ޓީސީއާ ދެކޮޅަށް އީގަލްސްގެ އަސްލު ކުޅުން ދެއްކޭ ގޮތް ނުވި ކަމަށާއި، މިއީ ޓީސީ އަށް ހައްގު މޮޅެއް ކަމަށް އީގަލްސްގެ އެސިސްޓެންޓް ކޯޗު އަހުމަދު ޝާކިރު (ޝާކިއްޓެ) ބުނެފި އެވެ.
މެޗަށްފަހު ނޫސްވެރިންނަށް މައުލޫމާތު ދެމުން ޝާކިއްޓެ ބުނީ ޓީމު މެޗަށް ނިކުތީ ވަރަށް މުހިންމު ތިން ކުޅުންތެރިޔަކު ނުލާ ބޮޑު ބަދަލަކާއެކު ކަމަށެވެ.
އެގޮތުން އޭނާ ބުނީ މިއީ އީގަލްސް އަށް މެޗުގައި މަސައްކަތްކުރަންޖެހޭ ވަރަށް މަސައްކަތް ނުކުރެވި ޓީސީން މެޗުން މޮޅުވާން ބުރަކޮށް މަސައްކަތްކުރުމުގެ ނަތީޖާ ކަމަށެވެ.
ޝާކިއްޓެ ބުނީ މުހިންމު ކުޅުންތެރިން ނެތްތަންވެސް ޓީމުން ދެއްކި ކަމަށާއި، އެހެންނަމަވެސް އެ ކުޅުންތެރިންގެ ބަދަލުގައި އެރި ކުޅުންތެރިންގެ ފަރާތުންވެސް ރަނގަޅު ކުޅުމެއް ފެނިގެންގޮސްފައިވާ ކަމަށެވެ. އޭނާ ބުނީ ޓީމަށް ބޮޑު ބަދަލެއް އައުމާއެކު އެއަށް ހޭނެން ދުވަސްނަގާނެ ކަމަށެވެ.
ޕޮއިންޓެއް ނުލިބި ދިޔުމުން ގަދަ ހަތަރަކަށް ކުރަމުންދާ މަސައްކަތަށް އިތުރު އުނދަގޫތަކެއް ކުރިމަތިވިކަން ފާހަގަކުރަމުން ޝާކިއްޓެ ބުނީ އަދިވެސް އީގަލްސް އިން އުންމީދު ކަނޑާލާފައިނުވާ ކަމަށެވެ. އެގޮތުން ކުރިޔަށް އެއް ބުރު އޮތުމުން ފުރުސަތު އެބައޮތް ކަމަށެވެ.
އީގަލްސް މި ސީޒަނުގައި ފަސް މެޗު ކުޅެފައިވާއިރު، އެޓީމު މޮޅުވެފައިވަނީ އެންމެ ދެ މެޗުންނެވެ. ދެ މެޗުން އެޓީމު ބަލިވެފައިވާއިރު، އަނެއް މެޗު ނިމުނީ އެއްވަރުވެގެންނެވެ.
