ރަސްފަންނާއި ސަލްޓަން ޕާކު މަރާމާތުކުރަން އޮތީ ބަޔަކާއި ހަވާލުކޮށްފައި - ސިޓީ ކައުންސިލް
ރައީސް މުއިއްޒު މިނިސްޓަރުކަމުގައި ހުންނެވި އިރުން ފެށިގެން ސަލްޓަންޕާކު މަރާމާތުކޮށްފައި ނުވޭ
މާލެ ސިޓީ ކައުންސިލުން ރަސްފަންނުގައި ބައެއް މަސައްކަތްތައް ކުރަނީ
ރަސްފަންނާއި ސަލްޓަން ޕާކު މަރާމާތުކުރައްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވަނިކޮށް، ރަސްފަންނާއި ސަލްޓަން ޕާރކު އަލުން އާރާސްތުކުރުމުގެ މަސައްކަތް ކުރިއަށްދާ ކަމަށް މާލެ ސިޓީ ކައުންސިލުން ބުނެފިއެވެ.
ހުކުރު ދުވަހު ރައީސް ޑރ. މުހައްމަދު މުއިއްޒު ރަސްފަންނަށް އާއިލާއާއެކު ވަޑައިގެން އެމަނިކުފާނުގެ ބެލުމުގެ ދަށުން މަރާމާތުނުކޮށް ހަލާކުވާން ދޫކޮށްލާފައިވާ ރަސްފަންނާއި ސަލްޓަންޕާކާއި ގުޅޭގޮތުން އެކްސްގައި ކުރެއްވި ޕޯސްޓެއްގައި ވިދާޅުވީ ރަސްފަންނާއި ސަލްޓަންޕާކް ގެ ޙާލަތު ފެނިފައި ހިތާމަކުރައްވާ ކަމަށެވެ. އަދި ދެ ތަންވެސް ދަނީ ވީރާނާވަމުން ކަމަށާއި، މި ދެތަނަކީވެސް ތޮށްޖެހިފައިވާ މާލޭގައި، ރައްޔިތުންނަށް ނުހަނު ހިތްހަމަޖެހުމާއި އުފާ ލިއްބައިދޭ ދެތަން ކަމަށެވެ. ރައީސް ވިދާޅުވީ މިދެތަނުގެ ރީތިކަމާއި އާރޯކަން އަނބުރާ ގެނެސްދީ އަދި ކުރިޔަށްވުރެވެސް ފުރިހަމަކޮށްދިނުމަށް ސަރުކާރުން ޚާއްސަ މަސަައްކަތްތަކެއް ކުރާނެކަން މާލޭގެ ރައްޔިތުންނާއި މާލޭގައި ދިރިއުޅޭ އެންމެހާ ރައްޔިތުންނަށް މަޢުލޫމާތަށްޓަކައި ދަންނަވާ ކަމަށެވެ.
މިކަމާއި ގުޅިގެން މާލޭ ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނެފައިވަނީ ގިނަ ދުވަސްތަކެއް ވަންދެން މަރާމާތު ނުކުރެވި ހުރި ސަލްޓަން ޕާރކާއި ރަސްފަންނުގެ މަރާމާތުގެ މަސައްކަތް ފެށުމުގެ ތައްޔާރީތައް ފަށާފައިވާ ކަމަށެވެ. އަދި 2016 ވަނަ އަހަރު ހުޅުވުނު ސަލްޓަން ޕާރކުގެ ހާލަތު ދެނެގަތުމަށް ޚާއްސަ ދިރާސާއެއް ހެދުމަށްފަހު، އެތަން އާބާތުރަ ފިލުވައިދޭނެ ފަރާތެއް ހޯދުމަށް މާލޭ ސިޓީ ކައުންސިލުން އާންމުކޮށް އިއުލާންކޮށްފައިވާ ކަމަށެވެ.
މާލެ ސިޓީ ކައުންސިލުން ބުނީ މި ޕާކަކީ ހުޅުވުނު ފަހުން އެއްވެސް މަރާމާތެއް ނުކުރެވި، އެތަނުގައި ހުރި ޢިމާރާތްތަކާއި ވަސީލަތްތައް ބޭނުން ނުކުރެވޭ ހާލަތަކަށް ގޮސްފައިވާ ތަންތަން ކަމަށެވެ. އަދި ރަސްފަންނުގެ މަރާމާތުގެ މަސައްކަތަށް ބަލާއިރު، އެތަނުގެ ވެލިގަނޑު ރަނގަޅުކުރުމަށް ބޭނުންވާ ތިމާވެށީގެ ހުއްދަ އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ވަނީ ދޫކޮށްފައި ކަމަށެވެ. އަދި މި މަސައްކަތް ކުރުމަށް ހަވާލުކުރެވިފައިވާ ކޮންޓްރެކްޓަރ އަންނަ ހަފްތާގެ ތެރޭގައި އެތަނުގެ ޗަކަ ނަގައި، މަސައްކަތް ފަށާނެ ކަމަށް އަންގާފައިވާ ކަމަށެވެ.
މީގެ އިތުރުން ރަސްފަންނު މަރާމާތްކޮށް ބެލެހެއްޓުމުގެ ޒިންމާ މަތިކޮށްފައިވާ ފަރާތުން އެކަށީގެންވާ ގޮތެއްގައި މަސައްކަތް ކުރިއަށް ނުގެންދެވުމުގެ ސަބަބުން، އެފަރާތާއެކު ވެފައިވާ އެއްބަސްވުން މިހާރު ބާތިލްކުރެވިފައިވާ ކަމަށާއި، އަދި މީގެ ފަހުން ރަސްފަންނުގެ މަރާމާތުގެ މަސައްކަތް ކުރިއަށް ގެންދާނީ ސީދާ ސިޓީ ކައުންސިލުން ކަމަށް ބުނެފައިވެއެވެ.
ރަސްފަންނު މަރާމާތުކުރުމުގެ މަސައްކަތް ހަވާލުކޮށްފައި އޮތީ އެމްޓީސިސީއާއެވެ. ނަމަވެސް މިދިޔަ ދޮޅު އަހަރު ތެރޭގައި އެމްޓީސީސީން އެތަނުގެ އެއްވެސް މަރާމާތެއްކޮށްފައިނުވެއެވެ. އަދި ސަލްޓަން ޕާކު ރައީސް މުއިއްޒު ހައުސިންގ މިނިސްޓަރުކަމުގައި ހުންނެވި ދުވަސްވަރާއި، އޭގެ ފަހުން މޭޔަރުކަމުގައި ހުންނެވި އިރުން ފެށިގެން އެމަނިކުފާނުގެ ބެލުމުގެ ދަށުގައި އެތަންތަން ހުރި އިރުވެސް އެތަންތަނުގެ މަރާމާތެއްކޮށްފައި ނުވެއެވެ.
