ބުފޮން އަށް "ބެލަންޑިއޯ" އެވޯޑް ހައްގު: އެމްބާޕޭ
27 މެއި 2017 | ހޮނިހިރު 11:20ގިނަ ފަރާތްތަކަކުން އަންނަނީ ބުފޮން އަށް އެވޯޑް ހައްގު ކަމަށް ބުނަމުން
ޗެމްޕިއަންސް ލީގުގެ ނޮކްއައުޓް ސްޓޭޖުގައި ޔުވެންޓަސް އާއި މޮނާކޯ ބައްދަލުކުރި މެޗުގެ ތެރެއިން
ޔުވެންޓަސްގެ ކީޕަރު ބުފޮން އަށް މިފަހަރުގެ ބެލެންޑޯ އެވޯޑް ހައްގު ކަމަށާއި، ނަމަވެސް އެވޯޑް ހާސިލް ކުރާނެ ކަމަށް ބޮޑަށް ބެލެވެނީ އެންމެ ފަހުންވެސް މި އެވޯޑް ހާސިލްކޮށްފައިވާ ކްރިސްޓިއާނޯ ރޮނާލްޑޯ ކަމަށް، މޮނާކޯ އަށް ކުޅެމުން އަންނަ ފްރާންސްގެ ތަރި އެމްބާޕޭ ބުނެފިއެވެ.
ބޭރުގެ ކުޅިވަރު ހަބަރު ފަތުރާ މީޑިއާއެއް ކަމަށްވާ "ޔޫރޯ ސްޕޯޓްސް" އަށް އެމްބާޕޭ ދިން އިންޓަވިއުއެއްގައި އޭނާ ބުނެފައި ވަނީ، މި ސީޒަނުގައި ބުފޮން ދެއްކި ކުޅުމަށް ބަލާނަމަ ގޯލްޑެން ބޯލް ނުވަތަ ބެލެންޑޯ އެވޯޑް އޭނާ އަށް ހައްގު ކަމަށާއި، ނަމަވެސް ކުރިއަށް އޮތް ޗެމްޕިއަންސް ލީގުގެ ފައިނަލުން ނިކުންނަ ނަތީޖާއެއް މި އެވޯޑުގައި ބޮޑު ދައުރެއް އަދާކުރާނެ ކަމަށެވެ. އެގޮތުން ރެއާލް އާއި ވާދަކޮށް ޔުވެންޓަސް ލީގު ހޯދައިފި ނަމަ ބެލެންޑޯ ލިބުމުގެ ފުރުސަތު ބޮޑީ ބުފޮން ކަމަށްވެސް އޭނާ ވަނީ ފާހަގަ ކޮށްފައެވެ.
އިތުރަށް ވާހަކަ ދައްކަމުން އެމްބާޕޭ ބުނީ، އޭނާގެ ހިތުގައި ރެއާލް މެޑްރިޑާމެދު ހިތް ބުރަކަމެއް ނޯންނާނެ ކަމަށާއި، ރެއާލްގެ ކޯޗު ޒިދާން އަކީ އޭނާ ހިތުގައި ފުޓުބޯޅަ އަށް ލޯބި ޖެއްސި ކުޅުންތެރިޔާ ކަމަށެވެ. އެގޮތުން އޭނާ ބުނެފައިވަނީ، އެންމެ ކުޑައިރުންސުރެ އޭނާ އެންމެ ސަޕޯޓުކިރާ ފުޓުބޯޅަ ތަރިއަކީ ޒައިނައްދީން ޒިދާން ކަމަށެވެ.
އެމްބާޕޭއަކީ މިފަހަރުގެ ޗެމްޕިއަންސް ލީގުގެ ނޮކް އައުޓް ސްޓޭޖުގައި ޔުވެންޓަސް ކޮޅަށް ގޯލެއް ކާމިޔާބު ކުރެވިފައިވާ ހަމައެކަނި ކުޅުންތެރިޔާއެވެ. އުމުރުން އެންމެ 18 އަހަރުގެ އެމްބާޕޭ އަންނަނީ ޒުވާން އުމުރުގައި ތަފާތު މޮޅު ކުޅުމެއް ދައްކަމުންވެނެ. އެގޮތުން އޭނާ ހޯދުމަށް މެންޗެސްޓާ ސިޓީ އާއި މެންޗެސްޓާ ޔުނައިޓެޑުގެ އިތުރުން ފީއެސްޖީ އިންވެސް މަސައްކަތް ކުރަމުން އަންނަ ކަމަށް މީޑިއާ ރިޕޯޓްތަށް ވަނީ ބުނެފައެވެ. އޭނާ ވަނީ މިސީޒަނުގައި މޮނާކޯ އަށް 26 ލަނޑު ކާމިޔާނުކޮށް އެޓީމާއި އެކުގައި ލީގު ކާމިޔާބު ކޮށްފައެވެ.
