ޓުޗެލްގެ އިރުޝާދުގެ ދަށުން ކުޅުނު ފުރަތަމަ މެޗުން އިންގްލެންޑު މޮޅުވެއްޖެ

ފީފާ ވޯލްޑް ކަޕް ކޮލިފިކޭޝަންގެ ފުރަތަމަ ބުރުގެ ގުރޫޕު ކޭގައި އަލްބޭނިއާއާ ދެކޮޅަށް ކުޅުނު މެޗުން އިންގްލެންޑު މޮޅުވެއްޖެ އެވެ.

އިންގްލެންޑުގެ ރަސްމީ ސްޓޭޑިއަމް، ވެމްބްލީ ގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އިންގްލެންޑުން އެއް ލަނޑު ޖެހިއިރު، ދެ ވަނަ ހާފުގައި ވަނީ އަނެއް ލަނޑު ޖަހައިފަ އެވެ.

މެޗު ފަށައިގެން 20 ވަނަ މިނެޓުގައި އިންގްލެންޑަށް ލީޑު ނަގައިދިނީ މައިލްސް ލެވިސް ސްކެލީ އެވެ. އޭނާ އެ ލަނޑު ޖެހީ އިންގްލެންޑުގެ ޖޫޑް ބެލިންހަމް ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން ވެސް އިންގްލެންޑުން ވަނީ މެޗުގައި ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗުގެ ދެ ވަނަ ހާފުގައި، 77 ވަނަ މިނެޓުގައި އިންގްލެންޑުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ކެޕްޓަން ހެރީ ކޭން އެވެ. އެއީ ޑެކްލަން ރައިސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މިއީ އިންގްލެންޑުގެ ކޯޗުކަމާ ހަވާލުވި ޖަރުމަނުގެ ތޯމަސް ޓުޗެލްގެ އިރުޝާދުގެ ދަަށުން އެ ޓީމު ކުޅުނު ފުރަތަމަ މެޗެވެ. މިދިޔަ އަހަރުގެ އޮކްޓޫބަރު މަހު އިންގްލެންޑުގެ ކޯޗުކަމާ އޭނާ ހަވާލުވީ، ކުރިން އެ މަގާމުގައި ހުރި ގަރެތު ސައުތުގޭޓް، މަގާމުން ވަކިވުމުންނެވެ.

މޮޅާއެކު މި ގުރޫޕުގެ އެއް ވަނައިގައި އިންގްލެންޑު އޮތީ ތިން ޕޮއިންޓާ އެކު އެވެ. ދެ ވަނައިގައި އޮތް ލަޓްވިއާ އަށް ވެސް ލިބެނީ ތިން ޕޮއިންޓެވެ.

ކޮލިފިކޭޝަންގައި ދެން އިންގްލެންޑު ނިކުންނާނީ ލަޓްވިއާއާ ދެކޮޅަށެވެ.