ބަންދުކުރީ އެ ގައުމަށް އަމާޒުވި ހަމަލާތަކެއް ފޮނުވާލާފައި ވަނީ އަފްޣާނިސްތާނުގެ ތެރެއިން ކަމަށް ތުހުމަތު ކުރެވިގެންނެވެ.

މިދޔަ ފެބުރުއަރީ 17 ވަނަ ދުވަހު ޕާކިސްތާނުން އަފްޣާނިސްތާނާ ގުޅޭ ބޯޑަރު ބަންދުކުރިއިރު މި މާޗް މަހު، ދެ ދުވަަހަށް ޕާކިސްތާނުން ބޯޑަރު އަލުން ހުޅުވާލިއެވެ. ޕާކިސްތާނުން ބުނާ ގޮތުން އެގައުމުން އެކަން ކުރީ ދެ ދަގައުމުގެ ބޯޑަރު ސަރަހައްދުގައި ތާށިވެފައި ތިބި އާންމުންނަށް އެމީހުން ބޭނުންވާ މަންޒިލަށް ދިއުމަށް މަގުފަހިކޮށްދިނުމަށެވެ. ދެ ދުވަހަށް ބޯޑަރު ހުޅުވާލުމުން އަފްޣާނިސްތާނުގެ 50000 މީހުން އެމީހުންގެ ގައުމަށް ދިޔައެވެ. އަދި ޕާކިސްތާނުގެ 6،000 ނުވަތަ 7،000 މީހުން އެމީހުންގެ ގައުމަށް ދިޔައެވެ.

ޕާކިސްތާނާއި އަފްޣާނިސްތާން ގުޅޭ ބޯޑަރު ޕާކިސްތާނުން ހުޅުވާލުމާ ގުޅިގެން އަފްޣާނިސްތާނުގެ ރައީސްގެ ތަރުޖަމާނު މިކަމަށް މަރުހަބާ ވިދާޅުވިއިރު އޭނާ ވަނީ ދެގައުމުގެ މެދުގައި އުފެދިފައިވާ ސިޔާސީ ހަލަބޮލި ކަމަކީ ބޯޑަރުތައް ބަންދު ކުރުމުން ހައްލުވާނެ ކަމެއް ނޫން ކަމަށް ވިދާޅުވެފައެވެ.