ރައީސް މުއިއްޒު މަސައްކަތް ކުރައްވަނީ 2008 ވަނަ އަހަރު ކުރިން ރާއްޖެ އޮތް ހާލަތަށް ގައުމު އަނބުރާލުމަށް: ހަސަން ލަތީފް
15 ފެބުރުއަރީ 2025 | ހޮނިހިރު 08:2555 ބިލިއަން ރުފިޔާގެ ބަޖެޓަށް ވީ ގޮތް ނޭނގޭ
އެމްޑީޕީ ހަރުގެ ޖަލްސާގައި އެމްޑީޕީގެ ކުރީގެ ޗެއަރޕާސަން ހަސަން ލަތީފް ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ 2008 ވަނަ އަހަރު ކުރިން ރާއްޖެ އޮތް ހާލަތަށް ގައުމު އަނބުރާލުމަށް ކަމަށް އެމްޑީޕީގެ ކުރީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
އެމްޑީޕީން ބޭއްވި ހަރުގެ ޖަލްސާގައި ހަސަން ލަތީފް ވިދާޅުވީ މިސަރުކާރާއެކު ދައުލަތް އޮތީ ބޮއްސުންލާފައިވާ ކަމަށާއި، ދައުލަތުގެ ފައިސާއަށް ވާނުވާ ނޭނގޭ ކަމަށެވެ.
2024 ވަނަ އަހަރު 55 ބިލިއަން ރުފިޔާގެ ބަޖެޓެއް ފާސްކޮށް ސަރުކާރާއި ހަވާލުކޮށްފައިވަނީ ރައްޔިތުން ބޭނުންވާ ކަންކަން ކުރުމަށްކަން ފާހަގަކުރައްވައި ހަސަން ލަތީފް ވިދާޅުވީ އެބަޖެޓަށް ވީ ގޮތް ނޭނގޭ ކަމަށާއި، ރައްޔިތުން ބޭނުންވާ އެއްވެސް ކަމެއް ކޮށްފައިނުވާ ކަމަށެވެ. ރައްޔިތުންގެ ފައިސާއަށް ވީ ގޮތް އޮޅުން ފިލުވުމަށް މަސައްކަތް ކުރަންޖެހޭ ރައްޔިތުން މަޖިލިސް މެންބަރުންގެ ބާރު ކަނޑުވާލައި، އެ މެންބަރުންނަށް ވެސް ބަޖެޓްގެ ފައިސާއަށް ހެދިނުހެދި ގޮތް ސިއްރުކޮށްފައިވާ ކަމަށް އޭނާ ވިދާޅުވިއެވެ.
މީގެ އިތުރުން ހަސަން ލަތީފް ވިދާޅުވީ ގާނޫނު އަސާސީގެ ދެވަނަ މާއްދާގައި ރާއްޖެއާއި މިދައުލަތް ހިންގަންވާނީ ޑިމޮކްރެޓިކް އުސޫލުން ކަމަށް ބަޔާންކޮށްފައި އޮތް ނަމަވެސް މިސަރުކާރުގެ ބައެއް ބޭފުޅުންނާއި، ޕީއެންސީގެ ބައެއް މަޖިލިސް މެންބަރުން ބޭނުންވަނީ ރައީސް މުއިއްޒަށް ހުރިހާ ބާރެއް ދިނުމަށް ކަމަށާއި، އެއީ ރައީސް މުއިއްޒު ވިސްްނުންފުޅު ކަމަށެވެ. ހަސަން ލަތީފް ވިދާޅުވީ ރައީސް މުއިއްޒުގެ ވިސްނުންފުޅު ހުރީ އަދި މަސައްކަތް ކުރައްވަނީ 2008 ވަނަ އަހަރު ކުރިން ރާއްޖެ އޮތް ހާލަތަށް ގައުމު ގެންދިއުން ކަމަށެވެ.
ރައީސް މުއިއްޒުގެ މައިގަނޑު ވިސްނުމަކީ 2008 ވަނަ އަހަރުގެ ކުރިން މިރާއްޖެ މިއޮތް ހާލަތު 2008 ވަނައަހަރުގެ ކުރިން މިރާއްޖެ އޮތް ގޮތަށް މިރާއްޖެ އަނެއްކާ ވެސް އަނބުރާލުމަށް މަސައްކަތް ކުރަން. އޭގެ މާނައަކީ ރައްޔިތުން މަޖިލީހުގެ ފުލް ކޮންޓްރޯލް ރައީސް މުއިއްޒު ނަންގަވަން. ހަމައެއާއެކު މިނިވަން މުއައްސަސާތައް ރައީސް މުއިއްޒުގެ މުށުތެރެއަށް ލައްވާ ފަނޑިޔާރުންނާއި ކޯޓުތަކަކީ ހަމަ ސީދާ ރައީސުލްޖުމްހޫރިއްޔާ އެންގެވީމާ އެ އަންގަވާ ގޮތަކަށް ޝަރީއަތްކޮށް ހުކުމް ކުރަން ހުރި ތަންތަން ކަމަށް ބަދަލުކޮށް ތިޔަ ބޭފުޅުންގެ ހަޒާނާ ރައްޔިތުންގެ ހަޒާނާ ބާރުފޯރުވަން.އެމްޑީޕީގެ ކުރީގެ ޗެއަރޕާސަން ހަސަން ލަތީފް
ހަސަން ލަތީފް ވިދާޅުވީ އެމްޑީޕީއަކީ މަގުމައްޗަށް ފަރިތަ ޕާޓީއެއް ކަމަށާއި، މި ސަރުކާރުގެ އަމަލުތައް ހުރި ގޮތުން މަޑުން ތިބެވެން ނެތް ކަމަށެވެ. މިސަރުކާރުން ރައްޔިތުން ވަރަށް ބޮޑަށް ނިކަމެތި ކުރަމުންދާއިރު، މަންޒަރު ބަލަން އެމްޑީޕީން ނުތިބޭނެ ކަމަށާއި، ފަހަތަށް ނުޖެހޭނެ ކަމަށް އޭނާ ވިދާޅުވިއެވެ. އަދި ވިދާޅުވީ މި ސަރުކާރުން އަޅުވެތިކޮށްފައިވާ ރައްޔިތުންގެ މަޖިލިސް ވެސް އެމްޑީޕީން މިނިވަން ކުރާނެ ކަމަށެވެ.
