ވިލްޝެއާގެ ފަޔަށް ލިބުނު ބޮޑު އަނިޔާއާއެކު ސީޒަން ނިންމާލައިފި

ލޯން އެއްބަސްވުމެއްގެ ދަށުން އޭއެފްސީ ބޯންމައުތަށް ކުޅެމުން އަންނަ އާސެނަލްގެ މިޑްފިލްޑަރު ޖެކް ވިލްޝެއާގެ ފަޔަށް ލިބުނު ބޮޑު އަނިޔާއާއެކު އޭނާ އަށް ސީޒަން ނިމިއްޖެ އެވެ.

އުމުރުން 25 އަހަރުގެ ވިލްޝެއާ އަށް އަނިޔާވީ ޕްރިމިއާ ލީގުގައި ޓޮޓެންހަމް ހޮޓްސްޕާ އަތުން 0-4 ގެ ނަތީޖާއިން ބޯންމައުތް ބަލިވި މެޗުގައެވެ. އެ މެޗުގައި ވިލްޝެއާގެ ވާތު ފައިގައި ވަނީ ރެނދެއް ލާފައެވެ. މި އަނިޔާއަކީ މިދިޔަ ސީޒަނުގައިވެސް ވިލްޝެއާ ކުރިމަތިލާންޖެހުނު ފަދަ އަނިޔާއެކެވެ. އެގޮތުން މިދިޔަ ސީޒަނުގައިވެސް އޭނާ ދިގު މުއްދަތަކަށް ކުޅުމާ ދުރުގައި ހުންނަންޖެހުނެވެ.

އާސެނަލް އިން ނެރުނު ބަޔާނެއްގައި ބުނީ ވިލްޝެއާގެ ފަޔަށް ލިބުނު އަނިޔާ ތަހުލީލު ކުރުމަށް ޓެސްޓުތަކެއް ހަދާ ސްކޭނެއް ކޮށްފައިވާ ކަމަށެވެ. އެ ސްކޭންތަކުން ދައްކާގޮތުގައި ވިލްޝެއާގެ ވާތުފައިގައި ރެނދެއްލާފައިވާ ކަމަށް އެ ބަޔާނުގައި ވަނީ ބުނެފައެވެ.

އެހެންނަމަވެސް އާސެނަލް އިން ބުނީ މެޗަށްފަހު ނެގި އެކްސްރޭ އިން ރެނދެއް ލާފައިވާކަމަށް ނުދައްކާ ކަމަށާއި، ރެނދެއްލާފައިވާކަން އެނގުނީ ފަހުން ހެދި ސްކޭންތަކުން ކަމަށެވެ.

އާސެނަލް އިން ބުނީ ވިލްޝެއާ އަށް ލިބުނު އަނިޔާއާ ގުޅިގެން އޭނާ ކުޅުމާ ދުރުގައި ހުންނަންޖެހޭ މުއްދަތު އަދި ކަށަވަރުނުވާ ކަމަށާއި، އެހެންނަމަވެސް ކުރިޔަށް އޮތް ސީޒަން ފެށޭ ކޮޅަށް އޭނާ ފިޓްވާނެކަމަށް ބެލެވޭ ކަމަށެވެ.

ވިލްޝެއާ އަށް އަނިޔާވީ އާސެނަލްއާއެކު ދިގު މުއްދަތެއްގެ އެއްބަސްވުމަކާ ބެހޭގޮތުން މަޝްވަރާކުރަމުން އަންނަ ދަނޑިވަޅެއްގައެވެ. އާސެނަލްއާއެކު ވިލްޝެއާ ހަދާފައިވާ އެއްބަސްވުމުގައިވާގޮތުން 2018 ވަނަ އަހަރުގެ ނިޔަލަށް އޭނާ ކްލަބުގައި މަޑުކުރަން ޖެހެއެވެ.

އާސެނަލް އިން 2008 ވަނަ އަހަރު ކެރިޔަރު ފެށި ވިލްޝެއާ ވަނީ އެޓީމުގައި މިހާތަނަށް ހޭދަކުރި ނުވަ ސީޒަނުގައި 159 މެޗު ކުޅެ 12 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެ ކްލަބާއެކު އެފްއޭކަޕް ދެފަހަރު އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.

ބޮލްޓަންއަށް ލޯނު އެއްބަސްވުމެއްގެ ދަށުން 2009 ވަނަ އަހަރު އާސެނަލް އިން ބަދަލުވެ 14 މެޗު ކުޅެފައިވާ ވިލްޝެއާ މިވަގުތު ހުރީ ލޯން އެއްބަސްވުމެއްގެ ދަށުން އޭއެފްސީ ބޯންމައުތްގައެވެ. އެގޮތުން މިހާތަނަށް އޭނާ ވަނީ އެ ކްލަބަށް 20 އަށްވުރެ ގިނަ މެޗު ކުޅެދީފައެވެ.