ސިޓީން މެޗު ނިންމާލި ގޮތާ މެދު ހިތާމަ ކުރަން: ގާޑިއޯލާ

އިނގިރޭސި ޕްރިމިއަރ ލީގުގައި މެންޗެސްޓަރ ސިޓީ އިން އާސެނަލާ ދެކޮޅަށް ކުޅުނު މެޗު ނިންމާލި ގޮތާ މެދު ހިތާމަ ކުރާ ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ އާސެނަލްގެ އަމިއްލަ ދަނޑުގައި އެ ޓީމާ ދެކޮޅަށް ކުޅެ، ސިޓީ ބަލިވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. މި ސީޒަންގައި ސިޓީގެ ނަތީޖާތައް ވަރަށް ބޮޑަށް ދަށްވެފައި އޮއްވާ، މި ފަހުން އެ ޓީމުން ވަނީ ނަތީޖާތައް ރަނގަޅުކޮށް ހަމަޖެހިލައިފަ އެވެ. ނަމަވެސް އާސެނަލް އަތުން ބަލިވެ ސިޓީ ފަސް ވަނައިގައި އޮތްއިރު، ގަދަ ހަތަރެއްގެ ޕްރެޝަރު ސިޓީ އަށް ބޮޑުވެއްޖެ އެވެ.

ގާޑިއޯލާ ބުނީ މެޗުގެ ފަހު 25 ވަނަ މިނެޓާ މެދު އޭނާ ހިތާމަ ކުރާ ކަމަށެވެ. ސިޓީގެ ކުޅުންތެރިން މެޗުގެ 65 ވަނަ މިނެޓު ނުވަތަ 70 ވަނަ މިނެޓާ ހަމައަށް ކުރި ކަންތައް، ފަހު ވަގުތުގައި ކުރަން އެމީހުންނަށް "ނޭނގުނީ" ކަމަށް ގާޑިއޯލާ ބުންޏެވެ. އޭނާ ބުނީ އާސެނަލްގެ ދަނޑުގައި އެ ޓީމާ ދެކޮޅަށް ކުޅުމަކީ އުނދަގޫ ކަމެއް ކަމަށާއި، މެޗު ފަށައިގެން ވެސް އާސެނަލްގެ ފަރާތުން ފެންނަމުން ދިޔައީ ވަރުގަދަކަން ކަމަށް ގާޑިއޯލާ ބުނެފައިވެ އެވެ.

ނަމަވެސް މެޗުގެ ފުރަތަމަ ހާފުގެ ވަކި ހިސާބަކުން ސިޓީން މެޗުގެ ކޮންޓްރޯލް ނަގައިގެން ރަނގަޅަށް ކުޅެމުން ދިޔަކަން ޤަބޫލު ކުރާ ކަމަށް ގާޑިއޯލާ ވަނީ ބުނެފަ އެވެ. އޭގެ ނަތީޖާއެއްގެ ގޮތުން އެއް ލަނޑުން ފަހަތުގައި އޮއްވާ، ސިޓީން ނަތީޖާ ހަމަހަމަ ކުރީ ރަނގަޅު ކުޅުމެއް ދައްކައިގެން ކަަމަށް ގާޑިއޯލާ ބުންޏެވެ. އޭގެ ފަހުން ވެސް ސިޓީން އެ ޓީމުގެ ރަނގަޅު ކުޅުން ދައްކަމުން ދިޔަ ކަމަށް ގާޑިއޯލާ ވަނީ ފާހަގަ ކޮށްފަ އެވެ.

ނަމަވެސް ވަކި ހިސާބަކުން ސިޓީ އަށް ދޫކޮށްލެވުނީ ކަމަށާއި، ކުޅުންތެރިންނަށް އެމީހުން ކުރަން ޖެހޭ ކަންތައް ނޭނގުނީ ކަމަށް ގާޑިއޯލާ ވަނީ ބުނެފަ އެވެ. އޭނާ ބުނީ މެޗުގެ އެންމެ ފަހު ވަގުތާ މެދު ހިތާމަ ކުރާ ކަމަށާއި، މެޗުގެ އެ ނޫން ވަގުތަކުގައި ސިޓީގެ ފަރާތުން ފެނުނީ ރަނގަޅު ކުޅުމެއް ކަމަށް ޤަބޫލު ކުރާ ކަމަށެވެ. ގާޑިއޯލާ ބުނީ މެޗުގެ ނަތީޖާއަށް ބަލާފައި އޭނާ އެ ބުނާ ވާހަކަ ދެނެގަންނަން އުނދަގޫ ވާނެ ކަމަށާއި، ނަމަވެސް އޭނާ އަށް ކުރެވޭ އިޙުސާސަކީ އެއީ ކަމަށެވެ.

މި ސީޒަންގެ ލީގުގައި މިހާތަނަށް ސިޓީން 24 މެޗު ކުޅެފައިވާއިރު، އެ ޓީމު މޮޅުވެފައި ވަނީ 12 މެޗުންނެވެ. ހަތް މެޗުން ބަލިވެފައިވާއިރު، ފަސް މެޗުން ވަނީ އެއްވަރުވެފަ އެވެ. ފަސް ވަނައިގައި ސިޓީ އޮތީ 41 ޕޮއިންޓާ އެކު އެވެ. މި ސީޒަންގައި ސިޓީގެ ނަތީޖާތައް ދަށްވެފައިވާއިރު، މިއީ ގާޑިއޯލާ ހަވާލުވީ ފަހުން ސިޓީގެ ނަތީޖާތައް އެންމެ ދަށްވީ ފަހަރެވެ.