ރާއްޖޭގައި މިވަގުތު މިއޮތީ އެއްވެސް މިނިވަން ކަމެއް ނެތް، ރައްޔިތުން ތަމްސީލު ނުކުރެވޭ ދިމްޔާތުގެ މަޖިލީހެއް ކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ބުރާސްފަތި ދުވަހުގެ ރޭ ޕީއެންއެފުން ބޭއްވި ޖަލްސާގައި ވާހަކަދައްކަވަމުންނެވެ.

ރައީސް މުއިއްޒުގެ މި ސަރުކާރުން ކޯޓުތަކަށް އަތްބާނައި ޖުޑިޝަރީއަށް ނުފޫޒު ފޯރުވަމުންދާތީ، އެކަމަށް އިޝާރާތް ކުރައްވާ ޕީއެންއެފް ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ މި ގައުމުގައި ބަޔަކު ޤުރުބާނީތަކެއް ވެގެން ޤާނޫނުތަކެއް ހަދާފައި ވަނީ ވަރަށް މަތިވެރި މަޤްސަދެއްގައި ތިންބާރު ވަކިވާނޭ ގޮތަށް ކަމަށެވެ.

އަދި އެ ތިން ބާރު ވަކިވެގެން އަންނައިރު، އެ ތިންބާރު ގައި ވެސް ތިއްބަވާނީ ވަރަށް ތަހުޒީބު ބައެއް ކަމަށާއި އެގޮތުން ތިންބާރުގެ ތެރެއިން އެއްބާރު އަނެއްބާރަށް ނުފޫޒު ނުފޯރުވޭ ގޮތަށާއި އެއްބާރު އަނެއް ބާރަށް ނުފޫޒު ފޯރުވައިފި ނަމަ ފިޔަވަޅުވެއް އެޅޭނެ ގޮތަށް ކަމަށް ރައީސް ޔާމީން ވިދާޅުވިއެވެ.

އެހެން ނަމަވެސް ރާއްޖޭގެ ޤާނޫނު އަސާސީ ފަރުމާކުރިއިރުގައި މި އޮންނަނީ ރައްޔިތުންގެ މަޖިލީހަށް ހުރިހާ ބާރުތަކެއް ދޫކޮށްލާފައި ކަމަށެވެ.

ރައީސް ޔާމީން ވިދާޅުވީ ޖުޑިޝަރީގެ ބާރާއި ޖުޑީޝަރީ ހޮވުމާއި ޖުޑިޝަރީ ވަކިކުރުން ފަދަ ހުރިހާ ބާރެއް ދީފައި މި އޮންނަނީ ރައްޔިތުންގެ މަޖިލީހަށް ކަމަށާއި ރާއްޖޭގެ ގިނަ ބަޔަކު ގަބޫލުކުރާ ގޮތުން ރާއްޖޭގެ ރައްޔިތުންގެ މަޖިލީހަކީ އެއްވެސް ކަހަލަ މިނިވަންކަމެއް، އެއްވެސް ގޮތަކަށް ރައްޔިތުން ތަމްސީލުކޮށްދިނުމެއް އޮންނަ މަޖިލީހެއް ނޫން ކަމަށެވެ.

އަދި މިވަގުތު ރާއްޖޭގައި މިއޮތީ ދިމްޔާތުގެ މަޖިލީހެއް ކަމަށާއި މަތިގެއަކީ ދިމްޔާތު ކަމަށާއި އަދި ދަށުގެއަކީ ރައްޔިތުންގެ މަޖިލިސް ކަމަށް ޔާމީން ވިދާޅުވިއެވެ. އަދި ރާއްޖޭގައި މިހާރު މި ނުކުންނަ މައްސަލަތަކަކީ މިފަދައިން ކަންކަން ވެގެން ދިއުމުން ނުކުން މައްސަލަތައް ކަމަށް ވެސް ޔާމީން ވިދަޅުވިއެވެ.