ހޮނިހިރު ދުވަހު 3 ރަހީނުން ދޫކޮށްލާނެ ކަމަށް ހަމާސް އިން ބުނެފި
14 ފެބުރުއަރީ 2025 | ހުކުރު 14:16ހަމާސްއިން ތިން ރަހީނުންގެ ނަން ހާމަކޮށްފާ ވާއިރު، ހޮނިހިރު ދުވަހުގެ މެންދުރަށް މީހުން ދޫ ނުކޮށްފިނަމަ، އިސްރާއީލުން ހަނގުރާމަ ފަށާނެ ކަމުގެ އިންޒާރު ވަނީ ދީފައެވެ
ހަމާސްގެ އަލް-ޤައްސާމް ބްރިގޭޑްގެ މެންބަރުން، ހަމާސް އާއި އިސްރާއީލާ ދެމެދު ވެފައިވާ މީހުން ދޫކޮށްލުމުގެ އެއްބަސްވުމުގެ ދަށުން ބަޔަކު ދޫކޮށްލަނީ
ހުއްޓިފައިވާ ހަނގުރާމަ އަލުން ފެށިދާނެ ކަމުގެ ނުތަނަވަސްކަން އުފެދިފައިވަނިކޮށް، ހަމާސްއިން ހޮނިހިރު ދުވަހު މިނިވަންކުރުމަށް ހަމަޖެހިފައިވާ ތިން ރަހީނުންގެ ނަންތައް ހާމަކޮށްފިއެވެ.
މިއީ އިސްރާއީލުގައި ބަންދުކޮށްފައި ތިބި ފަލަސްތީނު މީހުންނާ ބަދަލުކުރުމަށް ހަމަޖެހިފައިވާ ރަހީނުންނެވެ.
މި ތިން މީހުން ސުންގަޑި ހަމަވުމުގެ ކުރިން ދޫނުކޮށްފިނަމަ ހަނގުރާމަ އަލުން ފަށާނެކަމަށް އިސްރާއީލުން ބުނެ އިންޒާރު ދީފައިވެއެވެ. މި އިންޒާރު ދީފައިވަނީ ހަނގުރާމަ ހުއްޓާލުމުގެ އެއްބަސްވުމާ އިސްރާއީލުން ޚިލާފުވެފައިވާ ކަމަށް ބުނެ ރަހީނުން ދޫކުރުން ފަސްކުރާނެކަމަށް ހަމާސްއިން ބުނުމާ ގުޅިގެންނެވެ.
ހޮނިހިރު ދުވަހުގެ މެންދުރުގެ ނިޔަލަށް ހަމާސް އިން ގާޒާގައި ހިފަހައްޓާފައިވާ ހުރިހާ ރަހީނުން ދޫނުކޮށްފިނަމަ ހަނގުރާމަ ހުއްޓާލުމުގެ އެއްބަސްވުން އުވާލަން ޖެހޭނެ ކަމަށް ޓްރަމްޕް ވަނީ ވިދާޅުވެފައެވެ.
19 ޖެނުއަރީގައި އަމަލު ކުރަން ފެށި ހަނގުރާމަ ހުއްޓާލުމުގެ އެއްބަސްވުމިގެ ދަށުން އިސްރާއީލަށް ނިސްބަތްވާ 16 ރަހީނުން އަދި ތައިލެންޑުގެ 5 ރަހީނުން ދޫކޮށްފައިވެއެވެ. މީގެ ބަދަލުގައި އިސްރާއީލުން ހައްޔަރު ކޮށްފައި ތިބި 566 ފަލަސްތީނު މީހުން ދޫކޮށްލާފައިވެއެވެ.
ހުއްޓުމަކަށް އައިސްފައިވާ ހަނގުރާމައިގެ ފުރަތަމަ 6 ހަފްތާގެ މުއްދަތުގައި، ޖުމްލަ 33 ރަހީނުން ދޫކުރުމަށް ހަމަޖެހިފައިވެއެވެ. އޭގެ ބަދަލުގައި އިސްރާއީލުގައި ހައްޔަރުކޮށްފައިވާ 1،900 އާ ގާތްކުރާ އަދަދެއްގެ ފަލަސްތީނު މީހުން ދޫކޮށްލަން ޖެހޭނެއެވެ.
2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސް އިން ވަނީ 251 މީހުން ރަހީނުންގެ ގޮތުގައި ހިފަހައްޓާފައިވެއެވެ.
އޭގެ ފަހުން އިސްރާއީލުން ޣައްޒާ އަށް ދިން ހަމަލާތަކުގައި 48،230 އަށްވުރެ ގިނަ މީހުން ޝަހީދުވެފައިވާ ކަމަށް ޣައްޒާގެ ސިއްޙަތާ ބެހޭ ވުޒާރާއިން ބުނެފައިވެއެވެ.
އޮކްޓޯބަރު 7 ގައި ހިފަހައްޓާފައިވާ މީހުންގެ ތެރެއިން 73 ރަހީނުން އަދިވެސް ޣައްޒާ ގައި ބަންދުކޮށްފައި ތިބި ކަމަށް ރިޕޯޓުތައް ބުނެއެވެ.
ހަނގުރާމަ ހުއްޓުމުގެ އެއްބަސްވުން ތަންފީޒު ކުރަން ފެށުނީއްސުރެ ތަފާތު މައްސަލަތައް ކުރިމަތިވަމުން އައިސްފައިވެއެވެ. އެއްބަސްވުމާ ޚިލާފުވެފައިވާ ކަމަށް ދެފަރާތުން ވެސް ބުނެ އެކަމާ ގުޅިގެން ފިޔަވަޅުތައް އަޅަމުން ގެންގޮސްފައިވެއެވެ. މެދުވެރިންގެ ގޮތުގައި މަސައްކަތްކުރާ އެމެރިކާ، މިސްރު އަދި ޤަޠަރުގެ ބުރަ މަސައްކަތުން އެއްބަސްވުން އުވާލުން އަދި މީހާތަނަށް ވަނީ ހުއްޓުވާފައެވެ.
އަނެއްކޮޅުން، އެއްބަސްވުމުގެ ޝަރުޠުތަކުގެ ދަށުން ޣައްޒާ އަށް އެތެރެކުރަން ޖެހޭ ކަމަށް ހަމާސް އިން ބުނާ އަދަދަށް ޓެންޓުތަކާއި އެހީގެ ލޮރީތައް ވެއްދުން އިސްރާއީލުން ހުއްޓުވާ ކަމަށް ހަމާސް އިން ތުހުމަތުކޮށްފައިވެއެވެ.
