މަޖިލިސް މެމްބަރުން އެވަރަށް ތިރިވީމާ އޭސީސީ ރައީސް ހާޒިރެއް ވެސް ނުކުރެވޭނެ: މައުރޫފް

މިނިވަން މުޢައްސަސާތަކުގެ މެމްބަރުން ޖަވާބުދާރީކުރުވަން އޮތްތަނަކީ ރައްޔިތުންގެ މަޖިލިސް ކަމަށް ވިޔަސް ގޮނޑިގެއްލޭ އިސްލާހާ ގުޅިގެން މަޖިލިސް މެމްބަރުން އެވަރަށް ތިރިވެވަޑައިގެން ތިއްބެވީމާ މަޖިލީހަށް ވެސް އޭސީސީގެ ރައީސް ހާޒިރުކޮށް ޖަވާބުދާރީކުރުވަން ޕީއެންސީ މެމްބަރުން ފުރުޞަތު ނުދޭނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފު ޒާކިރު ވިދާޅުވެއްޖެއެވެ. މައުރޫފު އެހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުންނެވެ.

މައުރޫފު ވިދާޅުވީ އޭސީސީގެ ރައީސް މިހާރު ސިޔާސީ ނުފޫޒުގައި ހުރެގެން އެކުރެއްވީ ކޮންކަމެއްކަން އެންމެނަށް އެނގޭ ކަމަށެވެ. އެހެން ނަމަވެސް އޭނާ ޖަވާބުދާރީކުރުވަން މަޖިލީހުގެ ކޮމެޓީއަކަށް ހާޒިރުކޮށްގެން ވެސް ޖަވާބުދާރީކުރުވުމަށް މަޖިލީހުގައި ތިއްބެވި ޕީއެންސީ މެމްބަރުން ހުރަސްއަޅުއްވާނީ ގޮނޑިގެއްލުވާލަފާނެ ކަމުގެ ބިރަށް ކަމަށް ވިދާޅުވިއެވެ.

ޤާނޫނު އަސާސީއަށް މަޖިލީހުގެ މެމްބަރުންގެ ގޮނޑިގެއްލޭނެ ގޮތްކަމަށް ބުނެ ފަހުން މިގެނެވުނު އިސްލާހު ޤާނޫނު އަސާސީއަށް ގެނައިނަމަވެސް އަދި އޭގެދަށުން ހަދަންޖެހޭ ޤާނޫނެއް ވެސް އޮއްވާ މަޖިލީހުގައި ތިއްބެވި ޕީއެންސީ މެމްބަރުން އެހާވަރަށް ތިރިވެވަޑައިގެން ކުޑަކަކޫ ޖައްސަވަން އަދި ނުޖެހޭ ކަމަށް މައުރޫފު ވިދާޅުވިއެވެ.

ރައްޔިތުންގެ މަޖިލީހުގައި ތިއްބެވި ޕީއެންސީ މެމްބަރުން އެމްޑީޕީ މެމްބަރުންނާ ދައްކަނީ ކޮންވާހަކަތަކެއްތޯ ވެސް އަހާ ކަމަށާ ، މެމްބަރުންގެ ފޯނު ބަލާ ހިސާބަށް ކަންކަން ގޮސްފައިވާ ކަމަށް މައުރޫފު ވިދާޅުވިއެވެ. އަދި އެމްޑީޕީ މެމްބަރުންނާ ވާހަކަދައްކާ ޕީއެންސީގެ މެމްބަރުން ތަޅުމުގައި ބާކީކުރަން ފަށައިފި ކަމަށް ވެސް އޭނާ ވިދާޅުވިއެވެ. މައުރޫފް ވިދާޅުވީ މަޖިލީހުގެ މެމްބަރު އަޒާނާމެދު މިހާރު ކަންތައްކުރަނީ އެގޮތަށް ކަމަށެވެ.