އާސެނަލް އިން ސިޓީގެ މައްޗަށް ބޮޑު މޮޅެއް ހޯދައިފި

އިނގިރޭސި ޕްރިމިއަރ ލީގުގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުން އާސެނަލް ބޮޑު މޮޅެއް ހޯދައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 5-1 އިންނެވެ. މެޗުގައި އާސެނަލް އިން ކުރި ހޯދާފައި ވަނިކޮށް، ސިޓީން ނަތީޖާ ހަމަހަމަ ވެސް ކުރި އެވެ. ނަމަވެސް ފަހުން އާސެނަލް ވަނީ ހަތަރު ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ދެ ވަނަ މިނެޓުގައި އާސެނަލަށް ކުރި ހޯދައިދިނީ މާޓިން އޮޑެގާޑް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކައި ހަވާޓްޒް އެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި އާލިން ހާލަންޑު ވަނީ ލަނޑު ޖަހައި ސިޓީ އަށް ނަތީޖާ ހަމަހަމަ ކޮށްދީފަ އެވެ. އެއީ ސަވީނިއޯ ތަނަވަސްކޮށްދިން ފުރުސަތެއްގައި ހާލަންޑު ޖެހި ލަނޑެކެވެ.

ސިޓީން ނަތީޖާ ހަމަހަމަ ކުރިތާ މިނެޓެއް ފަހުން، ދެ ވަނަ ފަހަރަށް އާސެނަލަށް ކުރި ހޯދައިދިނީ ތޯމަސް ޕާޓޭ އެވެ. އޭގެ ފަހުން މެޗުގެ 62 ވަނަ މިނެޓުގައި މައިލްސް ލެވިސް ސްކެލީ ވަނީ އާސެނަލްގެ ތިން ވަނަ ލަނޑު ޖަހައިފަ އެވެ. މެޗުގައި އާސެނަލްގެ ހަތަރު ވަނަ ލަނޑު ހަވާޓްޒް ޖެހީ މެޗުގެ 76 ވަނަ މިނެޓުގަ އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާސެނަލްގެ ފަހު ލަނޑު ޖެހީ އީތަން އެންވަނޭރީ އެވެ.

މޮޅާއެކު އާސެނަލް އިން ވަނީ އެއް ވަނައިގައި އޮތް ލިވަޕޫލާ ދެމެދު އޮތް ފަރަގު ކުޑަކޮށްފަ އެވެ. ދެ ވަނައިގައި އާސެނަލް އޮތީ މިހާތަނަށް އެ ޓީމު ކުޅެފައިވާ 24 މެޗުން 50 ޕޮއިންޓާ އެކު އެވެ. އެއް ވަނައިގައި ލިވަޕޫލަށް 56 ޕޮއިންޓު ލިބެނީ އާސެނަލަށް ވުރެ އެއް މެޗު މަދުން ކުޅެގެންނެވެ.