ކުޅުދުއްފުއްޓާއި މިލަންދޫގައި އަޅާ އިންޑޯ ކޮމްޕެލެކްސްތަކުގެ އެއްބަސްވުމުގައި ސޮއިކޮށްފި

ސްޕޯޓްސް އެރީނާ މަޝްރޫއުގެ ދަށުން ހދ. ކުޅުދުއްފުއްޓާއި ށ.މިލަންދޫގައި ގިނަ އިންޑޯ ކުޅިވަރުތަކެއް ހިމެނޭގޮތަށް ގާއިމްކުރާ އިންޑޯ ކޮމްޕެލެކްސްތަކުގެ އެއްބަސްވުމުގައި ސޮއިކޮށްފިއެވެ.

މިނިސްޓްރީ އޮފް ޔޫތު އެންޑް ސްޕޯޓްސްގައި ހޮނިހިރު ދުވަހު ބޭއްވި ރަސްމިއްޔާތެއްގައި ސްޕޯޓްސް ކޮމްޕެލެކްސް އެޅުމަށް ހަވާލުކޮށްފައިވަނީ ކިއު.ވަން މޯލްޑިވްސް ޕްރައިވެޓް ލިމިޓެޑާއެވެ.

އެގޮތުން މި އެއްބަސްވުމުގައި ސޮއިކުރެވުނު ކޮންޓްރެކްޓާ ކިއު.ވަން މޯލްޑިވްސްއާ ހދ. ކުޅުދުއްފުއްޓާއި ށ.މިލަންދޫގައި އަޅާ ދެ ސްޕޯޓްސް ކޮމްޕްލެކްސް ވަނީ ހަވާލުކޮށްފައެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރ އޮފް ޔޫތް އެންޑް ސްޕޯޓްސް އިރުތިޝާމް އާދަމް ވިދާޅުވީ ހދ. ކުޅުދުއްފުށީގައި ގާއިމް ކުރެވޭ އިންޑޯ ކޮމްޕްލެކްސް އަކީ މިނިސްޓްރީގެ ބަޖެޓުން 4.6 މިލިއަނަށްވުރެ ގިނަ ދިވެހި ރުފިޔާ ހަރަދުކުރަން ނިންމާފައިވާ މަޝްރޫއެއްކަމަށާއި، ސްޕޯޓްސް އެރީނާ މަޝްރޫއުގެ ދަށުން ހދ. ކުޅުދުއްފުށީގެ ފުޓްސަލް ދަނޑަކާއި، ބާސްކެޓް ކޯޓް، ނެޓްބޯޅަ ކޯޓް އަދި ވޮލީ ކޯޓުގެ މަސައްކަތް ކުރިޔަށް ގެންދަން މީގެކުރިންވެސް ނިންމާފައިވާނެ ކަމަށެވެ.

މީގެއިތުރުން މިނިސްޓަރު އިރުތިޝާމް ވިދާޅުވީ ހދ. ކުޅުދުއްފުށީގެ ޒޯން ސްޓޭޑިއަމް މަރާމާތުކުރުމުގެ މަސައްކަތް އެމް.އާރު.ޑީ.ސީއާ ހަވާލު ކޮށް އިތުރު ފުޓްސަލް ދަނޑެއްގެ މަސައްކަތް ކުރުމަށް ވާނީ ޓްރައިކޯ އިންވެސްޓްމެންޓާއި ހަވާލު ކުރެވިފައިކަމަށެވެ.

މިނިސްޓަރ ވިދާޅުވީ ށ. މިލަންދޫގައި ގާއިމް ކުރެވޭ އިންޑޯ ކޮމްޕްލެކްސް އަކީ މިނިސްޓްރީގެ ބަޖެޓުން 4.7 މިލިއަނަށްވުރެ ގިނަ ދިވެހި ރުފިޔާ ހަރަދުކުރަން ނިންމާފައިވާ މަޝްރޫއެކެވެ. އަދި ށ.މިލަންދޫގައި ފުޓުބޯޅަ ދަނޑު ލެވެލް ކުރުމުގެ މަސައްކަތް ނިންމާފައިވާއިރު، ވިނަ އިންދުމުގެ މަސައްކަތް ވާނީ ޓެންޑަރ ޕްރޮސެސިންގެ ތެރޭގައިކަމަށްވެސް މިނިސްޓަރު ވިދާޅުވިއެވެ.

ސްޕޯޓްސް އެރީނާ މަޝްރޫއުގެ ދަށުން ށ.މިލަންދޫއަށް މިހާތަނަށްވަނީ 3 މިލިއަނަށްވުރެ ގިނަ ދިވެހި ރުފިޔާ ހަރަދުކުރެވިފައިވާކަމަށްވެސް މިނިސްޓަރު ވިދާޅުވި އެވެ.

ކުޅުދުއްފުށި އަދި މިލަދޫގައި ކުރިޔަށްގެންދަން ހަމަޖެހިފައިވާ މި މަޝްރޫއު އަށް ކަނޑައެޅިފައިވާ މުއްދަތު ކަމަށްވާ، ޑިސެމްބަރު 2017 ގެ ނިޔަލަށް މަސައްކަތް ނިންމާލަން ހަލުވިކަމާއެކު ކުރިޔަށް ދާނެކަމުގެ ޔަގީންކަން ކިއު.ވަން މޯލްޑިވްސް އިން ވަނީ މިނިސްޓަރ އިރުތިޝާމް އަށް ދެއްވާފައެވެ.