ބާސެލޯނާ އިން ދެއްކި ކުޅުމާމެދު ފްލިކް ހުރީ އިންތިހާ އަށް ހިތްހަމަ ޖެހިފައި!

ސްޕެނިޝް ލީގުގައި ވެެލެންސިއާއާ ދެކޮޅަށް ކުޅުނު މެޗުގައި ބާސެލޯނާގެ ކުޅުންތެރިން ދެއްކި ކުޅުމާ މެދު އިންތިހާ އަށް ހިތްހަމަ ޖެހިފައި ހުރި ކަމަށް، އެ ޓީމަށް އިރުޝާދު ދެމުން އަންނަ ޖަރުމަނުގެ ހަންސީ ފްލިކް ބުނެފި އެވެ.

ލީގުގައި ވެލެންސިއާއާ ދެކޮޅަށް ކުޅުނު މެޗުގައި ބާސެލޯނާ އިން ވަނީ އެ ޓީމުގެ ކޮޅަށް ހަތް ލަނޑު ޖަހައިގެން، ބޮޑު މޮޅެއް ހޯދައިފަ އެވެ. މެޗުގެ ފުރަތަމަ ހާފުގައި ވެސް ބާސެލޯނާ އިން ވަނީ ފަސް ލަނޑު ޖަހައިފަ އެވެ. އަދި ދެ ވަނަ ހާފުގައި ދެ ލަނޑު ޖަހައިގެން ބާސެލޯނާ ވަނީ އެ ޓީމުގެ ފެންވަރު ދައްކާލައިފަ އެވެ.

މެޗަށް ފަހު ނޫސްވެރިންނާ ވާހަކަ ދައްކަމުން ފްލިކް ބުނީ، ބާސެލޯނާގެ ކުޅުންތެރިން ދައްކައިދިނީ ވަރަށް ތަފާތު ރޫޙެއް ކަމަށެވެ. މެޗު ފެށުނީއްސުރެ އެންމެ ފަހު ވަގުތާ ހަމައަށް ވެސް ބާސެލޯނާ އިން ދިޔައީ މެޗުގެ ފުރިހަމަ ކޮންޓްރޯލް ހިފަހައްޓަމުން ކަމަށާއި، ކުޅުންތެރިން ކުރީ ވަރަށް ރަނގަޅު މަސައްކަތެއް ކަމަށް ފްލިކް ބުންޏެވެ. އަދި އެ މެޗުގައި ބާސެލޯނާގެ ކުޅުންތެރިން ދެއްކި ކުޅުމާ މެދު އޭނާ ހުރީ ވަރަށް ބޮޑަށް ހިތްހަމަ ޖެހި އަދި އުފާވެފައި ކަމަށް ވެސް ފްލިކް ވަނީ ބުނެފަ އެވެ.

މީގެ އިތުރުން ފްލިކް ބުނީ ބާސެލޯނާގައި ތިބީ ވަރަށް ފެންވަރު ރަނގަޅު ކުޅުންތެރިންތަކެއް ކަމަށާއި، އެ ކުޅުންތެރިންގެ ތެރެއިން ޓީމެއް އެކުލަވާލަން ޖެހުމަކީ އޭނާ އަށް މައްސަލަ އަކަށް ނުވާ ކަމަށެވެ. އެއީ ރަނގަޅު ނިޝާނެއްކަން ފާހަގަކޮށް ފްލިކް ބުނީ، ކޮންމެ ކުޅުންތެރިޔަކީ ވެސް ފެންވަރު ރަނގަޅު އަދި ހަވާލު ކުރާ ކަމެއް އެންމެ ފުރިހަމަ އަށް އަދާ ކުރާނެ، އިތުބާރު ހުރި ކުޅުންތެރިޔެއް ކަމަށެވެ.

ބާސެލޯނާ ކުރިއަށްދާ ގޮތާ ގުޅޭ ގޮތުން ވާހަކަ ދައްކަމުން ފްލިކް ބުނީ އެ ޓީމުގެ ކުރިއަށް ދަނީ ރަނގަޅު މިސްރާބުގައި ކަމަށެވެ. އަދި އެންމެ މުހިންމީ ކޮންމެ މެޗަކުން ވެސް މޮޅުވުން ކަމަށާއި، ކޮންމެ މެޗެއްގައި ވެސް ތިން ޕޮއިންޓު ކަށަވަރު ކުރުމަކީ ކޮންމެހެން ކުރަން ޖެހޭ ކަމެއް ކަމަށެވެ. އަދި އޭނާ އަށް ލިބިފައި އޮތް ޓީމަކީ އެއް ރޫޙެއްގައި މަސައްކަތް ކުރާ، އެއް ހިތްވަރެއް ދައްކާ ޓީމެއް ކަމަށް ޤަބޫލު ކުރާ ކަމަށް ވެސް ފްލިކް ވަނީ ބުނެފަ އެވެ.

މިސީޒަނާ ދިމާކޮށް ބާސެލޯނާގެ ކޯޗުކަމާ ހަވާލުވީ ފްލިކްގެ އިރުޝާދުގެ ދަށުން އެ ޓީމުން އައީ ރަނގަޅު ނަތީޖާތަކެއް ނެރެމުންނެވެ. ލީގުގައި ވެސް ބާސެލޯނާ އިން ރަނގަޅު ނަތީޖާތަކެއް ނެރެ އެއް ވަަނައިގައި އޮތްއިރު، ވަކި ހިސާބަކުން ލީގުގައި މުހިންމު ޕޮއިންޓުތަކެއް ގެއްލި މިހާރު ބާސެލޯނާ އޮތީ ތިން ވަނައިގަ އެވެ. ބާސެލޯނާ އާއި އެއް ވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑާ ދެމެދު މިހާރު އޮތީ ހަތް ޕޮއިންޓުގެ ފަރަގެކެވެ.