މިލަންދޫ އަށް ތައުރީފް ހައްގު، ބްރޭކަށް ދިއުމުގެ ކުރިން މޮޅެއް ބޭނުން: ނިޒާމްބެ
22 އޯގަސްޓު 2017 | އަންގާރަ 14:19މިލަންދޫ އަކީ ތޯތޯ ޓީމެއް ނޫންކަން ދައްކުވައިދީފި
ޓީސީ ސްޕޯޓްސް ކްލަބްގެ ކޯޗު މުހައްމަދު ނިޒާމް (ނިޒާމްބެ)
ށ.މިލަންދޫ އިން ދައްކަމުން އަންނަ ކުޅުމަށް ތައުރީފް ހައްގު ކަމަށާއި، ބްރޭކަށް ދިއުމުގެ ކުރިން މޮޅެއް ބޭނުންވާ ކަމަށް ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.
އުރީދޫ ދިވެހި ޕްރިމިއާ ލީގުގައި ބުދަ ދުވަހު ހަވީރު މިލަންދޫއާ ދެކޮޅަށް ނިކުތުމުގެ ކުރިން ނޫސްވެރިންނަށް މައުލޫމާތު ދެމުން ނިޒާމްބެ ބުނީ މެޗަކަށް ފަހު މެޗެއް މިލަންދޫ އިން ދައްކަމުން އަންނަ ކުޅުމަށް ތައުރީފް ހައްގު ކަމަށާއި، މާޒިޔާއާ ދެކޮޅަށް ކުޅުނު މެޗުގައިވެސް އެޓީމަކީ ތޯތޯ ޓީމެއް ނޫންކަން ދައުކުވައިދީފި ކަމަށެވެ.
ނިޒާމްބެ ބުނީ މާޒިޔާއާ ދެކޮޅަށް މިލަންދޫ އިން ދެއްކި ކުޅުމަކީ ފާހަގަކޮށްލެވޭ ކުޅުމެއް ކަމަށާއި، އެކަމަށް ޓީސީން ސަމާލުވާނެ ކަމަށެވެ. އެގޮތުން އޭނާ ބުނީ އެންމެ އުނދަގޫވާނީ މިލަންދޫ ޓީމުގައި ތިބި ގިނަ ކުޅުންތެރިންނަކީ އެހާބޮޑަށް ކުޅުން ނޭނގޭ ކުޅުންތެރިން ކަމަށާއި، އެންމެ މިނެޓަކީވެސް ދަނޑުމަތީގައި ފަސޭހަ މިނެޓަކަށް ވެގެންނުދާނެ ކަމަށެވެ.
ބްރޭކަކަށްދާއިރު މޮޅަކާއެކު ދިޔުމަކީ ޓީމަށް ލިބޭނެ ވަރަށް ބޮޑު ހިތްވަރަކަށްވާނެ ކަމަށާއި، ކުރިޔަށް ހުރި މެޗުތަކަށް އެކަމުގެ ސަބަބުން މޯޓިވޭޝަން އިތުރުވެގެންދާނެ ކަމަށެވެ. އެހެން ނަމަވެސް ބްރޭކެއްގައި މެޗުތަކެއް ނުކުޅެ ހަމައެކަނި ޕްރެކްޓިސްތަކެއް ކުރަންޖެހުމަކީ އެހާ ފަސޭހަކަމެއް ނޫން ކަމަށް ދެކޭ ކަމަށެވެ.
މީގެއިތުރުން ނިޒާމްބެ ބުނީ ބްރޭކަށް ފަހު ނިކުންނައިރު ހުރީ ވަރަށް ވަރުގަދަ މެޗުތައް ކަމަށާއި، އެ މެޗުތަކަކީ ލީގު ހޯދުމަށް ކޮންމެހެން ޕޮއިންޓްތަކެއް ހޯދަން ޖެހޭ މެޗުތަކެއް ކަމަށެވެ.
ޓީސީ އަދި މިލަންދޫ ބައްދަލު ކުރާ މެޗު ބުދަ ދުވަހު ކުޅޭއިރު، މެޗު ފަށާނީ ހަވީރު 16:00 ޖަހާއިރެވެ.
