ހުރިހާ މެޗެއް ކާމިޔާބުކޮށްގެން ފުރަތަމަ ބުރު ނިންމާލެވުމަކީ ބޮޑު ކާމިޔާބީއެއް ކަމަށާއި، ހުރިހާ ށުކުރެއް ހައްގުވަނީ ކުޅުންތެރިންނަށް ކަމަށް މާޒިޔާގެ ކޯޗް މާޔަން ސެކުލޮސްކީ ބުނެފިއެވެ.

އެސްޓީއޯ މާލެ ލީގުގައި ހުކުރު ދުވަހުގެ ރޭ ޓީސީ އަތުން ހޯދި މޮޅާއެކު، ހުރިހާ މެޗެއް ކާމިޔާބުކޮށްގެން ފުރަތަމަ ބުރު ނިންމާލުމަށްފަހު މީޑިއާތަކާ ވާހަކަ ދައްކަމުން މާޒިޔާގެ ކޯޗް ސެކުލޮސްކީ ބުނެފައިވަނީ، މެޗުގައި ކުޅުންތެރިން ކުޅެމުން ދިޔައީ ވަރަށް ވަރުބަލިކޮށް ކަމަށާއި، އެހެން ނަމަވެސް ޓީސީ އަތުން 3-0 ގެ ނަތީޖާއެއް ނެރެވުން ކުޅުންތެރިން ކުރި ބުރަ މަސައްކަތް ހާމަވެގެން ހިންގައްޖެ ކަމަށެވެ. އެހެންކަމުން މެޗުގައި މި ލިބުނު ނަތީޖާގެ ހުރިހާ ޝުކުރެއްވެސް ހައްގުވަނީ ކުޅުންތެރިންނަށް ކަމަށްވެސް ކޯޗް ވަނީ ބުނެފައެވެ.

އިތުރަށް ވާހަކަ ދައްކަމުން ކޯޗު ބުނީ މާޒިޔާ އާއި ދެކޮޅަށް ކުޅެން ޖެހުމަކީ ހަގީގަތުގައި ލީގުގެ ކޮންމެ ޓީމަކަށްވެސް ލިބޭ އެޑްވާންޓޭޖެއް ކަމަށާއި، ސަބަބަކީ މާޒިޔާ އާއި ހިލާފަށް އެހެން ކޮންމެ ޓީމަކަށްވެސް ކުރިއަށް އޮންނަ މެޗަށް ތައްޔާރުވުމަށް ވަގުތު ލިބޭތީ ކަމަށެވެ. އެގޮތުން ކޯޗު ބުނީ ލީގުގައި މެޗެއް ނުކުޅެ ދެ ހަފްތާވަރު ލިބޭ ޓީމުތަށްވެސް އެބަ ތިބި ކަމަށާއި ނަމަވެސް މާޒިޔާއަށް ދެ ހަފްތާތެރޭގައި 4 މެޗު ކުޅެން ޖެހޭ ފަހަރުވެސް އަންނަ ކަމަށެވެ.

މާލެ ލީގާއި އޭއެފްސީ ކަޕްގެ ގްރޫޕް ސްޓޭޖުގައި މާޒިޔާއިން ކުޅެމުން އަންނައިރު އެޓީމަށް، ފުލުފުލު ގައި މެޗުތަށް ހުރުމުން ކޯޗު ސެކުލޮސްކީ އަންނަނީ ތަކުރާރުކޮށް އެވާހަކަ ފާހަގަ ކުރަމުންނެވެ. އެގޮތުން ޓީމުގެ ކުޅުންތެރިންނަށް ފުރިހަމައަށް އަރާމުކުރަން ފުރުސަތު ނުލިބޭތީ ކޯޗް އަންނަނީ އެކަމާ ކަންބޮޑުވުން ފާޅުކުރަމުންނެވެ.

100 ޕަސެންޓް މޮޅާއިއެކު ފުރަތަމަ ބުރު މިންމާލިއިރު މާޒިޔާއިން އެއްވަނާގައި އޮތީ 21 ޕޮއިންޓާއެކުގައެވެ. ދެވަނާގައި އޮތް ނިއުރޭޑިއަންޓަށް ލިބިފައިވަނީ 15 ޕޮއިންޓެވެ. ތިން ވަނާގައި 13 ޕޮއިންޓާއެކު މުޅިން އަލަށް ލީގަށް ކޮލިފައިވެ މޮޅު ކުޅުމެއް ދައްކަމުން އަންނަ ގްރީން ސްޓްރީޓް އޮތް އިރު، ހަތަރު ވަނާގައި އޮތީ 10 ޕޮއިންޓާއެކު އީގަލްސް އެވެ. 5 ވަނާގައި އޮތް ޓީސީއަށް އީގަލްސް އާއި އެއްވަރަށް ޕޮއިންޓް ލިބިފައި ވީ ނަމަވެސް އީގަލްސް އަށް ކުރި ލިބެނީ ގޯލުގެ ތަފާތުންނެވެ.

މާލެ ލީގުގެ ފުރަތަމަ ބުރު ފުރުހަމަ ކަމާއެކު ނިންމާލި އިރު މާޒިޔާއަށް ކުރިއަށް އޮތް ދެ މެޗަކީވެސް އޭއެފްސީ ކަޕް ގްރޫޕް ސްޓޭޖުގެ ދެ މެޗެވެ. އެގޮތުން މިމަހުގެ 17 ވަނަ ދުވަހު، ބަންގްލަދޭޝްގެ ޑާކާ އަބަހާނީ ލިމިޓެޑާ ދެކޮޅަށް ނިކުންނަން ޖެހޭއިރު މިމަހުގެ 31 ވަނަ ދުވަހު އެޓީމުން ނިކުންނާނީ އިންޑިއާގެ ބެންގަލޫރު އެފްސީ އާއި ދެކޮޅަށެވެ.