ފުރަތަމަ ލެގުގައި ބަޔާނުން ސެލްޓިކް ބަލިކޮށްފި

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ސެލްޓިކާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެއްޖެ އެވެ.

ސެލްޓިކްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު ފުރަތަމަ ލެގުގެ މެޗު ބަޔާނުން ކާމިޔާބު ކުރީ 2-1 އިންނެވެ. މެޗުގައި ބަޔާނުން ދެ ލަނޑު ޖަހާފައި ވަނިކޮށް، ސެލްޓިކުން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗު ފަށައިގެން ފުރަތަމަ މިނެޓުގައި ސެލްޓިކްގެ ނިކޮލަސް ޚުން ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ބަޔާނުން ވަނީ ލަނޑު ޖަހައި ލީޑު ނަގައިފަ އެވެ. ޑަޔޮޓް އުޕަމަކާނޯ ތަނަވަސްކޮށްދިން ފުރުސަތެއްގައި ބަޔާނަށް އެ ލަނޑު ޖަހައިދިނީ މައިކަލް އޮލައިސޭ އެވެ.

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި އިންގްލެންޑުގެ ކެޕްޓަން ހެރީ ކޭން ވަނީ ބަޔާންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޔޯޝުއާ ކިމިކް އެވެ. މެޗުގައި ލަނޑެއް ޖެހުމަށް ސެލްޓިކް އިން ކުރަމުން އައި މަސައްކަތް ކާމިޔާބު ކުރެވުނީ މެޗުގެ 79 ވަނަ މިނެޓުގަ އެވެ. އެ ލަނޑު އެ ޓީމަށް ޖަަހައިދިނީ ޑައިޒެން މައެޑާ އެވެ.

މޮޅާއެކު ބަޔާނުން މުބާރާތުގެ ގަދަ 16 ވަނަ ބުރުގެ އުންމީދު ބޮޑު ކޮށްފައިވާއިރު، ޕްލޭ އޮފްގެ ދެ ވަނަ ލެގު އޮންނާނީ ބަޔާންގެ އަމިއްލަ ދަނޑުގަ އެވެ. އެ މެޗު އޮންނާނީ ފެބްރުވަރީ މަހުގެ 19 ވަނަ ދުވަހުގެ ރޭ އެވެ.