ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ވާދަވެރި ބަޔާ ލެވަކޫސަނާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެއްޖެ އެވެ.

ބަޔާންގެ އަމިއްލަ ދަނޑު، އަލިއާންޒް އެރީނާގައި ބުދަ ދުވަހުގެ ރޭ ދަންވަރު ކުޅުނު މެޗު ބަޔާނުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބަޔާން އިން އެއް ލަނޑު ޖެހިއިރު، ދެ ވަނަ ހާފުގައި ވަނީ ތިން ލަނޑު ޖަހައިފަ އެވެ.

މެޗު ފަށައިގެން ނުވަ ވަނަ މިނެޓުގައި ބަޔާނަށް ލީޑު ނަގައިދިނީ ހެރީ ކޭން އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ މައިކަލް އޮލައިސޭ އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ޖަރުމަނުގެ ޖަމާލް މުސިއާލާ ވަނީ ބަޔާންގެ ދެ ވަނަ ލަނޑު ޖަހައި، ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފުގައި ލެވަކޫސަންގެ ޑިފެންޑަރު ނޯޑީ މުކިއޭލޭ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. އެއް ކުޅުންތެރިޔަކު މަދުކޮށް ކުޅެމުން ދިޔަ ލެވަކޫސަން ކޮޅަށް ބަޔާނުން ތިން ވަނަ ލަނޑު ޖެހީ އެ ޓީމަށް ލިބުނު ޕެނަލްޓީންނެވެ. އެ ލަނޑު ބަޔާނަށް ޖަހައިދިނީ ހެރީ ކޭން އެވެ.

ގަދަ 16 ވަނަ ބުރުގެ ފުރަތަމަ ލެގު ބަޔާނުން ކާމިޔާބު ކުރިއިރު، ލެވަކޫސަންގެ ދަނޑުގައި މި ދެ ޓީމު ކުޅޭ ދެ ވަނަ ލެގު އޮންނާނީ މާޗު މަހުގެ 12 ވަނަ ދުވަހު އެވެ. މުބާރާތުގެ ކުއާޓާ ފައިނަލް އިން ފުރުސަތު ބޭނުންވާ ނަމަ، ލެވަކޫސަނަށް ޖެހޭނީ އެ މެޗުގައި ތިން ލަނޑުގެ ތަފާތުން ބަޔާން ބަލި ކުރާށެވެ.