މެންޗެސްޓަރ ސިޓީގެ ކުޅުމާ މެދު އެއްވެސް ކަންބޮޑުވުމެއް ނެތް ކަމަށާއި، ސިޓީގެ މުސްތަޤުބަލު އޮތީ ވަރަށް އުޖާލާކޮށް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ލިވަޕޫލާ ދެކޮޅަށް ކުޅުނު މެޗުން ސިޓީ ބަލިވެފައި ވަނިކޮށެވެ. މި ސީޒަންގައި ސިޓީގެ ނަތީޖާތައް ދަށްވެފައިވާއިރު، އަމިއްލަ ދަނޑުގައި ކުޅުނު އެ މެޗުން ސިޓީ ވަނީ ބަލިވެފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުންް ގާޑިއޯލާ ބުނީ، އެ މެޗުގައި ސިޓީން ދެއްކީ ރަނގަޅު ކުޅުމެއް ކަމަށެވެ. އޭނާ ބުނީ ސިޓީ އަށް ލިބޭ ފުރުސަތުތައް ނިންމުމާއި، ނުރައްކާތެރި ހަމަލާތަކެއް އުފެއްދުމުގައި ސިޓީ އިތުރަށް ހަރުދަނާ ވާން ޖެހޭ ކަމަށެވެ.

އެހެން ނަމަވެސް، ޖުމުލަ ގޮތެއްގައި އެ މެޗުގައި ސިޓީން ކުޅުނީ ވަރަށް ރަނގަޅަށް ކަމަށާއި، ހުރިހާ ކުޅުންތެރިންގެ ފަރާތުން ވެސް ފެނުނީ އޭނާ ހިތްހަމަ ޖެހޭ ކަހަލަ ކަންތައްތަކެއް ކަމަށް ގާޑިއޯލާ ބުންޏެވެ. މެޗުގެ ފުރަތަމަ ހާފަށް އިޝާރާތް ކުރަމުން ގާޑިއޯލާ ބުނީ، އެއީ 50-50 ގެ ހާފެއް ކަމަށެވެ.

މެޗުގެ ދެ ވަނަ ހާފަށް ބަލާއިރު، ލިވަޕޫލް ފެނުނީ ޑިފެންސްގައި ވަރަށް ވަރުގަދަކޮށް ކަމަށާއި، ސިޓީން ދިޔައީ މިދިޔަ އަހަރުތަކުގައި އެ ޓީމުން ކުރަމުން އައި މަސައްކަތް ކުރަމުން ކަމަށް ގާޑިއޯލާ ބުންޏެވެ. ޚާއްސަކޮށް އިދިކޮޅު ޓީމުގެ އޭރިޔާ ތެރެއަަށް ވަދެ، ނުރައްކާ ކުރުމަށް ސިޓީން މަސައްކަތް ކޮށްފައިވާ ކަމަށް އޭނާ ބުނެފައިވެ އެވެ.

މީގެ އިތުރުން ގާޑިއޯލާ ބުނީ، ސިޓީގެ މުސްތަޤުބަލު އޭނާ އަށް ފެންނަނީ ވަރަށް އުޖާލާކޮށް ކަމަށެވެ. ޚާއްސަކޮށް އަންނަ ސީޒަނާ ސިޓީން ކުރިމަތިލާެއިރު، މިހާރު ބިނާ ކުރެވޭ ޓީމެއްގެ ފުރިހަމަކަން ފެންނާނެ ކަމަށް ވެސް ގާޑިއޯލާ ބުންޏެވެ. އަދި އޭނާ ބުނީ ސިޓީގައި ތިބި ތަޖުރިބާކާރު ކުޅުންތެރިންނާއި، ޒުވާން ކުޅުންތެރިންނާ އެކު އަދި ވެސް އެ ޓީމު ކުރިއަށް ދާނެ ކަމަށެވެ.

ގާޑިއޯލާގެ އިރުޝާދުގެ ދަށުން މިދިޔަ ހަތަރު ސީޒަންގައި ވެސް ސިޓީން ވަނީ ޕްރިމިއާ ލީގު ކާމިޔާބު ކޮށްފަ އެވެ. އަދި ސިޓީގެ ތާރީޚުގައި ފުރަތަމަ ފަހަރަށް ޔުއެފާ ޗެމްޕިއަންސް ލީގު ކާމިޔާބު ކުރީ ވެސް ގާޑިއޯލާގެ އިރުޝާދުގެ ދަށުންނެވެ.

އެހެން ނަމަވެސް، މި ސީޒަންގައި ސިޓީގެ ނަތީޖާތައް ވަނީ ވަރަށް ބޮޑަށް ދަށްވެފަ އެވެ. ސިޓީ އާއި އެއް ވަނައިގައި އޮތް ލިވަޕޫލާ ދެމެދު މިހާރު 20 ޕޮއިންޓުގެ ފަރަގެއް އެބަ އޮތެވެ. އަދި ޔުއެފާ ޗެމްޕިއަންސް ލީގުގެ ޕްލޭ އޮފް މެޗުން ބަލިވެ، ސިޓީ ވަނީ އެ މުބާރާތުން ވެސް ކަޓައިފަ އެވެ.