ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީގެ ޗެއާމަންކަމުގެ މަގާމުން އަޙުމަދު ޒުހޫރު ވަކި ކޮށްފި އެވެ.

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ރާއްޖޭގެ ފުޓުބޯޅަ ނޯމަލައިޒިން ކުރަން ނިންމާފައި ވަނީ މިދިޔަ އަހަރު އެވެ. ފަސް މެމްބަރުންގެ މައްޗަށް އެކުލެވޭ ނޯމަލައިޒިން ކޮމެޓީ އެއް އައްޔަންކޮށް، ފުޓުބޯޅައިގެ ކަންކަން ވަނީ އެ ކޮމެޓީއާ ހަވާލު ކޮށްފަ އެވެ.

ފީފާ އިން އައްޔަން ކުރި ނޯމަލައިޒިން ކޮމެޓީގައި ހިމެނުނު ފަސް މެމްބަރުންނަކީ ޒުހޫރުގެ އިތުރުން، ކުރީގެ ޕްރޮސެކިއުޓަރ ޖެނަރަލް (ޕީޖީ) އަޙުމަދު މުޢިއްޒު، އިސްމާއީލް ސިމަން، ފަރީޙާ ޝަރީފް އަދި އަޙުމަދު އަލީ އެވެ. އަދި އެ ކޮމެޓީގެ ޗެއާމަނަކަށް ހަމަޖެއްސީ ޒުހޫރު އެވެ.

ނަމަވެސް ފީފާ އިން ވަނީ އެފްއޭއެމްގެ ނޯމަލައިޒިން ކޮމެޓީގެ ޗެއާމަންކަމުގެ މަގާމުން ޒުހޫރު ވަކި ކުރަން ނިންމައިފަ އެވެ. މައުލޫމާތު ލިބިފައިވާ ގޮތުގައި ފީފާ އިން އެ ނިންމުން ނިންމީ، ނޯމަލައިޒިން ކޮމެޓީގެ މަސައްކަތްތައް އެންްމެ އެކަށީގެންވާ ފެންވަރުގައި އަދި އެންމެ ރަނގަޅު ގޮތުގައި ކުރިއަށް ނުދާތީ އެވެ. ޒުހޫރުގެ އިތުރުން ފީފާ އިން ވަނީ އަޙުމަދު އަލީ ވެސް އެ ކޮމެޓީން ވަކިކޮށްފަ އެވެ.

އެއާއެކު މިހާރު އެ ކޮމެޓީގައި ތިއްބަވާނީ ތިން މެމްބަރުންނެެވެ. އެއީ މުޢިއްޒުގެ އިތުރުން، ސިމަން އަދި ފަރީޙާ އެވެ. އަދި ފީފާ އިން ވަނީ ނޯމަލައިޒިން ކޮމެޓީގެ ޗެއާމަނަކަށް މުޢިއްޒު ހަމަޖައްސައިފަ އެވެ.

އެފްއޭއެމްގެ ނޯމަލައިޒިން ކޮމެޓީ އަށް ފީފާ އިން ހަވާލު ކޮށްފައިވާ އެންމެ ބޮޑު އެއް މަސައްކަތަކީ، އެފްއޭއެމް ހަމަ މަގަށް އެޅުވުމާއި، އެ އިދާރާގެ އިންތިޚާބު ބޭއްވުމުގެ އިތުރުން، ދެން ވެސް ފުޓުބޯޅައާ ގުޅުން ހުރި ކަންކަން ކުރުމަށެވެ. އެއް އަހަރު ދުވަހުގެ މުއްދަތަށް ރާއްޖެ ނޯމަލައިޒް ކޮށްފައިވާއިރު، އެ ކޮމެޓީ އަށް އޮތީ ބޮޑެތި މަސްއޫލިއްޔަތުތަކެއް ހަވާލު ކޮށްފަ އެވެ.