ފުލުހުންނާއި ސިފައިންގެ މައިބަދައިގައި ބޭއިންސާފަށް ނޫނެކޭ ބުނުމުގެ ހިތްވަރު ހުންނަން ޖެހޭ: މާޒް ސަލީމް
އެމްޑީޕީން ކުރިއަށް ގެންދާ ސުލްހަވެރި އިހުތިޖާޖާ ގުޅިގެން، ފުލުހުން އަންނަނީ ކޮންމެ ރެޔަކު އިހުތިޖާޖުގެ ބައިވެރިންނަށް ހުރަސްއަޅާ ބާރުގެ ބޭނުން ކުރަމުން
ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް) ބުރާސްފަތި ދުވަހުގޭ ރޭ 13-03-2025 ގައި އެމްޑީޕީން ބޭއްވި މުޒާހަރާގައި ވާހަކަދައްކަވަނީ
ފުލުހުންނާއި ސިފައިން މައިބަދައިގައި ނޫނެކޭ ބުނުމުގެ ހިތްވަރު ހުންނަންޖެހޭނެ ކަމަށް ހޯމް މިނިސްޓްރީގެ ކުރީގެ ސްޓޭޓް މިނިސްޓަރު އަހުމަދު ސަލީމް (މާޒް ސަލީމް) ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީން ކުރިއަށްގެންދިޔަ މުޒާހަރާގައި ވާހަކަ ދައްކަވަމުން ސަލީމް ވިދާޅުވީ، ފުލުހުންނާއި ސިފައިން މިއަދު ހެޔޮ އެދެނީ އަނިޔާވެރި ވެރިކަމުގައި ހުންނެވި ވަލިޔުލްއަމުރަށް ކަމަށާއި ރައްޔިތުންނަށް ދަނީ އަނިޔާވެރިވަމުން ކަމަށެވެ.
ފުލުހުންގެ ހުވާ އިއްވަމުން މާޒް ސަލީމް ވިދާޅުވީ، ފުލުހުންނާއި ސިފައިން ކޮށްގެން ތިބި ހުވަޔާއި ޚިލާފްވެފައިވާ ކަމަށާއި ފުލުހުންނާއި ސިފައިން ބޭއިންސާފަށް ނޫނެކޭ ބުނަން ޖެހޭނެ ކަމަށެވެ.
އަދި ރާއްޖޭގެ ރައްޔިތުންނާއި މެދު މިސަރުކާރުން ވަމުންދާ ނާއިންސާފުގެ ކަންކަން ހަމަ މަގަށް އަޅުވާނީވެސް ފުލުހުންނާއި ސިފައިން ކަމަށް ވިދާޅުވި އެވެ.
މިއަދު ޤާނޫނު އަސާސިގެ 27 ވަނަ މާއްދާއިން ދިވެހި ކޮންމެ ރައްޔިތަކަށް ލިބިދީފައިވާ ޚިޔާލު ފާޅު ކުރުމުގެ މިނިވަން ކަމާއި އެއްވެ އުޅުމުގެ މިނިވަންކަން މިސަރުކާރުން ނިގުޅައިގެންފައިވާއިރު، މިއީ ސަރުކާރު ޤަނޫނީ އިމުން ބޭރުވެ، ރައްޔިތުން މަގުމައްޗަށް ނިކުނަން މަޖުބޫރުކުރުވި ކަމެއް ކަމަށް ސަލީމް ވިދާޅުވިއެވެ.
ޤާނޫނު އަސާސީގެ އަށް އިސްލާހް ގެނެވޭނީ ރައްޔިތުންގެ މަޖިލީހުގެ ދެބައި ކުޅަ އެއްބައި މެމްބަރުންގެ އަޣްލަބިއްޔަތު ލިބިގެން ކަމަށްވާއިރު، އެހެންކަމުން މިއަދު މިރާއްޖޭގައި ޤާނޫނީ ސަރުކާރެއް ނެތް ކަމަށާއި، ޤާނޫނު އަސާސީގެ ބާރު ކަނޑުވާލުމުންދާ މަންޒަރު ބަލަން އެމްޑީޕީން މަޑުން ނުތިބޭނެ ކަމަށް އޭނާ ވިދާޅުވިއެވެ.
ޤާނޫނާއި ޚިލާފަށް މުޒާހަރާކުރި ކަމަށް ބުނެ މާޒް ސަލީމް މިހާރު ފުލުހަށް 14 މާރޗް ވާ ހުކުރު ދުވަހުގެ 16:00 އަށް، ގަލޮޅު ޕޮލިސް ސްޓޭޝަނަށް ހާޒިރު ވުމަށް އަންގާފައި ވެއެވެ. އޭނާ ފުލުހަށް ހާޒިރުވުމަށް އަންގާ ފޮނުވި ޗިޓުގައި، އޭނާ ފުލުހަށް ހާޒިރުވެ ބައްދަލުކުރަން ޖެހޭ ފުލުސް އޮފިސަރގެ ތަފްސީލް ހިއްސާކޮށްފައިވެއެވެ. އެ ޗިޓުގައި ބުނާ ގޮތުން އެ ބައްދަލުވުމަށް ހޭދަ ވާނީ އެއް ގަޑި އިރާއި ތިރީސް މިނިޓެވެ.
އެ ޗިޓުގައި ބުނެފައި ވަނީ މާރޗް 12 ވީ ބުދަ ދުވަހުގެ ރޭ މާލޭގައި މާޒް ސަލީމާއި އިތުރު ބަޔަކު ބައިވެރިވެގެން، ސުލްހަވެރިކަމާއި އެކު އެއްވެ އުޅުމުގެ މިނިވަންކަމުގެ ޤާނޫނާއި ޚިލާފަށް މާލޭ ސިޓީގެ އެކި މަގުތަކަށް އެއްވެ، އަޑުގަދަކޮށް އާއްމު ދަތުރުފަތުރަށް ހުރަސް އަޅާ އާއްމު މަސްލަހަތު ނަގާލަން މަސައްކަތް ކޮށްފައިވާ ކަމަށް ތުހުމަތުކުރެވޭ ކަމަށެވެ. މާޒް ސަލީމް ފުލުހަށް ހާޒިރުކުރަނީ އޭނާގެ މައްޗަށް ކުރެވޭ ތުހުމަތުތަކާއި ގުޅިގެން އޭނާ އާއި ސުވާލުކޮށް ބަޔާން ނެގުމަށް ކަމަށް ވެސް އެ ޗިޓުގައި ވަނީ ބުނެފައެވެ.
