ކ. މާލެ
|
22 އޯގަސްޓް 2017 | އަންގާރަ 14:24
ގާޑިއޯލާ އަދި މެސީ
ގާޑިއޯލާ އަދި މެސީ
ގޫގުލް
ޕެޕް ގާޑިއޯލާ
މެސީ ގެނައުމަކީވެސް ކުރެވިދާނެ ކަމެއް: ގާޑިއޯލާ
 
މެސީގެ ރިލީސް ފީ އަކީ 300 މިލިއަން ޔޫރޯ

ބާސެލޯނާގެ ފޯވާޑް ލިއޮނެލް މެސީ ގެނައުމަކީވެސް ކުރެވިދާނެ ކަމެއް ކަމަށް މެންޗެސްޓާރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ގާޑިއޯލާ މިހެން ބުނެފައިވަނީ ހޯމަ ދުވަހުގެ ރޭ އެވަޓަންއާއި ދެކޮޅަށް ކުޅުނު މެޗަށް ފަހު ނޫސްވެރިންނާ ވާހަކަ ދައްކަމުންނެވެ.

ނޫސްވެރިޔަކު ކުރި ސުވާލަކަށް ޖަވާބު ދެމުން ގާޑިއޯލާ ބުނެފައިވަނީ މެސީ ގެނެވޭ ވަރަށް ލާރި ހުރެއްޖެނަމަ މެސީ ގެނައުމަކީ ކޮންމެ މީހަކަށް ވެސް ކުރެވިދާނެ ކަމެއްކަމަށާއި ސިޓީއަށް އޭނާ ސޮއި ކުރުމަކީވެސް ހަމަ ވެދާނެ ކަމެއްކަމަށެވެ.

މީގެ އިތުރުން އޭނާ ވަނީ ރޭގެ މެޗުގައި ސިޓީގެ ކުޅުންތެރިން ދެއްކި ކުޅުމަށްވެސް ތައުރީފުކޮށްފައެވެ. އެގޮތުން 10 ކުޅުންތެރިންނާއެކު ކުޅެ އެވަޓަން އަތުން ޕޮއިންޓެއް ލިބުމުންވެސް ހިތްހަމަ ޖެހޭ ކަމަށާއި ހުރިހާ މެޗަކަށްވެސް ނުކުންނަނީ މޮޅުވާން ކަމަށް އޭނާ ވަނީ ބުނެފައެވެ.

މެސީ އެހެން ޓީމަކަށް ބަދަލުވާން އުޅޭކަމުގެ އަޑުތަށް ފެތުރިފައިވާ އިރު މި ޓްރާންސްފާ މާކެޓުގައި ބާސެލޯނާއަށް ކުޅެމުންދިޔަ ބްރެޒިލްގެ ފޯވާޑް ނޭމާ ވަނީ 222 މިލިއަން ޔޫރޯއަށް ފްރާންސްގެ ޕީއެސްޖީއަށް ބަދަލުވެފައެވެ.

އެހެން ޓީމަކުން މެސީ ގަންނަން ބޭނުންވާނަމަ ހުށަހަޅަން ޖެހޭ އެންމެ ދަށް އަދަދު ކަމުގައި ބާސާއިން ކަނޑައަޅާފައިވަނީ 300 މިލިއަން ޔޫރޯއެވެ. ބާސާއިން މެސީއަށް އާ އެއްބަސްވުމެއް ހުށަހަޅާފައިވާއިރު އަދިވެސް އޭނާ ކޮންޓްރެކްޓްގައި ސޮއިނުކުރެއެވެ.

ޔޫރަޕުގެ ފުޓުބޯޅައިގެ ތަޖުރިބާކާރުން ހާމަކުރާގޮތުގައި މެސީ ބާސާ ދޫކޮށްލާނީ ހަމައެކަނި ގާޑިއޯލާގެ ކޯޗު ކަމުގެ ދަށުން ކުޅޭ ޓީމަކަށެވެ. އެހެން ކަމުން ސިޓީއިން މެސީ ގަންނަން ހުށަހަޅައިފިނަމަ އޭނާ ސިޓީއަށް ބަދަލުވުމަކީ ދުރުގައިވާ ކަމެއް ނޫނެވެ.

މެސީ ވަނީ މީގެ ކުރިންވެސް ގާޑިއޯލާއާއި އެކު މަސައްކަތް ކޮށްފައެވެ. އެގޮތުން ބާސެލޯނާގެ ރަންޒަމާން ކަމަށްވާ 2008 ފެށިގެން 2012 ވަނަ އަހަރާ ހަމަޔަށް ގާޑިއޯލާ ވަނީ މެސީއަށް ކޯޗުކަން ކޮށްދީފައެވެ.

މެސީއަކީ ގިނަ ބަޔަކު ގަބޫލް ކުރާގޮތުގައި މިހާތަނަށް ފުޓުބޯޅައިގެ ދުނިޔެއަށް އައި އެންމެ މޮޅު ކުޅުންތެރިޔާއެވެ. އޭނާ ވަނީ ފީފާއިން ހޮވާ ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސެން ފިޔާޒް
100%
0%
0%
0%
0%
0%
ކޮމެންޓް
ގުޅުންހުރި