ރައީސް މުއިއްޒު ހއ. ދިއްދު އަށް ކުރައްވާ ދަތުރުފުޅަށް ހުރަސް އެޅޭ އެއްވެސް ކަމެއް ނުކުރުމަށް ކައުންސިލުން އެމްޑީޕީ އަށް އަންގައިފި

ރައީސް ޑރ. މުއިއްޒު ހއ. ދިއްދޫ އަށް ކުރައްވާ ދަތުރުފުޅަށް ހުރަސް އެޅޭ އެއްވެސް ކަމެއް ނުކުރުމަށް ދިއްދޫ ކައުންސިލުން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް އަންގައިފިއެވެ.

ދިއްދޫ ކައުންސިލުގެ ރައީސް އަބްދުﷲ ރަޝީދު ސޮއި ކުރައްވާ، އެމްޑީޕީގެ ދިއްދޫ ދާއިރާގެ ރައީސް އަބްދުﷲ ވަހީދަށް ފޮނުއްވި ސިޓީ އެއް ގައި ރައީސް މުއިއްޒު ދިއްދޫ އަށް 2025 ޖަނަވަރީ 28 ވަނަ ދުވަހު ޒިޔާރަތްކުރައްވާގޮތަށް ހަމަޖެހިފައިވާ ކަމަށް ބުނެފައިވެއެވެ. އަދި އެ ދަތުރުފުޅަށް ހުރަސް އެޅޭ ފަދަ އެއްވެސް ކަމެއް އެމްޑީޕީ ކޮށްގެން ނުވާނެ ކަމަށް ވެސް ބުނެފައިވެއެވެ.

"މިދަތުރުފުޅާ ގުޅިގެން އިންތިޒާމް ކުރާ ޙަރަކާތްތަކަށް ހުރަސްއެޅޭފަދަ އެއްވެސް ކަމެއް ތިޔަ ޕާޓީއިން ނުކުރެއްވުމަށާއި ރައީސުލްޖުމްހޫރިއްޔާ ދިއްދޫ ރައްޔިތުންނާއެކު ބާއްވާ ރަސްމީ ބައްދަލުވުމަށް ދަތިވާފަދަ ގޮތަށް ލައުޑް ސްޕީކަރ މެދުވެރިކޮށް ނުވަތަ އެނޫންވެސް ވަސީލަތެއް މެދުވެރިކޮށް އެއްވެސް ކަމެއް ނުކުރުމަށް މި ކައުންސިލުން އިލްތިމާސް ކުރަމެވެ." ޖެނުއަރީ 25 ގެ ތާރީޚުގައި ކައުންސިލްގެ އިދާރާ އިން ފޮނުވާފައިވާ ސިޓީގައިވެއެވެ.

ސިޔާސީ ހަރަކާތް ހިންގި ކަމުގައި ވީ ނަމަވެސް ގާނޫނީ އިމުން ބޭރު ނުވުމަށް ދަންނަވާ ކަމަށް ފުލުހުންގެ އިދާރާ އަށް ކޮޕީ ކޮށް ފޮނުވާފައިވާ ސިޓީގައި ވެއެވެ.

ސިޓީ އާ ބެހޭ ގޮތުން ދިއްދޫ ދާއިރާގެ ރައްޔިތުންގެ މަޖިލީހުގެ މެމްބަރުކަން ވެސް ކުރެއްވި އަބްދުﷲ ވަހީދު ވިދާޅުވީ، ކުރީގެ ރައީސް ސާލިހް ދިއްދޫ އަށް ކުރެއްވި ދަތުރުފުޅުތަކަށް ހުރަސް އެޅުމަށް މިހާރުގެ ކައުންސިލުގެ ރައީސް އިސްވެ ހުންނަވާ ހިންގެވި ހަރަކާތްތަކުގެ މަތިން ހަނދާން ވުމުން ފޮނުވި ސިޓީ އެއް ކަމަށް ގަބޫލު ކުރެވޭ ކަމަށެވެ.              

ދިއްދޫ އިން މި ނޫހަށް ވާހަކަ ދެއްކި ފަރާތަކުން ބުނި ގޮތުގައި ރައީސް ރަށްރަށަށް ވަޑައިގަންނަވަނީ ރައްޔިތުންގެ ހާލު ބައްލަވަން ކަމަށް ވުމާއެކު ހާލު އޮތް ގޮތް ރައީސް އަށް ސާފު ކޮށްދިނުމަށް ޝުއޫރު ފާޅު ކޮށް ސުލްހަވެރި ސިޔާސީ ހަރަކާތް ހިންގުމަށް ތައްޔާރު ވަމުން ދާ ކަމަށެވެ.