ކްލަބް ވެލެންސިއާ ބަލިކުރުމަށްފަހު ސީޒަން ހުޅުވާ ޗެރިޓީ ޝިލްޑް މެޗު މާޒިޔާ ސްޕޯޓްސް އެންޑް ރެކްރިއޭޝަނުން ކާމިޔާބުކޮށް ޝިލްޑް އުފުލާލައިފިއެވެ.
ބުރާސްފަތި ދުވަހު ހަވީރު ކުޅުނު މި މެޗު ވެލެންސިއާއާ ވާދަކޮށް މާޒިޔާ މެޗު ކާމިޔާބުކުރީ 0-1 ގެ ނަތީޖާއިންނެވެ.
ގަލޮޅު ރަސްމީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ މާޒިޔާ އެވެ. އެގޮތުން ލަނޑު ޖަހަން ގިނަ ފުރުސަތުތަކެއް މާޒިޔާ އަށް މެޗުގެ ކުރީކޮޅު ވަނީ ލިބި ބޭކާރުވެފައެވެ.
ފުރަތަމަ ހާފްގައި ވެލެންސިއާގެ ފަރާތުން ޑިފެންސިވް ކުޅުމެއް ފެނިގެންދިޔައިރު، ލަނޑު ޖަހަން އެޓީމަށް މާ ރަނގަޅު އެޓޭކްތަކެއް އުފެއްދިފައެއް ނުވެއެވެ.
ފުރަތަމަ ހާފްގައި ލަނޑު ޖެހުމަށް އެންމެ ރަނގަޅު ފުރުސަތުތައް ލިބުނީ މާޒިޔާގެ އަސދުﷲ އަށެވެ. އެހެންނަމަވެސް އޭނާ ފޮނުވާލި ހުރިހާ ހަމަލާތައް ވެލެންސިއާގެ ކީޕަރު ފައިސަލް ވަނީ ދިފާއުކޮށްފައެވެ.
ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.
ދެވަނަ ހާފް ފެށިގެން ވެލެންސިއާ އިން އެޓީމުގެ ކުޅުން ރަނގަޅުކޮށްފައިވާއިރު، ލަނޑު ޖެހުމަށްވެސް އެޓީމުންދިޔައީ ފުރުސަތުތައް ތަނަވަސްކުރަމުންނެވެ. އެހެންނަމަވެސް މާޒިޔާ އިން ވަނީ ވެލެންސިއާގެ ހަމަލާތައް ދިފާއުކޮށްފައެވެ.
މާޒިޔާ އިން މެޗުގެ ލީޑު ނެގީ 72 ވަނަ މިނެޓުގަ އެވެ. މި ލަނޑު އެޓީމަށް ކާމިޔާބުކޮށްދިނީ އަސަދުﷲ އަބްދުﷲ އެވެ. މި ލަނޑު އޭނާ ކާމިޔާބުކުރީ ރަކިޗް ފޮނުވާލި ހިލޭޖެހުން ރީބައުންޑުވެގެން މުޅިން ހުހަށް ލިބުމާއެކު އެއްފަހަރުން ކުރިޔަށް ފޮނުވާލައިގެންނެވެ.
މި ލަނޑަށްފަހުވެސް މާޒިޔާ އަށް ވަނި ލަނޑު ޖެހުމަށް ގިނަ ފުރުސަތުތަކެއް ލިބިފައެވެ. އެގޮތުން އިތުރުވަގުތުގައި އަސަދުﷲ އަށް މުޅިން ހުހަށް ލިބުނު ފުރުސަތު ހިމެނެއެވެ. އޭނާ އެ ބޯޅަ ފޮނުވާލިއިރު، ކީޕަރު ވަނީ ދިފާއުކޮށްފައެވެ.
