މި ސީޒަން ފެށިއިރު، ލިވަޕޫލަކީ އިނގިރޭސި ޕްރިމިއަރ ލީގަށް ވާދަކުރާނެ ޓީމެއްގެ ގޮތުގައި ޤަބޫލު ކުރި މީހުން މަދު ކަމަށް، އެ ޓީމަށް އިރުޝާދު ދެމުން އަންނަ އާން ސްލޮޓް ބުނެފި އެވެ.

އޭނާ މިހެން ބުނީ ލީގުގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. ސިޓީގެ އަމިއްލަ ދަނޑުގައި ކުޅުނު އެ މެޗުން މޮޅުވެ، ލިވަޕޫލުން ވަނީ ލީގު ތާވަލްގެ އެއް ވަނައިގައި ލީޑު ފުޅާ ކޮށްފަ އެވެ.

ސްލޮޓް ބުނީ ސިޓީ މެޗުގެ ކުރިން އެސްޓަން ވިލާއާ ދެކޮޅަށް ލިވަޕޫލް ކުޅުނު މެޗު އެއްވަރުވުމުން، ވަރަށް ގިނަ ބައެއްގެ ފާޑު ކިޔުންތައް އަމާޒުވަމުން ދިޔަ ކަމަށެވެ. އެގޮތުން ލިވަޕޫލްގެ ކުޅުމާއި، އެ ޓީމުގެ ޙާލަތު ރަނގަޅު ނޫން ކަމަށް ބައެއް ފަރާތްތަކުން ބުނެފައިވާ ކަމަށް ސްލޮޓް ބުންޏެވެ.

އެހެން ނަމަވެސް، އޭގެ ތިން ދުވަސް ފަހުން ސިޓީގެ އަމިއްލަ ދަނޑުގައި އެ ޓީމުގެ މައްޗަށް ކުރި ހޯދުމުން، މިއަދު އަނެއްކާ އެ ވާހަކަތައް ބަދަލުވެފައިވާ ކަމަށް ވެސް ސްލޮޓް ބުންޏެވެ.

މީގެ އިތުރުން ސްލޮޓް ބުނީ، ސިޓީގެ އިއްތިހާދު ސްޓޭޑިއަމްގައި މޮޅުވާން ބޭނުންވާ ނަަމަ، އަބަދު ވެސް އެންމެ އިސްކަމެއް ދޭން ޖެހޭނީ ޑިފެންސްގައި ރަނގަޅު ކުޅުމެއް ދެއްކުމަށް ކަމަށެވެ. ސްލޮޓް ޤަބޫލު ކުރާ ގޮތުގައި އެ މެޗުގައި ސިޓީ އަށް "މާބޮޑު" ފުރުސަތެއް ނުލިބެ އެވެ. އެއީ ލިވަޕޫލްގެ ޑިފެންސް ރަނގަޅުވުމުން ކަމަށް ވެސް އޭނާ ބުންޏެވެ.

ސިޓީ އަތުން މޮޅުވެ ލީގު ތާވަލްގައި ލިވަޕޫލަށް ލިބުނު ލީޑާ ގުޅޭ ގޮތުން ވާހަކަ ދައްކަމުން ސްލޮޓް ބުނީ، އެހެން ލީގުތަކުގައި އެވަރުގެ ލީޑަކުން "ފުއްދާލެވިދާނެ" ކަމަށެވެ. އެހެން ނަމަވެސް، ޕްރިމިއާ ލީގުގައި ކޮންމެ މެޗަކީ ވެސް ވަރަށް ބޮޑު ޗެލެންޖެއް ކަމަށާއި، އެތައް ޕްރެޝަރެއް ކަމަށް އޭނާ ވަނީ ސިފަކޮށްފަ އެވެ.

އިތުރަށް ވާހަކަ ދައްކަމުން ސްލޮޓް ބުނީ، އަބަދު ވެސް އޭނާ އަށް އިނގޭ ކަމެއް އޮންނަ ކަމަށެވެ. އެއީ މި ސީޒަން ފެށިގެން އައިއިރު، ލިވަޕޫލް އަކީ ޕްރިމިއާ ލީގުގެ ތައްޓަށް ވާދަކުރާ ޓީމެއްގެ ގޮތުގައި ދެކުނު މީހުން މަދުވުން ކަމަށް ސްލޮޓް ބުނެފައިވެ އެވެ.

އޭނާ ބުނީ ސިޓީން ލީގަށް ވާދަ ނުކުރާ ނަމަ، ލީގު ރޭޙުގެ ކުރީގައި އޮތް ޓީމާއި، ސިޓީއާ ދެމެދު މިހާރު އޮތް ވަރުގެ ބޮޑު ފަރަގެއް އޮންނާނެ ކަމަށް އެއްވެސް މީހަކު އުންމީދު ވެސް ނުކުރާނެ ކަމަށެވެ.

ސްލޮޓްގެ އިރުޝާދުގެ ދަށުން ލިވަޕޫލުން އަންނަނީ މި ސީޒަންގައި ރަނގަޅު ނަތީޖާތަކެއް ނެރެމުންނެވެ. މިހާތަނަށް ލީގުގައި ކުޅެފައިވާ 27 މެޗުން ލިވަޕޫލަށް ލިބެނީ 64 ޕޮއިންޓެވެ. މި ސީޒަންގެ ލީގުގައި ލިވަޕޫލް ބަލިވެފައި ވަނީ ވެސް އެންމެ މެޗަކުންނެވެ.