އިނގިރޭސި ޕްރިމިއަރ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު ބަލިވެއްޖެ އެވެެ.

ޔުނައިޓެޑުގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗުގައި ޕެލަސް އިން ވަނީ 2-0 އިން އެ ޓީމު ބަލިކޮށްފަ އެވެ. މެޗުގައި ޕެލަސް އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ޔުނައިޓެޑުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. ޕެލަސްގެ އޭރިޔޭ ތެރެއިން ލިބުނު ބޯޅައެއް އަލެހާންޑްރޯ ގާނާޗޯ ފޮނުވާލި ނަމަވެސް، އެ ބޯޅަ ބޭރަށް ދިޔައީ ޕެލަސްގެ ކުޅުންތެރިޔެއްގެ ފައިގައި ޖެހިފަ އެވެ. އޭގެ ފަހުން ޔުނައިޓެޑުގެ އަމަދު ޑިއާލޯ ދިން ފުރުސަތެއްގައި ކޮބީ މައިނޫ ފޮނުވާލި ބޯޅަ ވެސް ދިޔައީ ބޭރަށެވެ.

މެޗުގެ ދެ ވަނަ ހާފުގައި ޕެލަސް އަށް ލީޑު ނަގައިދިނީ ފިލީޕް މަޓޭޓާ އެވެ. އެއީ ޕެލަސްގެ ކުޅުންތެރިޔަކު ބޮލުން ފޮނުވާލި ބޯޅަ ގޯލުގެ ހުރަސް ދަނޑީގައި ޖެހިފައި އައި ވަގުތު، ގޯލަށް ވައްދާލައިގެން މާޓޭޓާ ޖެހި ލަނޑެކެވެ. މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ޕެލަސްގެ ދެ ވަނަ ލަނޑު ޖެހީ ވެސް މަޓޭޓާ އެވެ.

މި ބައްޔާއެކު ޔުނައިޓެޑު އޮތީ ލީގު ތާވަލްގެ 13 ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 24 މެޗުން 29 ޕޮއިންޓާ އެކު އެވެ. އަދި މިއީ މި ސީޒަންގެ ޕްރިމިއާ ލީގުގައި ޔުނައިޓެޑުގެ 11 ވަނަ ބައްޔެވެ. ޔުނައިޓެޑު އަތުން މޮޅުވެ ޕެލަސް އޮތީ 12 ވަނައިގަ އެވެ. އެއޯ 24 މެޗުން 30 ޕޮއިންޓާ އެކު އެވެ.