ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ 2008 ވަނަ އަހަރު ކުރިން ރާއްޖެ އޮތް ހާލަތަށް ގައުމު އަނބުރާލުމަށް ކަމަށް އެމްޑީޕީގެ ކުރީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.

އެމްޑީޕީން ބޭއްވި ހަރުގެ ޖަލްސާގައި ހަސަން ލަތީފް ވިދާޅުވީ މިސަރުކާރާއެކު ދައުލަތް އޮތީ ބޮއްސުންލާފައިވާ ކަމަށާއި، ދައުލަތުގެ ފައިސާއަށް ވާނުވާ ނޭނގޭ ކަމަށެވެ.

2024 ވަނަ އަހަރު 55 ބިލިއަން ރުފިޔާގެ ބަޖެޓެއް ފާސްކޮށް ސަރުކާރާއި ހަވާލުކޮށްފައިވަނީ ރައްޔިތުން ބޭނުންވާ ކަންކަން ކުރުމަށްކަން ފާހަގަކުރައްވައި ހަސަން ލަތީފް ވިދާޅުވީ އެބަޖެޓަށް ވީ ގޮތް ނޭނގޭ ކަމަށާއި، ރައްޔިތުން ބޭނުންވާ އެއްވެސް ކަމެއް ކޮށްފައިނުވާ ކަމަށެވެ. ރައްޔިތުންގެ ފައިސާއަށް ވީ ގޮތް އޮޅުން ފިލުވުމަށް މަސައްކަތް ކުރަންޖެހޭ ރައްޔިތުން މަޖިލިސް މެންބަރުންގެ ބާރު ކަނޑުވާލައި، އެ މެންބަރުންނަށް ވެސް ބަޖެޓްގެ ފައިސާއަށް ހެދިނުހެދި ގޮތް ސިއްރުކޮށްފައިވާ ކަމަށް އޭނާ ވިދާޅުވިއެވެ.

މީގެ އިތުރުން ހަސަން ލަތީފް ވިދާޅުވީ ގާނޫނު އަސާސީގެ ދެވަނަ މާއްދާގައި ރާއްޖެއާއި މިދައުލަތް ހިންގަންވާނީ ޑިމޮކްރެޓިކް އުސޫލުން ކަމަށް ބަޔާންކޮށްފައި އޮތް ނަމަވެސް މިސަރުކާރުގެ ބައެއް ބޭފުޅުންނާއި، ޕީއެންސީގެ ބައެއް މަޖިލިސް މެންބަރުން ބޭނުންވަނީ ރައީސް މުއިއްޒަށް ހުރިހާ ބާރެއް ދިނުމަށް ކަމަށާއި، އެއީ ރައީސް މުއިއްޒު ވިސްްނުންފުޅު ކަމަށެވެ. ހަސަން ލަތީފް ވިދާޅުވީ ރައީސް މުއިއްޒުގެ ވިސްނުންފުޅު ހުރީ އަދި މަސައްކަތް ކުރައްވަނީ 2008 ވަނަ އަހަރު ކުރިން ރާއްޖެ އޮތް ހާލަތަށް ގައުމު ގެންދިއުން ކަމަށެވެ.

ހަސަން ލަތީފް ވިދާޅުވީ އެމްޑީޕީއަކީ މަގުމައްޗަށް ފަރިތަ ޕާޓީއެއް ކަމަށާއި، މި ސަރުކާރުގެ އަމަލުތައް ހުރި ގޮތުން މަޑުން ތިބެވެން ނެތް ކަމަށެވެ. މިސަރުކާރުން ރައްޔިތުން ވަރަށް ބޮޑަށް ނިކަމެތި ކުރަމުންދާއިރު، މަންޒަރު ބަލަން އެމްޑީޕީން ނުތިބޭނެ ކަމަށާއި، ފަހަތަށް ނުޖެހޭނެ ކަމަށް އޭނާ ވިދާޅުވިއެވެ. އަދި ވިދާޅުވީ މި ސަރުކާރުން އަޅުވެތިކޮށްފައިވާ ރައްޔިތުންގެ މަޖިލިސް ވެސް އެމްޑީޕީން މިނިވަން ކުރާނެ ކަމަށެވެ.