އަލުން ހަމަލާ ދޭން ފެށި ފަހުން، އިސްރާއީލުން ޣައްޒާގެ 400 އަށް ވުރެ ގިނަ މީހުން ޝަހީދު ކޮށްލައިފި 

އިސްރާއީލުން ޣައްޒާ އަށް ދޭ "އެންމެ ފަހުގެ އިންޒާރު" އާއެކު ހަނގުރާމަ އަލުން ފެށި ފަހުން، މިހާތަނަށް ގިނަ އަދަދެއްގެ ބަޔަކު ޝަހީދު ކޮށްލައިފި އެވެ.

އިސްރާއީލުން ޣައްޒާ އަށް ދިން "އެންމެ ފަހުގެ އިންޒާރު" ގައި، ހަމާސްގެ ބާރު ނައްތާލުމަށާއި، ހިފެހެއްޓިފައިވާ ހަނގުރާމައިގެ ރަހީނުން ދޫކޮށްލުމަށް ވަނީ އަންގައިފަ އެވެ.

މިއާއެކު، ބުރާސްފަތި ދުވަހު އިސްރާއީލުން ވަނީ ޣައްޒާގެ ސަރަހައްދުތަކަށް ވައިގެ ހަމަލާތައް ދިނުމުގެ އިތުރުން، އެއްގަމުގެ އޮޕަރޭޝަންތައް ފުޅާ ކޮށްފަ އެވެ.

މިއަހަރުގެ ޖެނުވަރީ މަހުގެ ތެރޭގައި ހަނގުރާމަ ހުއްޓާލުމަށް ފަހު، އަންގާރަ ދުވަހުން ފެށިގެން އަލުން ހަމަލާދޭން ފަށާފައިވާއިރު، މިހާތަނަށް 400 އަށްވުރެ ގިނަ މީހުން ޝަހީދު ކޮށްލާފައިވާ ކަމަށް ޣައްޒާގެ ސިއްހީ ވުޒާރާ އިން ބުނެ އެވެ.

ބުރާސްފަތި ދުވަހުގެ ފަތިހު ޚާން ޔޫނިސްގައި ދިން ހަމަލާއެއްގައި އިތުރު 10 މީހަކު ވަނީ ޝަހީދު ކޮށްލައިފަ އެވެ. އިސްރާއީލުގެ ދިފާއީ ވަޒީރު އިސްރާއީލް ކަޓްޒް ވިދާޅުވީ، "މިއީ އެންމެ ފަހުގެ އިންޒާރު" ކަމަށާއި، ރަހީނުން ދޫކޮށްލައި ހަމާސް ނައްތާލައިފި ނަމަ، އެހެން ގައުމުތަކަށް ހިޖުރަ ކުރުމުގެ ފުރުސަތު ލިބިގެން ދާނެ ކަމަށެވެ.

ހަމާސް އިން ބުނެފައި ވަނީ މަޝްވަރާތަކަށް ތައްޔާރަށް ތިބި ކަމަށާއި، ހަނގުރާމަ ނިމުމަކަށް ގެނައުމަށް ބައިނަލްއަޤުވާމީ މުޖުތަމައުގެ އެހީތެރިކަން ބޭނުންވާ ކަމަށެވެ.

ނަމަވެސް، މިޞްރު، ޤަތަރު އަދި އެމެރިކާގެ މެދުވެރި ކަމާއެކު ކުރިން އެއްބަސްވެފައިވާ ތިން މަރުހަލާގެ އެއްބަސްވުމަށް އަލުން މަޝްވަރާ ކުރުމަށް އިސްރާއީލުން ހުށަހަޅާފައިވާ ހުށަހެޅުމަށް، ހަމާސް އިން ވަނީ ދެކޮޅު ހަދާފައި އެވެ.

2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު، ހަމާސް އިން އިސްރާއީލަށް ދިން ހަމަލާތަކާ ގުޅިގެން، އިސްރާއީލުން ފެށި ހަނގުރާމަގައި މިހާތަނަށް ފަލަސްތީނުގެ 49،000 (ސާޅީސް ނުވަ ހާސް) އަށް ވުރެ ރައްޔިތުން ޝަހީދު ކޮށްލާފައިވެ އެވެ. އަދި ހަމާސްގެ ހަމަލާތަކުގައި އިސްރާއީލްގެ 1218 މީހަކު ވަނީ މަރުވެފަ އެވެ. 

މިހާރު އަލުން ފެށިފައިވާ ހަމަލާތަކާ އެކު، ހަނގުރާމައިގެ ނިމުން ކައިރި ވެފައިވާ ކަމުގެ އުއްމީދުތައް ވަނީ ނެތިގޮސްފައި އެވެ.